Aramid 14:1-28
14 Itan idiay Iconio+ simrekda a sangsangkamaysa iti sinagoga+ dagiti Judio ket nagsaoda iti pamay-an a dakkel nga umariwekwek agpadpada dagiti Judio ken dagiti Griego+ ti nagbalin a manamati.
2 Ngem dagiti Judio a di namati sinulbogda+ ken siraranggas nga inimpluensiaanda dagiti kararua ti tattao iti nasnasion maibusor kadagiti kakabsat.+
3 Gapuna nangbusbosda iti adu a tiempo iti panagsao a situtured babaen ti autoridad ni Jehova, a nangsaksi iti sao ti di kaikarian a kinamanangngaasina babaen ti panangipalubosna a dagiti pagilasinan ken dagiti tanda mapasamakda babaen kadagiti imada.+
4 Nupay kasta, ti umariwekwek iti siudad nabingay, ket ti sumagmamano immayonda kadagiti Judio ngem ti dadduma immayonda kadagiti apostol.
5 Itan idi a ti naranggas a panaggandat naaramid iti biang agpadpada dagiti tattao iti nasnasion ken dagiti Judio agraman dagiti agturayda, tapno sikukuspag a tratuen ida ken uboren ida iti batbato,+
6 isuda, idi napakaammuanda maipapan iti dayta, nagkamangda+ kadagiti siudad ti Licaonia, Listra ken Derbe ken iti pagilian nga adda iti aglikmut;
7 ket sadiay intultuloyda nga indeklara ti naimbag a damag.+
8 Ita idiay Listra adda idi a situtugaw ti maysa a lalaki a baldado kadagiti sakana, pilay manipud aanakan ni inana,+ ket saan a nagna uray kaano.
9 Daytoy a lalaki inim-imdenganna ni Pablo nga agsasao, nga, idi sipapasnek a minatmatanna ken idi nakitana nga isu addaan pammati+ a mapaimbag,
10 kinunana iti natbag a timek: “Tumakderka a sililinteg kadagita sakam.” Ket limmagto ket nangrugi a nagna.+
11 Ket dagiti bunggoy, idi nakitada ti inaramid ni Pablo, impigsada dagiti timekda, a kunkunada iti pagsasao a Licaonia: “Dagiti didios+ nagbalinda a kas tattao ket bimmabada kadatayo!”
12 Ket ni Bernabe inaw-awaganda iti Zeus, ngem ni Pablo Hermes, yantangay isu daydiay mangidadaulo iti panagsao.
13 Ket ti padi ni Zeus, a ti templona adda iti sanguanan ti siudad, nangyeg kadagiti toro ken kadagiti arkos a balangat idiay ruruangan ket tartarigagayanna idi ti mangidaton kadagiti sakripisio+ a kaduana dagiti bunggoy.
14 Nupay kasta, idi nangngeg dayta dagiti apostol a da Bernabe ken Pablo, rinay-abda dagiti makinruar a kawesda ket dinardarasda ti nagturong iti bunggoy, nga agpukpukkawda
15 ken kunkunada: “Lallaki, apay nga ar-aramidenyo dagitoy a banag? Tattaokami met+ nga addaan kadagiti isu met laeng a pagkapuyan+ a kas kadakayo, ket idekdeklarami kadakayo ti naimbag a damag, tapno agbaw-ingkayo manipud kadagitoy ubbaw+ a banag nga agturong iti Dios a sibibiag,+ a nangaramid iti langit+ ken iti daga ken iti baybay ken iti amin a bambanag nga adda kadakuada.
16 Kadagiti napalabas a kaputotan pinalubosanna dagiti amin a nasion a magnada kadagiti dalanda,+
17 nupay, iti kinapudnona, saanna a binay-an nga awan mangsaksi iti bagina iti panagaramidna ti naimbag,+ nga inikkannakayo kadagiti tudo+ manipud langit ken kadagiti nabunga a panawen, a pinunnona a naan-anay dagiti pusoyo iti taraon ken ragsak.”+
18 Ket kaskasdi nga iti panangisaoda kadagitoy a banag nganngani saanda a napawilan dagiti bunggoy iti panagisakripisioda kadakuada.
19 Ngem dimteng dagiti Judio manipud Antioquia ken Iconio ket ginuyugoyda dagiti bunggoy,+ ket inuborda ni Pablo ken inulodda iti ruar ti siudad, nga impagarupda a natayen.+
20 Nupay kasta, idi linikmut dagiti adalan, timmakder ket simrek iti siudad. Ket iti sumaganad nga aldaw pimmanaw a kaduana ni Bernabe nga agturong idiay Derbe.+
21 Ket kalpasan ti panangideklarada ti naimbag a damag iti dayta a siudad ken panangaramidda iti adu nga adalan,+ nagsublida idiay Listra ken idiay Iconio ken idiay Antioquia,
22 a pinabpabilegda dagiti kararua dagiti adalan,+ a pinarparegtada ida nga agtalinaed iti pammati ket kunkunada: “Masapul a sumrektayo iti pagarian ti Dios babaen iti adu a rigat.”+
23 Mainayon pay, nangdutokda kadagiti lallakay+ maipaay kadakuada iti tunggal kongregasion ket, idi nangidatonda iti kararag a buyogen dagiti panagayunar,+ intalekda ida ken Jehova+ a kenkuana nagbalinda a manamati.
24 Ket limmabasda idiay Pisidia ket dimtengda idiay Pamfilia,+
25 ket, kalpasan ti panangisaoda iti sao idiay Perga, simmalogda idiay Atalia.
26 Ket manipud sadiay naglayagda nga agturong idiay Antioquia,+ a sadiay a naitalekda iti di kaikarian a kinamanangngaasi ti Dios maipaay iti trabaho a naan-anay a naaramidanda.+
27 Idi nakagtengdan ket naurnongdan a sangsangkamaysa ti kongregasion, insalaysayda+ ti adu a bambanag nga inaramid ti Dios babaen kadakuada, ket linuktannan kadagiti nasion ti ruangan nga agturong iti pammati.+
28 Gapuna saan a bassit a tiempo ti binusbosda a kaduada dagiti adalan.
