ADDA kadi am-ammom a kabsat nga immakar iti sabali a pagilian nga addaan iti dakdakkel a panagkasapulan iti manangaskasaba iti Pagarian? Naisaludsodmo kadin: ‘Ania ti nangtignay kadakuada nga agserbi iti sabali a pagilian? Kasano a nagsaganada iti daytoy a panagserbi? Kabaelak kadi met nga aramiden dayta?’ Tapno maammuam ti sungbat dagitoy, nasayaat no makisaritaka kadagiti kakabsat a nakapadas iti dayta. Rugiantayon!

Ania ti nakatignayanyo nga agserbi iti sabali a pagilian nga addaan iti dakdakkel a panagkasapulan? Kuna ni Amy a taga-United States ken agtawen itan iti nasurok a 30: “Adu a tawen a pinampanunotko ti agserbi iti sabali a pagilian, ngem kasla diak kabaelan.” Ania ti nangbalbaliw iti panangmatmatna? “Idi 2004, adda agassawa nga agserserbi idiay Belize a nangawis kaniak a bumisita sadiay ken makikadua kadakuada nga agpayunir iti makabulan. Napanak ket nagustuak dayta! Kalpasan ti makatawen, immakarak idiay Ghana tapno agpayunir.”

Ni Stephanie ket taga-United States met laeng ken agtawen iti dandani 30. Sumagmamano a tawen ti napalabasen, tiningitingna ti kasasaadna ket napanunotna idi: ‘Nasalun-atak ken awan ti obligasionko iti pamilia. Mabalin nga ad-adu pay ti maaramidak para ken Jehova ngem ti ar-aramidek ita.’ Dayta a napudno a panangsukimat iti bagi ti nakatignayanna nga umakar idiay Ghana tapno mapalawana ti ministeriona. Inar-arapaap ti nataengan nga agassawa a taga-Denmark a da Filip ken Ida ti umakar iti lugar nga addaan iti dakdakkel a panagkasapulan. Nagaramidda iti pamay-an tapno matungpal ti arapaapda. Kuna ni Filip: “Idi adda gundawaymin a mangaramid iti dayta, kasla imbaga ni Jehova kadakami: ‘Inkayon!’” Idi 2008, immakarda idiay Ghana ket  nagserbida sadiay iti nasurok a tallo a tawen.

Agpaypayunir idiay United States ti agassawa a da Hans ken Brook nga agtawen iti nasurok la a 30. Idi 2005, timmulongda a nangsaranay kadagiti biktima ti Bagyo a Katrina. Idi agangay, nagaplayda tapno tumulong kadagiti internasional a proyekto ti panagibangon ngem saanda a naawis. “Idi kuan,” malagip ni Hans, “adda palawag a nangngegmi iti kombension a nadakamat nga inawat ni Ari David a saan nga isu ti mangibangon iti templo, isu a binaliwanna ti kalatna. Tinulongannakami dayta a mangakseptar nga okey laeng a baliwan ti maysa dagiti teokratiko a kalatna.” (1 Cron. 17:1-4, 11, 12; 22:5-11) Innayon ni Brook, “Kayat ni Jehova nga agtuktokkami iti sabali a ruangan.”

Idi nangngeg da Hans ken Brook dagiti nagpipintas a kapadasan dagiti gagayyemda nga agserserbi iti sabali a pagilian, natignayda ket pinadasda ti agpayunir iti sabali a pagilian. Idi 2012, napanda idiay Ghana ket uppat a bulan a timmulongda iti sign-language a kongregasion. Nupay masapul nga agsublida idiay United States, ti panagserbida idiay Ghana ti nangrubrob iti tarigagayda a kanayon a mangyun-una iti Pagarian. Manipud idin, timmulongda a nangibangon iti proyekto ti sanga nga opisina idiay Micronesia.

Kasano a nagsaganakayo tapno makapagserbikayo iti lugar nga addaan iti dakdakkel a panagkasapulan? “Nagbirokak kadagiti artikulo ti Pagwanawanan mainaig iti panagserbi iti lugar nga addaan iti dakdakkel a panagkasapulan,” kuna ni Stephanie. * “Imbagak met kadagiti panglakayen iti kongregasionmi ken iti manangaywan iti sirkito ken ti asawana a kayatko ti agserbi iti sabali a pagilian. Kangrunaanna, kanayon nga inkarkararagko ken Jehova ti kalatko.” Pinasimple met ni Stephanie ti biagna tapno makaurnong iti usarenna nga agserbi iti sabali a pagilian.

 Kuna ni Hans: “Inkararagmi ken Jehova nga iwanwannakami ta kayatmi ti mapan iti lugar a kayatna a papananmi. Inkararagmi met ti espesipiko a petsa no kaano nga aramidenmi dayta.” Nangipatulodda iti surat iti uppat a sanga nga opisina. Idi nakaawatda iti subalit manipud iti sanga nga opisina ti Ghana, napanda sadiay tapno bumisita iti dua a bulan. Kuna ni Hans: “Naragsakankami a nakipagtrabaho kadagiti kakabsat isu nga imbaybayagmi ti nagyan sadiay.”

Da George ken Adria ket agassawa a taga-Canada ken agtawenda iti dandani 40. Sipapanunotda a bendisionan ni Jehova dagiti nasayaat a desision, saan a basta nasayaat laeng a panggep. Gapuna, nangaramidda kadagiti addang tapno maragpatda ti kalatda. Tinawaganda ti maysa a sister nga agserserbi iti lugar nga addaan iti dakdakkel a panagkasapulan idiay Ghana ket adu ti insaludsodda. Nagsuratda met iti sanga nga opisina idiay Canada ken idiay Ghana. “Kasta met,” kuna ni Adria, “pinasimplemi pay ti simplen a biagmi.” Dagitoy ti nakatulong kadakuada tapno makapanda idiay Ghana idi 2004.

Ania dagiti pakarigatan a nakaipasanguanyo idi immakarkayo, ket kasano a napagballigianyo dagita? Para ken Amy, marigatan idi damo ta mailiw iti pamiliana. “Naiduma ti amin iti nakairuamak.” Ania ti nakatulong kenkuana? “Tawtawagandak dagiti kapamiliak nga ibagbagada nga ap-apresiarenda ti panagserbik isu a kanayon a maipalagip kaniak no apay nga immakarak. Idi agangay, agsasaritakamin babaen ti video call. Gapu ta agkikitakami iti iskrin, kasla  agaassidegkami laeng.” Imbaga ni Amy a ti pannakigayyemna iti maysa a sister nga adun ti kapadasanna ti nakatulong kenkuana a mangtarus iti nagduduma a kaugalian. “Daytoy a gayyemko ti kanayon a pagtarayak no diak maawatan ti reaksion dagiti tattao. Tinulongannak tapno ammok ti aramidek ken ti saanko nga aramiden. Dayta ti nakatulong kaniak tapno naragsakak a mangitungpal iti ministeriok.”

Kuna da George ken Adria nga idi kaak-akarda idiay Ghana, nariknada a kasla idi ugma ti panagbiagda. “Imbes nga agusarkami iti washing machine, timba ti usarenmi. Sangapulo a daras a nabaybayag ti panangisaganami iti kanenmi ngem iti dati nga ar-aramidenmi,” kuna ni Adria. “Ngem di nagbayag, nagbalin a baro a kapadasan dagiti kasla narigat a kasasaad.” Kuna ni Brook: “Uray no adu a pakarigatan ti pakaipasanguanmi a payunir, naragsak ti biagmi. No pagtitiponenmi ti amin a makapabileg a kapkapadasanmi, agbalin a nagpipintas a sabsabong dagiti kapadasan nga ipatpategmi.”

Apay nga iparegtayo iti dadduma daytoy a panagserbi iti Pagarian? “Makaparagsak ti mangasaba iti teritoria nga adda dagiti tattao a masarakam a magagaran a mangammo iti kinapudno nga uray la kayatda nga inaldaw nga iyadalam ida iti Biblia,” kuna ni Stephanie. “Ti iyaakar ken panagserbi iti lugar nga addaan iti dakdakkel a panagkasapulan ti maysa kadagiti kasayaatan a desision nga inaramidko!” Idi 2014, nakiasawa ni Stephanie ken Aaron ket agserserbida itan iti sanga nga opisina ti Ghana.

“Nagsayaat a kapadasan,” kuna ti payunir a taga-Germany a ni Christine nga agtawen ita iti nasurok la a 30. Nagserbi ni Christine idiay Bolivia sakbay nga immakar idiay Ghana. Kunana pay: “Gapu ta adayoak iti pamiliak, kanayon a ni Jehova ti pagpatulongak. Ad-adda a nagbalin a pudpudno kaniak. Napadasak met ti naisangsangayan a panagkaykaysa dagiti adipen ni Jehova. Daytoy a panagserbi ti nangpasayaat iti biagko.” Nabiit pay a nakiasawa ni Christine ken Gideon ket agtultuloy nga agserserbida idiay Ghana.

Ibaga da Filip ken Ida no ania ti inaramidda tapno rumang-ay dagiti iyad-adalanda iti Biblia. “Idi, 15 wenno ad-adu pay ti iyad-adalanmi iti Biblia, ngem pinagbalinmi laengen a 10 tapno maisuromi a naimbag dagiti iyad-adalanmi.” Nagimbagan kadi dayta dagiti iyad-adalanda? Kuna ni Filip: “Adda baro nga iyad-adalak nga agnagan Michael. Inaldaw nga agadalkami ken nakasagana a naimbag isu a nalpasmi ti libro nga Isursuro ti Biblia iti makabulan. Idi agangay, nagbalin a di bautisado nga agibumbunannag. Idi damona ti sumurot a mangasaba, dinamagna kaniak, ‘Mabalin kadi a tulongannak a mangyadal iti Biblia?’ Nakigtotak. Imbaga ni Michael nga adda tallo nga iyadalanna iti Biblia ket agpatulong a mangyadal kadakuada.” Talaga a kasapulan ti ad-adu pay a mangisuro iti Biblia ta uray dagiti mayad-adalan ket agisursuroda payen iti Biblia!

Ibaga ni Amy no kasano a dagus a nariknana nga adda dakkel a panagkasapulan: “Idi sangsangpetmi idiay Ghana, nangasabakami iti bassit a purok ken nagsapulkami kadagiti umel. Saan la a maysa no di ket walo nga umel ti nasarakanmi iti dayta laeng a purok!” Idi agangay, nakiasawa ni Amy ken Eric ket agserserbida kas special pioneer. Naikamengda iti sign-language a kongregasion tapno matulonganda ti nasurok a 300 nga umel nga agibumbunannag ken interesado iti dayta a pagilian. Para kada George ken Adria, idiay Ghana ti damo a nakapadasanda no ania ti kasasaad dagiti misionero. Isu a maragsakanda unay idi naawisda nga ageskuela iti maika-126 a klase ti Gilead School! Agserserbida ita kas misionero idiay Mozambique.

Makaparagsak a makita ti adu a kakabsat manipud iti sabali a pagilian nga agregregget a makipagani kadagiti lokal a kakabsat. (Juan 4:35) Tunggal lawas, mapan a 120 ti mababautisaran idiay Ghana. Kas iti 17 nga immakar iti lugar nga addaan iti dakdakkel a panagkasapulan idiay Ghana, rinibu a manangaskasaba iti intero a lubong ti natignay a situtulok nga agsakripisio gapu iti ayatda ken Jehova. Agserserbida kadagiti lugar nga agkasapulan iti ad-adu a manangaskasaba iti Pagarian. Sigurado a maparparagsakda ti puso ni Jehova!—Sal. 110:3; Prov. 27:11.