Panagpadpadaan iti nalinged a lugar tapno kellaat a dumarup. Tallo a Hebreo a sasao maipaay iti “panagsaneb” (ʼeʹrev, ʼoʹrev, ken ma·ʼaravʹ) ti nagtaud iti sao nga ʼa·ravʹ, a kaipapananna ti “agpadaan.” (Job 37:8; Jer 9:8; Sal 10:8; Uk 9:32) Kasta met, ti Griego a sao maipaay iti “panagsaneb” (e·neʹdra) ket nainaig iti berbo nga e·ne·dreuʹo, a kaipapananna ti “agpadaan.”​—Ara 25:3; 23:21.

 Nakasaysayaat ti namay-an ni Josue a nangsaneb iti Ai, ta iti rabii nga insaadna ti 5,000 a lallaki iti laud ti siudad, bayat a ti kaaduan a buyotna ket inwarasna met iti amianan. Iti kabigatanna, dagiti mangdepdepensa iti siudad inyadayo ida ni Josue manipud iti dayta babaen ti panagpammarangda a naabakda, iti kasta naaddaan iti gundaway dagiti managsaneb a rimmuar ket naalada ti siudad. (Jos 8:2-21) Adda dagiti naaramid a panagsaneb idi nagririri dagiti agtagtagikua iti daga ti Siquem ken ti anak ni Gideon a ni Abimelec. (Uk 9:25, 31-45) Ni Samson ket puntiria idi dagiti panagsaneb dagiti Filisteo. (Uk 16:1-12) Nangaramid ni Saul iti panagsaneb maibusor iti Amalek ket idi agangay pinabasolna ni David a nangsaneb kenkuana. (1Sm 15:5; 22:8) Ti dadduma pay a panagsaneb ket dagidiay napasamak idi nakirupak ti Israel iti tribu ni Benjamin (Uk 20:29-44), ti di nagballigi a panagsaneb ni Jeroboam maibusor iti Juda (2Cr 13:13-19), ti panagsaneb a nagresulta iti pannakariribuk kadagiti mangdarup iti Juda idi kaaldawan ni Jehosafat (2Cr 20:22, 23), dagidiay panagsaneb a nadakamat a pangdeskribir iti pannakarba ti Jerusalem (Un 4:19), ken ti panagsaneb nga imbilin ni Jehova maibusor iti Babilonia (Jer 51:12). Sinalakniban ni Jehova dagiti nagsubli a destiero a Judio kadagiti pannakasanebda.​—Esd 8:31; kitaenyo ti GUBAT.

 Ti Hebreo a nombre nga ʼeʹrev, a kaipapananna ti “panagsaneb,” ket naaramat a mangiladawan kadagiti taktika ti panaganup. (Job 37:8; 38:40) Ti Hebreo a berbo nga ʼa·ravʹ ket piguratibo ti pannakaaramatna a mangiladawan iti maysa a balangkantis a mangpadpadaan kadagiti lallaki(Pr 7:12; 23:28) ken dagiti taktika dagidiay nadangkes a mangsaneb iti awanan basol kasta met kadagiti nalinteg a tattao. (Sal 10:9; Pr 1:11, 18; 12:6; 24:15; Mik 7:2; idiligyo ti Job 31:9.) Iti Israel, dusa nga ipapatay ti maipataw iti tao a napaneknekan a nakapapatay kalpasan a pinadpadaananna ti padana a tao ket pinapatayna.​—De 19:11, 12.

 Nangisikat iti panagsaneb ti nasurok nga 40 a Judio maibusor ken apostol Pablo ket “sinapataanda iti bagbagida ti maysa a lunod,” ngem saanda a nagballigi gapu iti kaanakan ni Pablo.​—Ara 23:12-35.