Aramid 22:1-30
22 “Lallaki, kakabsat+ ken amma, denggenyo ita ti depensak+ kadakayo.”
2 (Ala ket, idi mangngegda nga agbitbitla kadakuada iti Hebreo a pagsasao,+ ad-adda a nagulimekda, ket kinunana:)
3 “Maysaak a Judio,+ a nayanak idiay Tarso ti Cilicia,+ ngem nagadalak iti daytoy a siudad iti sakaanan ni Gamaliel,+ nasursuruanak sigun iti kinainget+ ti Linteg dagiti inapo, a naregtaak+ iti Dios a kas kadakayo amin itoy nga aldaw.
4 Ket indadanesko daytoy a Dalan agingga ken patay,+ a rineppetko ken inyawatko iti pagbaludan+ agpadpada dagiti lallaki ken babbai,
5 kas iti masaksian kaniak agpadpada ti nangato a padi ken ti intero nga ummong dagiti lallakay.+ Manipud kadakuada inkagumaak met ti nangala kadagiti surat+ a maipaay kadagiti kakabsat idiay Damasco, ket mapmapanak idin tapno sirereppet nga iyeg met ditoy Jerusalem dagidiay adda sadiay tapno madusada.
6 “Ngem bayat nga agbambaniagaak idi ken umas-asidegak idiay Damasco, iti agarup tengnga ti aldaw, pagammuan manipud langit maysa a dakkel a lawag ti nagsilnag iti intero nga aglawlawko,+
7 ket napasagak iti daga ket nakangngegak iti timek a kunana kaniak, ‘Saulo, Saulo, apay nga idaddadanesnak?’+
8 Insungbatko, ‘Asinoka, Apo?’ Ket kinunana kaniak, ‘Siak ni Jesus a Nazareno, nga idaddadanesmo.’+
9 Ita dagiti lallaki a naikuyog kaniak+ nakitada, iti kinapudnona, ti lawag ngem saanda a nangngeg ti timek daydiay agsasao kaniak.+
10 Iti kasta kinunak, ‘Ania ti aramidek,+ Apo?’ Kinuna kaniak ti Apo, ‘Tumakderka, mapanka idiay Damasco, ket sadiay maibaganto kenka maipapan iti amin a banag a naituding nga aramidem.’+
11 Ngem yantangay awan ti aniaman a makitak gapu iti dayag dayta a lawag, dimtengak idiay Damasco, a kinibkibindak dagidi naikuyog kaniak.+
12 “Ita ni Ananias, maysa a lalaki a nadayaw mayannurot iti Linteg, naimbag ti damagna+ kadagiti amin a Judio nga agnanaed sadiay,
13 immay kaniak ket, idi nagtakder iti sibayko, kinunana kaniak, ‘Saulo, kabsat, sumublin ti panagkitam!’+ Ket kimmitaak kenkuana iti dayta met laeng nga oras.
14 Kinunana, ‘Ti Dios dagidi ammatayo+ pinilinaka+ tapno maammuam ti pagayatanna ken tapno makitam+ Daydiay nalinteg+ ken tapno mangngegmo ti timek ti ngiwatna,+
15 agsipud ta agbalinka a saksi maipaay kenkuana kadagiti amin a tattao maipapan iti bambanag a nakita ken nangngegmo.+
16 Ket ita apay nga agtaktakka? Tumakderka, agpabautisarka+ ket ugasam+ dagiti basolmo babaen ti iyaawagmo iti naganna.’+
17 “Ngem idi nakasubliakon ditoy Jerusalem+ ket agkarkararagak idiay templo, naimayengak+
18 ket isu nakitak a kunkunana kaniak, ‘Pardasam ket darasem ti rummuar manipud Jerusalem, agsipud ta saandanto nga umanamong+ iti pangsaksim maipapan kaniak.’
19 Ket kinunak, ‘Apo, isuda pagaammoda unay a dagidiay mamati kenka ibalbaludko+ idi ken sapsaplitek iti tunggal sinagoga;+
20 ket idi maibuybuyat ti dara ni Esteban+ a saksim, siak sitatakderak met iti asideg ket uman-anamongak+ ken bambantayak dagiti makinruar a kawes dagidiay mangpappapatay kenkuana.’
21 Ket kaskasdi a kinunana kaniak, ‘Mapankan, agsipud ta ibaonka kadagiti nasion iti adayo.’”+
22 Itan nagim-imdengda kenkuana agingga iti daytoy a sao, ket impigsada dagiti timekda, a kunkunada: “Ikkatem ti kasta a tao manipud iti daga, ta saan a maikari nga agbiag!”+
23 Ket agsipud ta agik-ikkisda idi ken ipallapalladawda dagiti makinruar a kawesda ket agipurpuruakda iti tapok iti angin,+
24 imbilin ti komandante ti militar nga isu maiserrek iti kuartel dagiti soldado ket kinunana a rebbeng a mausig babaen ti pannakasaplit, tapno maammuanna a naan-anay no ania ti gapuna nga agpukpukkawda+ a maibusor kenkuana iti kastoy a pamay-an.
25 Ngem idi isu naunnatdan a maipaay iti pannakasaplit, kinuna ni Pablo iti opisial ti buyot a sitatakder sadiay: “Nainkalintegan kadi a saplitenyo ti tao a taga Roma+ ken di nakondenar?”
26 Ala ket, idi nangngeg daytoy ti opisial ti buyot, napan iti komandante ti militar ket nagipadamag, a kunkunana: “Ania ti pangpanggepem nga aramiden? Ay ket, daytoy a tao ket taga Roma.”
27 Gapuna immasideg ti komandante ti militar ket kinunana kenkuana: “Ibagam kaniak, Taga Romaka kadi?”+ Kinunana: “Wen.”
28 Insungbat ti komandante ti militar: “Ginatangko iti dakkel a gatad ti kuarta dagitoy a kalintegan kas umili.” Kinuna ni Pablo: “Ngem nayanakak a mismo+ kadagita.”
29 Ngarud, madagdagus a pimmanaw kenkuana dagiti lallaki a mangusig koman kenkuana buyogen ti pammarigat; ket ti komandante ti militar nagbuteng idi masinunuona nga isu ket taga Roma+ ken pinarautanna.
30 Gapuna, iti sumaganad nga aldaw, gapu ta tinarigagayanna a maammuan a sigurado no apay nga isu ak-akusaren idi dagiti Judio, winarwaranna ket imbilinna nga aguummong ti panguluen a papadi ken ti intero a Sanhedrin. Ket imbabana ni Pablo ket pinagtakderna iti tengngada.+
