Aramid 26:1-32
26 Ni Agripa+ kinunana ken Pablo: “Mapalubosanka nga agsao maipaay iti bagim.” Idin inunnat ni Pablo ti imana+ ket kinunana kas depensana:+
2 “Maipapan iti amin a bambanag a nangakusaran+ kaniak dagiti Judio, Ari Agripa, ibilangko a naragsakak ta iti sanguanam agdepensaak itoy nga aldaw,
3 nangnangruna ta nalaingka unay kadagiti amin a kaugalian+ kasta met kadagiti panagsusubang iti tengnga dagiti Judio. Gapuna ipakaasik kenka a denggennak a siaanus.
4 “Kinapudnona, no maipapan iti wagas ti panagbiag+ manipud pay kinaagtutubo a nagbiagak nanipud idi damo iti tengnga ti nasionko ken idiay Jerusalem, amin dagiti Judio
5 a sigud a makaam-ammo kaniak manipud idi damo ammoda, no tarigagayanda koma a saksian, a maitunos iti kaiingetan a sekta+ ti porma ti panagdaydayawmi nagbiagak a Fariseo.+
6 Ket kaskasdi nga ita maipaay iti namnama+ iti kari+ nga inaramid ti Dios kadagidi ammami agtaktakderak a kas naayaban tapno maukom;
7 idinto ta ti sangapulo ket dua a tribumi namnamaenda ti makagteng iti kaitungpalan daytoy a kari babaen iti nasged unay a panangipaay iti sagrado a panagserbi kenkuana iti rabii ken aldaw.+ Maipapan itoy a namnama akusarandak+ dagiti Judio, O ari.
8 “Apay a maipato a di nakapappapati kadakayo a ti Dios ibangonna dagiti natay?+
9 Siak, a maysa, pudno a pinanunotko iti bagik a rebbeng nga agaramidak iti adu nga aramid nga ibubusor maikaniwas iti nagan ni Jesus a Nazareno;
10 nga, iti kinapudnona, inaramidko idiay Jerusalem, ket adu kadagiti sasanto ti impupokko kadagiti pagbaludan,+ yantangay immawatak iti autoridad manipud iti panguluen a papadi;+ ket idi mapapataydan, impaayko ti butosko a maibusor kadakuada.
11 Ket babaen ti panangdusa kadakuada iti adu a daras kadagiti amin a sinagoga+ pinadasko a puersaen ida nga agtallikud; ket gapu ta makaungetak unay idi a maibusor kadakuada, indadanesko ida uray pay agingga kadagiti siudad nga adda iti ruar.
12 “Iti baet dagitoy a panagregget idi nga agdaldaliasatak a mapan idiay Damasco+ nga addaanak iti autoridad ken rebbengen manipud iti panguluen a papadi,
13 nakakitaak iti tengnga ti aldaw idiay dalan, O ari, iti lawag a naranraniag ngem iti init, a naggilap manipud langit iti aglawlawko ken iti aglawlaw dagidiay agdaldaliasat a kimmuyog kaniak.+
14 Ket idi napasagkami amin iti daga nakangngegak iti timek a kunana kaniak iti Hebreo a pagsasao, ‘Saulo, Saulo, apay nga idaddadanesnak? Ti agtultuloy a panangkugtar kadagiti tirad a pangabug parigatennaka.’+
15 Ngem kinunak, ‘Siasinoka, Apo?’ Ket kinuna ti Apo, ‘Siak ni Jesus, nga idaddadanesmo.+
16 Nupay kasta, bumangonka ket agtakderka kadagita sakam.+ Ta daytoy ti panggep a nagparangak kenka, tapno pilienka kas maysa nga agserbi ken maysa a saksi+ agpadpada iti bambanag a nakitam ken iti bambanag nga ipakitakto kenka maipapan kaniak;
17 bayat nga ispalenka iti daytoy nga ili ken kadagiti nasion, a pangibaonak kenka,+
18 tapno luktam dagiti matada,+ tapno ibaw-ingmo ida manipud sipnget+ nga agturong iti lawag+ ken manipud iti kinaturay ni Satanas+ nga agturong iti Dios, tapno awatenda ti pannakapakawan dagiti basolda+ ken ti maysa a tawid+ iti tengnga dagidiay nasantipikar+ babaen iti pammatida kaniak.’
19 “Gapuna, Ari Agripa, saanak a simmukir iti nailangitan a buya,+
20 no di ket agpadpada kadagidiay adda idiay Damasco+ nga umuna ken kadagidiay adda idiay Jerusalem,+ ken iti intero a pagilian ti Judea, ken kadagiti nasion+ indanonko ti mensahe nga agbabawida ket bumaw-ingda iti Dios babaen iti panagaramid kadagiti aramid a maitutop iti panagbabawi.+
21 Maigapu kadagitoy a banag kinemmegdak dagiti Judio idiay templo ket ginandatdak a papatayen.+
22 Nupay kasta, agsipud ta nagun-odak ti tulong+ a naggapu iti Dios agtultuloy a saksiak agpadpada dagiti babassit ken dadakkel agingga itoy nga aldaw, ngem awan sasawek malaksid iti bambanag a sinao dagiti Mammadto+ kasta met ni Moises+ a maaramidto,
23 a ti Kristo agsagaba+ ket, kas umuna a mapagungar+ kadagiti natay, ibunannagna ti lawag+ agpadpada iti daytoy nga ili ken kadagiti nasion.”+
24 Ita bayat a sasawenna dagitoy a bambanag kas depensana, kinuna ni Festo iti natbag a timek: “Agmauyongka,+ Pablo! Ti adu nga adal pagmauyongennaka!”
25 Ngem kinuna ni Pablo: “Saanak nga agmauyong, Natan-ok Unay a Festo, no di ket mangyeb-ebkasak iti sasao ti kinapudno ken ti kinasimbeng ti panunot.
26 Iti kinapudnona, ti ari a kasasaok a buyogen ti wayawaya nga agsao pagaammona unay ti maipapan kadagitoy a banag; ta naguyugoyak nga awan maysa kadagitoy a banag ti makaliklik iti panangammona, ta daytoy a banag saan a naaramid iti suli.+
27 Mamatika kadi, Ari Agripa, kadagiti Mammadto? Ammok a mamatika.”+
28 Ngem ni Agripa kinunana ken Pablo: “Iti apagbiit a tiempo maguyugoynak nga agbalin a Kristiano.”
29 Gapu itoy kinuna ni Pablo: “Tarigagayak iti Dios nga uray iti apagbiit a tiempo wenno iti mabayag a tiempo saan laeng a sika no di ket kasta met dagidiay amin a dumdumngeg kaniak ita nga aldaw agbalinda koma a tattao a kas met kaniak, malaksid kadagitoy a kawar.”
30 Ket timmakder ti ari ken kasta met ti gobernador ken ni Bernice ken dagiti lallaki a situtugaw a kaduada.
31 Ngem bayat a pumampanawda nangrugida a nagsasarita iti maysa ken maysa, a kunkunada: “Daytoy a tao awan ar-aramidenna a maikari iti ipapatay+ wenno pannakaparaut.”
32 Mainayon pay, ni Agripa kinunana ken Festo: “Daytoy a tao naluk-atan koman no saan a nagapelar+ ken Cesar.”
