ANIA ti kaipapanan dagita a sasao? Tukoyenda ti kasasaad ti isip ken puso ti maysa. “Daydiay naparigatan” sangkapanunotna ti negatibo—maysa a panangmatmat a mamagbalin a ‘dakes,’ wenno miserable ti aldawna. Ngem daydiay “maay-ayatan ti pusona” ikagkagumaanna ti agbalin a positibo—maysa a kababalin a mangparparagsak kenkuana isu nga addaan iti “padaya a patinayon.”

Addaantay amin iti problema a mangpaliday kadatayo. Ngem adda dagiti maaramidantayo tapno agtalinaedtayo a naragsak iti laksid dagiti narigat a kasasaad. Kitaentayo ti kuna ti Biblia.

• Dimo ipalubos nga agproblemaka ita kadagiti pakaringgoran inton bigat. Kinuna ni Jesu-Kristo: “Diyo pakasikoran ti agpaay kadakayo inton bigat; ta ti sumaganad nga aldaw adda bukodna a parikut. Umdasen ti parikut ti maysa nga aldaw iti dayta nga aldaw.”—Mateo 6:34, Ti Baro a Naimbag a Damag Biblia.

• Kanayon a panunotem dagiti nasayaat a mapaspasamak kenka. Kinapudnona, no malmaldayka, mabalinmo nga isurat ken masansan a panunoten dagita. Dimo met sangkapanunot dagiti napalabas a nagkamaliam wenno dakes a naaramidam. Kalpasan a makasursuroka kadagita, mangabaruanankan. Tuladem ti maysa a drayber a taldiataldiapanna laeng ti sarming iti sangona (rearview mirror) ngem saan a nakapokus iti dayta. Laglagipem met nga ‘adda pudno a panangpakawan iti Dios.’—Salmo 130:4.

• No madagdagsenanka kadagiti pakaringgoram, ibagam dayta iti maysa a mabalin a mangliwliwa kenka. “Ti panagdanag nga adda iti puso ti maysa a tao isunto ti mamagrukob iti dayta, ngem ti naimbag a sao isu ti mamagrag-o iti dayta,” kuna ti Proverbio 12:25. Dayta a “naimbag a sao” ket mabalin nga aggapu iti maysa a kapamilia wenno mapagpiaran a gayyem—maysa a saan a managsuspetsa wenno negatibo, no di ket “agayat iti isuamin a tiempo.”—Proverbio 17:17.

Adun ti natulongan ti nainsiriban a sasao iti Biblia nga agbalin a naragragsak iti biag, uray no adda problemada. Sapay koma ta makatulong met kenka dagita nga agkakapateg a sasao.