Pagtokar iti musika a mapuyot. Nupay adda panagsusupiat no ania nga agdama nga instrumento ti musika ti katupag ti Hebreo a cha·lilʹ ken ti kapadpadana a Griego nga au·losʹ, adu nga agdama a patarus ipatarusda dagitoy a sasao kas “plauta,” maitunos iti kunaen dagiti leksikograpo. (1Sm 10:5; 1Co 14:7, AT, JB, NW, RS) Ti Hebreo a pamunganayan a sao a patien a nakaadawan ti cha·lilʹ ipasimudaagna ti “salputen; duyoken” (Isa 51:9; 53:5), ken mabalin a tumukoy iti maysa a proseso a naaramat a pangaramid iti simple a plauta, awan sabali, ti panangbutbot iti tengnga ti maysa a benneg ti runo, baston, wenno uray pay tulang wenno marfil ket kalpasanna lussokan dayta kadagiti maikanatad a kaaddayo. Ipatuldo dagiti kitikit ti Egipto nga adda iti dayta a pagilian ti nadumaduma a kita dagiti kasla plauta a pagtokar. Ti maysa a kita ket naiggaman a pairig, a ti ngiwat maidennet iti sikigan ti pagtokar; nakapatanorda met iti doble a plauta, a ti pupuyotan adda iti murdong dagiti dua a pito.

 Ti Griego nga au·losʹ agparang a naaramat met kas kadawyan nga awag a nangsaklaw iti dua a kita ti pagtokar: dagidiay agaramat iti runo iti pupuyotan, kasta met dagiti simple a kasla plauta a  pito. Ti cha·lilʹ nalabit nagbalin met a kadawyan a termino maipaay iti amin a mapuyot a pagtokar, ngem iti agdama a Hebreo, ti nagan tumukoy laeng iti plauta, ket kunaen ti nabayagen a patpatien dagiti Judio a ti cha·lilʹ iti Kasuratan isu ti plauta.

 Maysa ti plauta kadagiti kalatakan iti amin a pagtokar iti musika, a natokar kadagiti narag-o a tiempo kas kadagiti bangkete ken kasar (Isa 5:12; 30:29; 1Ar 1:40), maysa a kaugalian a tinulad dagiti ubbing iti publiko a luglugar. (Mt 11:16, 17) Natokar met dayta kadagiti tiempo ti kinaliday. Dagiti propesional a managleddaang masansan a dinanggayan dagiti pumaplauta a mangtoktokar kadagiti naleddaang a tonada.​—Mt 9:23, 24.