Pannakisarita iti Maysa a Kaarruba​—Dios Kadi ni Jesus?

MARAGSAKAN dagiti Saksi ni Jehova a makisarita kadagiti kaarrubada maipapan iti linaon ti Biblia. Adda kadi aniaman a saludsodmo maipapan iti Biblia? Kayatmo kadi a mailawlawag kenka ti maysa a patpatien wenno narelihiosuan nga aktibidad dagiti Saksi ni Jehova? No kasta, no adda maam-ammom a Saksi, saanka koma a bumdeng a makisarita kenkuana ta maragsakan a mangilawlawag iti dayta.

Naisalaysay iti baba ti maysa a pagarigan. Ipapantayo a simmarungkar ti Saksi nga agnagan Karen iti pagtaengan ti babai nga agnagan Samantha.

Pudno Kadi a Saanka a Mamati ken Jesus?

Samantha: Kuna ti pastormi a dagiti Saksi ni Jehova saanda a mamati ken Jesus. Pudno kadi?

Karen: Kayatko a paneknekan kenka a mamatikami ken Jesus. Kinapudnona, patienmi a nasken ti panamati ken Jesus tapno maisalakan ti maysa.

Samantha: Patiek met dayta.

Karen: No kasta, adda ngarud pagpadaanta. Ay wen siak gayam ni Karen. Sika ngay?

Samantha: Siak ni Samantha.

Karen: Mabalin a naisaludsodmon, ‘No talaga a mamati dagiti Saksi ni Jehova ken Jesus, apay ngarud a saan a kasta ti ibagbaga ti dadduma?’

Samantha: Wen ngarud, apay ngata?

Karen: Kastoy ngamin Samantha, mamatikami unay ken Jesus, ngem saanmi a patien ti amin nga ibagbaga dagiti tattao maipapan kenkuana.

Samantha: Kas iti ania?

Karen: Kuna ti dadduma a maysa laeng a naimbag a tao ni Jesus. Ngem saankami nga umanamong iti dayta.

Samantha: Uray met siak.

Karen: Adda man gayamen pagpadaanta. Maysa pay, saan met a patien dagiti Saksi ni Jehova dagiti sursuro a mangkonkontra iti imbaga ni Jesus a relasionna iti Ama.

Samantha: Ania ti kayatmo a sawen?

Karen: Isursuro ngamin ti adu a relihion a ni Jesus ti Dios. Kasta kadi met ti naisuro kenka?

Samantha: Wen, ibagbaga ti pastormi nga agpada kano ti Dios ken ni Jesus.

Karen: Ngem umanamongka kadi a ti kasayaatan a pamay-an tapno maammuam ti pudno maipapan ken Jesus ket isu ti panangusigmo iti kinunana maipapan iti bagina?

Samantha: Siempre.

Ania ti Kinuna ni Jesus?

Karen: Usigenta ti maysa a teksto ti Biblia a mangilawlawag iti dayta. Sige, siputam ti kinuna ni Jesus iti Juan 6:38: “Bimmabaak manipud langit tapno aramidek, saan a ti pagayatak, no di ket ti pagayatan daydiay nangibaon kaniak.” Ita, no ni Jesus no isu ti Dios, saan kadi a makatikaw dayta nga imbaga?

Samantha: Ania ti kayatmo a sawen?

 Karen: Napaliiwmo siguro a kinuna ni Jesus a saan a bimmaba manipud langit tapno aramidenna ti bukodna a pagayatan?

Samantha: Wen, kinunana a bimmaba tapno aramidenna ti pagayatan Daydiay nangibaon kenkuana.

Karen: Ngem no ni Jesus ti Dios, asino ti nangibaon kenkuana manipud langit? Ken apay a nagtulnog ni Jesus iti pagayatan ti nangibaon kenkuana?

Samantha: Sabagay, maawatakon ti kayatmo a sawen. Ngem daytoy laeng kadi ti teksto a mangpaneknek a saan a Dios ni Jesus?

Karen: Usigenta pay ngarud ti kinuna ni Jesus iti sabali a gundaway. Umasping iti dayta ti kinunana iti sumaruno a kapitulo ti Juan. Pakibasam man ti Juan 7:16?

Samantha: Sige. “Ni Jesus, kalpasanna, simmungbat kadakuada ket kinunana: ‘Ti isursurok saanko a kukua, no di ket kukua daydiay nangibaon kaniak.’”

Karen: Pagyamanan. Sigun iti binasam, isursuro kadi ni Jesus dagiti bukodna a kapanunotan?

Samantha: Saan. Imbagana a dagiti insurona ket naggapu iti Daydiay nangibaon kenkuana.

Karen: Hustoka. Ngem mabalin manen a maisaludsodmo no asino ti nangibaon ken Jesus ken asino ti nangted kadagiti kinapudno nga insurona. Saan ngata a natantan-ok daydiay ngem ni Jesus? Saan kadi a natantan-ok ti agibabaon ngem iti maibabaon?

Samantha: Ay wen aya. Itak la ngamin a mabasa dayta a teksto.

Karen: Kastoy pay ti imbaga ni Jesus iti Juan 14:28: “Nangngegyo a kinunak kadakayo, Pumanawak ket agsubliak kadakayo. No inayatdak, agrag-okayo ta mapanak iti Ama, agsipud ta ti Ama dakdakkel ngem siak.” Sigun iti dayta a teksto, ania ti makunam iti panangmatmat ni Jesus iti bagina mainaig iti relasionna iti Ama?

Samantha: Kinunana a ti Ama dakdakkel ngem isuna. No kasta, imbilangna ngarud a natantan-ok ti Dios.

Karen: Husto ta kunam. Adda pay sabali a pagarigan, paliiwem ti kinuna ni Jesus kadagiti adalanna iti Mateo 28:18. Kunana: “Isuamin nga autoridad naiteden kaniak idiay langit ken ditoy daga.” Imbaga kadi ni Jesus a sigud nga adda kenkuana ti isuamin nga autoridad?

Samantha: Saan. Imbagana a naited dayta kenkuana.

Karen: Ngem no ni Jesus ti Dios, apay koma a maipaayan iti dakdakkel nga autoridad? Ken asino ti nangted kenkuana iti dayta?

Samantha: Bay-am ngarud ta pagpanunotak dayta.

Asino ti Kasarsaritana?

Karen: Adda pay banag a makatikaw no ni Jesus ti Dios.

Samantha: Ania dayta?

Karen: Ti salaysay ti pannakabautisar ni Jesus a mabasa iti Lucas 3:21, 22. Pakibasam man dagitoy a bersikulo.

Samantha: “Ita idi nabautisaranen dagiti amin a tattao, nabautisaran met ni Jesus ket, bayat nga agkarkararag, naluktan ti langit ket bimmaba kenkuana ti nasantuan nga espiritu iti sukog ti bagi a kasla kalapati, ket adda timek a naggapu iti langit: ‘Sika ti Anakko, ti dungdungnguen; inanamonganka.’”

Karen: Nakitam kadi no ania ti ar-aramiden ni Jesus idi mabautisaran?

Samantha: Agkarkararag.

Karen: Wen. Siempre, no ni Jesus ti Dios, asino ngata ti pagkarkararaganna?

Samantha: Mayat dayta a saludsod. Idamagkonto dayta iti pastormi.

Karen: Mainaig iti dayta a punto, adda nagsao manipud langit idi rimkuas ni Jesus iti danum. Nadlawmo kadi ti kinuna Daydiay nagsao?

Samantha: Kinunana a ni Jesus ti Anakna, a dungdungnguenna ken inanamonganna.

Karen: Wen. Ngem no ni Jesus ti Dios, asino ngata ti nagsao manipud langit?

Samantha: Ay wen aya! Diak napanunot dayta.

 Apay a Naibaga nga “Ama” ken “Anak”?

Karen: Usigem pay daytoy: Nabasata a ni Jesus dinakamatna ti Dios kas nailangitan nga Amana. Ken idi nabautisaran ni Jesus, ti timek manipud langit tinukoyna ni Jesus kas Anakna. Kinapudnona, inawagan ni Jesus ti bagina kas Anak ti Dios. No kayatmo nga ilawlawag kaniak nga agpada ti kasasaad ti dua nga indibidual, ania ti usarem a relasionda?

Samantha: Siguro usarek ti relasion ti dua nga agkabsat.

Karen: Hustoka. Mabalin pay ketdi nga usarem ti relasion ti agsingin. Ngem tinukoy ni Jesus ti Dios kas Ama ken ti bagina kas Anak. Iti panagkunam, ania ngata ti kayat nga ibaga ni Jesus?

Samantha: Ammokon ti kayatmo a sawen. Desdeskribiren ni Jesus ti maysa nga indibidual a laklakay ken dakdakkel ti autoridadna.

Karen: Wen. Apag-isu ti napanunotmo nga ilustrasion​—ti relasion ti agkabsat wenno agsingin. No talaga a ni Jesus ti Dios, saan ngata a kas Naindaklan a Mannursuro, dayta met nga ilustrasion ti usarenna, wenno mabalin nga agusar pay ketdi iti nalawlawag a pagarigan ti panagpada?

Samantha: Siempre.

Karen: Ngem inaramatna ti termino nga “Ama” ken “Anak” iti panangdeskribirna iti relasionna iti Dios.

Samantha: Makapainteres dayta nga imbagam.

Ania ti Kinuna Dagiti Nagkauna a Pasurot ni Jesus?

Karen: Sakbay nga agpakadaak, kayatko a dakamaten ti maysa pay a punto, no adda pay panawenmo.

Samantha: Sige, okey lang met.

Karen: No talaga a ni Jesus ti Dios, saan kadi a kasta met koma ti nalawag a kunaen dagiti adalanna?

Samantha: Wen a.

Karen: Ngem awan mabasatayo iti Biblia a kasta ti insuroda. Siputam ti insurat ni apostol Pablo iti Filipos 2:9 maipapan iti inaramid ti Dios kalpasan ti ipapatay ken panagungar ni Jesus. Kastoy ti kuna daytoy nagkauna a pasurot ni Jesus: “Isu [ni Jesus] intan-ok ti Dios iti nangatngato a saad ket siaasi nga inikkanna iti nagan a nangatngato ngem iti tunggal sabali pay a nagan.” Sigun iti daytoy a teksto, ania ti inaramid ti Dios maipaay ken Jesus?

Samantha: Kuna ni Pablo a ti Dios intan-okna ni Jesus iti nangatngato a saad.

Karen: Wen. No kapada ni Jesus ti Dios sakbay a natay sa intan-ok ti Dios iti nangatngato a saad, agparang a nangatngato no kuan ni Jesus ngem iti Dios. Asino koma pay ti nangatngato ngem iti Dios?

Samantha: Siempre awanen.

Karen: Wen. Maibasar kadagiti pammaneknek a nabasata, isursuro kadi ti Biblia a ni Jesus ti Dios?

Samantha: Saan. Adu gayam ti pammaneknek iti Biblia a ni Jesus ket Anak ti Dios.

Karen: Husto dayta. Ngem ipanamnamak kenka a dakkel ti panagraem dagiti Saksi ni Jehova ken Jesus. Mamatikami a babaen ti ipapatayna kas naikari a Mesias, naluktan ti gundaway ti amin a matalek a tattao tapno maisalakan.

Samantha: Mamatiak met iti dayta.

Karen: Ngem mabalin a maisaludsodmo no kasanotayo a maipakita nga ap-apresiarentayo ti panangipaay ni Jesus iti biagna para kadatayo. *

Samantha: Naisaludsodko metten dayta.

Karen: Kayatko ti agsubli tapno ilawlawagko ti sungbat ti Biblia. Addakanto kadi ditoy balayyo iti kastoy nga oras inton sumaruno a lawas?

Samantha: Wen, addaakto ditoy.

Karen: Sige umayakto ngarud.

[Footnote]