Ti Umuna a Cronicas 22:1-19

  • Panagsagana ni David para iti templo (1-5)

  • Bilinen ni David ni Solomon (6-16)

  • Naibilin kadagiti prinsipe a tulonganda ni Solomon (17-19)

22  Kinuna ni David: “Daytoy ti balay ni Jehova a pudno a Dios, ket daytoy ti altar a pangipaayan ti Israel iti daton a mapuoran.”+  Kalpasanna, imbilin ni David a maummong dagiti ganggannaet a residente+ iti Israel, ket pinagbalinna ida a paratikap a mangisagana ken mangsukog kadagiti bato a mausar iti panangibangon iti balay ti pudno a Dios.+  Nangisagana met ni David iti nagadu a landok a maaramid a lansa dagiti ruangan ken pagpairut, ken nakaad-adu a gambang nga uray la saanen a matimbang ti kaaduna,+  ken adu pay a kayo a sedro+ a saanen a mabilang, ta nangyeg ken David dagiti taga-Sidon+ ken Tiro+ iti nakaad-adu a troso a sedro.  Iti kasta, kinuna ni David: “Ubing pay ti anakko a ni Solomon ken awan pay kapadasanna,*+ ket nakangayngayed ti balay a maibangon para ken Jehova+ tapno agdindinamagto ti pintasna+ iti intero a daga.+ Gapuna, isaganaak kadagiti usarenna.” Nangisagana ngarud ni David iti nagadu a materiales bayat a sibibiag pay.  Pinaayabanna met ni Solomon nga anakna tapno bilinenna a mangibangon iti balay para ken Jehova a Dios ti Israel.  Imbaga ni David ken ni Solomon nga anakna: “Tarigagayan ti pusok ti mangibangon iti balay para iti nagan ni Jehova a Diosko.+  Ngem kinuna kaniak ni Jehova, ‘Nagadu a dara ti imbukbokmo ken namin-aduka a nakigubat. Saankanto a mangibangon iti balay para iti naganko,+ ta adu a dara ti imbukbokmo iti daga iti sanguanak.  Maaddaankanto iti anak a lalaki+ a mannakikappia,* ket paginanaekto iti amin a kabusorna iti aglawlawna.+ Solomon*+ ti agbalinto a naganna, ket ipaayakto ti Israel iti kappia ken talna bayat ti panagturayna.+ 10  Ibangonnanto ti balay para iti naganko.+ Agbalinto nga anakko ket siakto ti amana.+ Pagtalinaedekto ti kinaarina iti Israel iti agnanayon.’+ 11  “Ita, anakko, adda koma kenka ni Jehova, ket agballigika koma ken maibangonmo ti balay ni Jehova a Diosmo, kas imbagana maipapan kenka.+ 12  Ikkannaka koma ni Jehova iti sirib ken pannakaawat+ inton isaadnaka a mangituray iti Israel, tapno kanayon a matungpalmo ti linteg ni Jehova a Diosmo.+ 13  Iti kasta, agballigikanto no tungpalem a naimbag dagiti regulasion+ ken pangngeddeng nga imbilin ni Jehova ken ni Moises para iti Israel.+ Papigsaem ti pakinakemmo ken bumilegka. Dika agbuteng wenno agamak.+ 14  Kasta unay ti panagbannogko nga agsagana para iti balay ni Jehova. Nakaurnongak iti 100,000 a talento* a balitok ken 1,000,000 a talento a pirak ken nakaad-adu a gambang ken landok+ nga uray la saanen a matimbang ti kaaduna, nangisaganaak met kadagiti troso ken bato,+ ngem nayonamto pay. 15  Adu ti kaduam a trabahador—dagiti paratikap iti bato, parakabite iti bato,+ karpintero, ken eksperto iti amin a kita ti trabaho.+ 16  Saan a matimbang ti kaadu ti balitok, pirak, gambang, ken landok.+ Rugiamon ti trabaho, ket adda koma kenka ni Jehova.”+ 17  Kalpasanna, imbilin ni David iti amin a prinsipe ti Israel a tulonganda ni Solomon nga anakna: 18  “Adda kadakayo ni Jehova a Diosyo, ken pinaginananakayo iti amin a kabusor iti aglawlawyo. Ta tinulongannak a mangparmek kadagiti agnanaed iti daga, ken nasakupen ti daga iti sanguanan ni Jehova ken iti sanguanan ti ilina. 19  Ita, sapulenyo ni Jehova a Diosyo iti amin a puso ken kararuayo,*+ ket rugianyo a bangonen ti santuario ni Jehova a pudno a Dios,+ tapno maikabilyo ti lakasa ti tulag ni Jehova ken dagiti nasantuan nga alikamen ti pudno a Dios+ iti balay a maibangon para iti nagan ni Jehova.”+

Footnotes

Wenno “nakapuy.”
Lit., “nga addaan iti inana.”
Nagtaud iti Hebreo a sao a kaipapananna, “Talna.”
Ti 1 talento ket 34.2 kg. Kitaem ti App. B14.
Kitaem ti Glosario.