1-3. Jugu juman lo be an bɛɛ kɔ, ani mun na an jigi bena tugu n’an be Bibulu ka fɔta lajɛ?

I KA MIIRI k’a filɛ, i be bolila i jugu fariman dɔ ɲɛ. A fanga ka bon n’i ye ani a seen ka teli ka tɛmɛ i kan. I b’a lɔn ko a tɛ hinɛ fewu sabu a ye i teri dɔw faga i ɲɛɛ na. I b’i seko bɛɛ kɛ ka ɲini ka boli k’a dan, nka a be surunya i la dɔrɔn. A be komi jigiya si t’i la. Nka, kisibaga dɔ be bari ka bɔ i ɲɛɛ fɛ. A fanga ka bon n’i jugu ta ye fɔɔ ka taga ka na, ani a b’a fɔ ko a bena i dɛmɛ. O be i jigi tugu dɛ!

² Faan dɔ fɛ, o jugu ɲɔgɔn be e gwɛnna tiɲɛn na. A be an bɛɛ lo kɔ. An y’a ye kalansen tɛmɛnen na ko Bibulu be saya weele ko an jugu. An si tɛ se k’an yɛrɛ tanga a ma. An caamanba y’a ye ko o jugu ye an diyanye mɔgɔ dɔw niin bɔsi u la. Nka, see be Jehova ye saya kan fɔɔ ka taga ka na. Jehova ye Kisibaga kanutigi ye min y’a yira ka ban ko a be se o jugu nin kɔrɔ, o min ye saya ye. A yɛrɛ ye layidu ta ko a bena a ban pewu-pewu. Bibulu b’a fɔ ko: “Jugu laban min bena cɛn, o ye saya ye.” (1 Korɛntikaw 15:26). O ye kibaro duman ye dɛ!

³ An k’a filɛ dɔɔni an jugu, saya, be nɔɔ min to an kan n’a ye an ka mɔgɔ dɔ bɔsi an na. O bena an dɛmɛ ka koo  dɔ faamu min bena an dusu saalo. Jehova ye layidu ta ko suuw bena kunu (Ezayi 26:19). U bena kɔsegi ɲɛnamaya la. O lo ye suu kununni jigiya ye.

4. (a) Yezu ka mɔgɔ sɔbɛ dɔ saya ye min kɛ a la, mun na o b’an dɛmɛ ka Jehova ka dusukunnataw lɔn? (b) Yezu ye teriya don ni jɔn lo ye?

⁴ I ka mɔgɔ sɔbɛ dɔ delila ka sa wa? A be se ka gwɛlɛya i ma k’o dimi, o dusukasi n’o jigitigɛ muɲu. O ɲɔgɔn mana an sɔrɔ, an mako b’a la ka dusu saalo ɲini Ala ka Kuma kɔnɔ (2 Korɛntikaw 1:3, 4). Bibulu b’an dɛmɛ ka Jehova ni Yezu ka dusukunnataw lɔn saya koo la. Yezu ka kɛcogow tun be a Faa ka jogow yira cogo dafalen na. A y’a lɔn saya be dusukasi min bila mɔgɔ la (Zan 14:9). A tun mana taga Jerusalɛm, a tun be taga bɔ Lazari n’a kɔrɔmusow Marita ni Mariyamu ye Betani dugu la, Jerusalɛm gɛrɛ fɛ. U nana kɛ teri sɔbɛw ye. Bibulu b’a fɔ ko: “Marita, n’a dɔgɔmuso, ni Lazari koo tun ka di Yezu ye.” (Zan 11:5). Nka, an y’a ye kalansen tɛmɛnen na ko Lazari sara.

5, 6. (a) Tuma min na Yezu ye Lazari somɔgɔw n’a teriw kasitɔ ye, o ye mun lo kɛ a la? (b) Mun na Yezu ka dusukasi b’an jigi tugu?

⁵ Yezu tericɛ saya ye mun lo kɛ a la? Bibulu b’a lakali ko Lazari somɔgɔw n’a teri minw tun be sukasi la, Yezu tagara fara u kan. A ye u ye minkɛ, a dusu tiɲɛna kosɔbɛ. “O y’a dusu kasi, u makari y’a minɛ.” Bibulu b’a fɔ ko, o kɔ, “Yezu kasira.” (Zan 11:33, 35). Yezu dusu kasira minkɛ, yala o b’a yira ko jigiya si tun t’a la wa? Ayi dɛ! Tiɲɛn na, Yezu tun b’a lɔn ko koo kabakoman dɔ tun bena kɛ (Zan 11:3, 4). O bɛɛ n’a ta, saya dusukasi y’a sɔrɔ.

⁶ Faan dɔ fɛ, Yezu ka dusukasi b’an jigi tugu. O b’an kalan ko saya ka gwo Yezu n’a Faa Jehova ye. Nka, see be Jehova ye k’o jugu nin kɛlɛ ani ka see sɔrɔ a kan! An k’a filɛ Jehova ye see min di Yezu ma.

7, 8. Adamadenw ka jatiminɛ na, mun na a be komi jigiya si tun tɛ yen tugun Lazari koo la? Nka, Yezu ye mun lo kɛ?

⁷ Lazari suu tun donna kuluwo dɔ kɔnɔ. Kabakuru min tun kɛra k’a datugu, Yezu ko u k’o ta ka bɔ yen. Marita ma sɔn, sabu tile naani kɔ, n’a sɔrɔ Lazari suu tun y’a daminɛ ka toli (Zan 11:39). Adamadenw ka jatiminɛ na, jigiya si tun tɛ yen tugun.

⁸ U ye kabakuru kolonkolon ka bɔ yen. O kɔ, Yezu kulera ni kanba ye ko: “Lazari, wuli ka bɔ.” Mun lo kɛra do? “Lazari min tun sara, a kununna ka bɔ kaburu la.” (Zan 11:43, 44). Mɔgɔ minw tun be yen, i ka miiri k’a filɛ u ɲagalila cogo min na! U tun b’a lɔn ko u balimacɛ, u teri, wala u sigiɲɔgɔn Lazari tun sara. Nka a filɛ, cɛɛ min koo tun ka di u ye, ale yɛrɛ lo tun lɔnnen be yen u cɛma tugun. A tun be u ɲɛɛ na i ko siko koo lo. Siga t’a la, u caaman ɲagalila k’i meleke a la. Nin tun ye see sɔrɔli daan ye saya kan dɛ!

9, 10. (a) Mɔgɔ min ye see di Yezu ma ka Lazari lakunu, Yezu y’o tigi yira cogo di? (b) Bibulu be suu kununni minw kofɔ, nafa juman b’a la k’o lakalitaw kalan?

⁹ Yezu m’a fɔ ko ale yɛrɛ ka setigiya lo ye o kabakoba kɛ. A ye delili min kɛ ka sɔrɔ ka Lazari weele, a y’a yira ka gwɛ o kɔnɔ ko Jehova lo kɛra o suu kununni sababu ye (Zan 11:41, 42). Jehova siɲɛ fɔlɔ tun tɛ ka baara kɛ n’a ka fanga ye nin cogo la. Suu kununni kɔnɔntɔn minw kofɔra Ala ka Kuma kɔnɔ, Lazari ta ye u la kelen lo ye. * Ninsɔndiya koo lo k’o lakalitaw kalan ani k’u sɛgɛsɛgɛ. U b’an kalan ko Jehova tɛ mɔgɔ woloma sabu a ye mɔgɔ sifaw bɛɛ lo lakunu: denmisɛnw ni balikuw, cɛɛw ni musow, Israɛldenw ni siya wɛrɛ mɔgɔw. O koow ye  mɔgɔw ninsɔndiya dɛ! Ɲɛyirali fɛ, tuma min na Yezu ye sungurunin dɔ suu lakunu, a wolobagaw “kabakoyara ka dama tɛmɛ.” (Mariki 5:42). Jehova ye ninsɔndiya sababu di u ma, u ma ɲinɛ min kɔ abada.

¹⁰ Ayiwa, Yezu ye mɔgɔ minw lakunu, u labanna ka sa tugun. Yala o kɔrɔ ko kuun tun t’a la a k’u lakunu wa? Ayi dɛ. O Bibulu lakalitaw be kalan jɔnjɔn dɔw tiɲɛntigiya yira ani u be jigiya di an ma.

11. Lazari lakununi koo be Waajulikɛla 9:5 tiɲɛntigiya yira cogo di?

¹¹ Bibulu b’a fɔ ko “minw sara ka ban, olu tɛ foyi lɔnna tugu.” U tɛ niin na tugun, ani u tɛ koo kala ma yɔrɔ si la. Lazari ka koo b’o tiɲɛntigiya yira. Lazari suu kununni kɔ, yala a ye sankolola koow lakali ka mɔgɔw kabakoya wa? Wala, a ye tasuma yɔrɔ dɔ koo lakali ka mɔgɔw jaa tigɛ wa? Ayi. O kuma ɲɔgɔn si ma bɔ Lazari daa la min be sɔrɔ Bibulu kɔnɔ. A ye tile naani minw kɛ saya la, a tun tɛ “foyi lɔnna tugu.” (Waajulikɛla 9:5). A tun be sinɔgɔra saya kɔnɔ dɔrɔn le.—Zan 11:11.

12. Mun na an be se ka la a la ko Lazari suu kununa tiɲɛn-tiɲɛn na?

¹² Lazari lakununi koo b’an kalan fana ko suu kununni ye tiɲɛnko ye, nsiirin tɛ. Yezu ye Lazari lakunu seere caaman ɲɛɛ na. Hali diinan kuntigi minw tun be Yezu kɔniya, olu m’o kabako sɔsɔ. Nka u y’a fɔ ko: “An bena mun le kɛ? Bari cɛɛ nin [ Yezu] be kabako caaman kɛ.” (Zan 11:47). Mɔgɔ caaman tagara Lazari suu kununni filɛ. O sababu fɛ, u caaman limaniyara Yezu la. Lazari kɛra u fɛ dalilu barikaman ye min b’a yira ko Ala lo ye Yezu ci. Lazari suu kununni koo tun kɛra wulibali ye fɔɔ Yahutuw ka diinan kuntigi dusu gwɛlɛ dɔw y’a ɲini ka Yezu ni Lazari fila bɛɛ faga.—Zan 11:53; 12:9-11.

13. Mun kama an lanen b’a la ko see be Jehova ye ka suuw lakunu tiɲɛn-tiɲɛn na?

 ¹³ Yala a bɛnnen lo mɔgɔ ka sɔn a la ko suu kununni ye tiɲɛnko ye wa? Siga t’o la, sabu Yezu y’a fɔ ko “minnu bɛ kaburuw kɔnɔ” olu bena kunu (Zan 5:28, ABM ). Jehova lo ye niin Danbaga ye. Yala a ka gwɛlɛ an ka la a la ko see be Jehova ye ka segi ka niin di mɔgɔ salen ma wa? Ayiwa, see min be Jehova ye k’a hakili jigi koow la, a be bɔ o lo la. Yala a be se k’a hakili jigi an diyanye mɔgɔw la minw sara wa? Sankolo falen be lolo miliyari caamanba la, nka Ala ye tɔgɔ di u kelen-kelen bɛɛ ma! (Ezayi 40:26). O kama, see be Jehova Ala ye k’a hakili jigi an diyanye mɔgɔ salenw cogo kelen-kelen bɛɛ la. A yɛrɛ labɛnnen lo k’u lakunu.

14, 15. Ka kɛɲɛ ni Zɔbu ka kumaw ye, Jehova be mun miiri suu kununni koo la?

¹⁴ Nka, Jehova be mun miiri suu kununni koo la? Bibulu b’a fɔ ko a kɔrɔtɔlen lo ka suuw kunu. Cɛɛ kantigi Zɔbu ye ɲiningali kɛ ko: “Adamaden min sara, o be se ka kunun tugu wa?” Zɔbu tun b’a fɛ k’a fɔ ko a bena kɔnɔni kɛ kaburu kɔnɔ fɔɔ Ala k’a hakili jigi ale koo la. A y’a fɔ Jehova ye ko: “Ni e ye ne wele, n be i jaabi. Ne yeko nigɛ bena i minɛ, ne min ye i ka danfɛn ye.”—Zɔbu 14:13-15.

¹⁵ I ka miiri k’a filɛ! A nege be Jehova la kosɔbɛ ka suuw lakunu. K’a lɔn ko suuw lakununi nege be Jehova la, yala o tɛ i jigi tugu wa? Nka Bibulu be mun lo fɔ suu kununni nata koo la do? Jɔn lo bena lakunu, ani o tigiw bena lakunu yɔrɔ juman na?

16. Suuw bena lakunu ka ɲɛnamaya kɛ cogoya juman na?

¹⁶ Bibulu be suu kununni minw kofɔ, u b’an dɛmɛ ka koo caaman lɔn suu kununni nata koo la. Minw tun lasegira ɲɛnamaya la, olu lakununa dugukolo kan yan ka di u diyanye mɔgɔw ma. Suu kununni nata bena kɛ o  cogo kelen na, a yɛrɛ bena fisaya ka tɛmɛ o kan. An y’a ye kalansen 3nan na ko Ala ka sagonata ye ka dugukolo kuru bɛɛ kɛ alijɛnɛ ye. O kama, suuw tɛna lakunu duniɲa dɔ kɔnɔ min falen be marifakɛlɛw, kojugukɛ ni banaw la. U bena se ka ɲɛnamaya kɛ fɔɔ abada dugukolo kan hɛɛrɛ ni ɲɛsuma na.

17. Jɔn ni jɔn lo bena lakunu ani u bena caya wa?

¹⁷ Jɔn lo bena lakunu? Yezu y’a fɔ ko “minw bɛɛ be kaburuw kɔnɔ, olu bena a [ Yezu] kaan mɛn ani u bena bɔ yen.” (Zan 5:28, 29, NW ). Yirali 20:13 (ABM ) fana b’a fɔ ko: “Su minnu bɛ kɔgɔji kɔnɔ, o ye olu labɔ. Saya ni Hadɛsi fana ye u taw labɔ.” “Hadɛsi” ɲɛsinna kaburu lo ma, adamadenw suu be don yɔrɔ min na. (Gafe nin ɲɛɛ 212-213 fana lajɛ.) O kaburu bena lakolonya. Mɔgɔ miliyari caaman minw be lafiɲɛna yen, u bena kɔsegi ɲɛnamaya la. Ciden Pol y’a fɔ ko: “Suu kununni bena kɛ, mɔgɔ tilennenw fara mɔgɔ tilenbaliw kan.” (Kɛwaliw 24:15, NW ). O kuma kɔrɔ ko di?

18. “Mɔgɔ tilennenw” minw bena lakunu, olu ye jɔn ni jɔn lo ye? O jigiya be mun lo kɛ e la?

¹⁸ O “mɔgɔ tilennenw” cɛma, Bibulu be caaman kofɔ minw ye ɲɛnamaya kɛ ka kɔn Yezu nali ɲɛ dugukolo kan. I be se ka miiri Ibrayima, Sara, Musa, Uruti, Ɛsitɛri ani mɔgɔ caaman wɛrɛw koo la. Eburuw ka kitabu sapitiri 11nan be kuma o cɛɛw ni o muso kantigiman dɔw koo la. Nka Jehova sagokɛla minw be sa an ka wagati la, olu fana be o “mɔgɔ tilennenw” cɛma. Suu kununni jigiya be se k’an hɔɔrɔnya ka bɔ saya ɲɛsiran na.—Eburuw 2:15.

19. “Mɔgɔ tilenbaliw” ye jɔn lo ye, ani Jehova bena sababu juman di u ma a ka ɲumanya kosɔn?

¹⁹ Nka minw ma Jehova lɔn ka ye ani o kosɔn u ma baara kɛ a ye wala u ma kolo a ye do? Ala tɛna ɲinɛ o “mɔgɔ tilenbaliw” miliyari caaman kɔ. Olu fana bena lakunu, ani u bena wagati sɔrɔ ka tiɲɛn Ala lɔn ani ka  baara kɛ a ye. Saan waa kelen kɔnɔ, suuw bena lakunu ani sababu bena di u ma ka jɛn ni adamaden kantigiw ye ka baara kɛ Jehova ye dugukolo kan. O bena kɛ wagati ɲuman ye dɛ! Bibulu be o wagati weele ko Kiti Loon. *

20. Zeyɛni ye mun lo ye, ani jɔn lo bena kɛ yen?

²⁰ Yala o kɔrɔ ko adamaden minw ye ɲɛnamaya kɛ ka tɛmɛ, u bɛɛ lo bena lakunu wa? Ayi. Bibulu b’a fɔ ko mɔgɔ salen dɔw be “jahanama [zeyɛni, NW ]” kɔnɔ (Luka 12:5). Zeyɛni tun ye ɲamaɲama bɔnyɔrɔ dɔ tɔgɔ ye Jerusalɛm dugu kɔrɔ kɔfɛ. U tun be ɲamaɲama ani suu dɔw jɛni yen. U tun be mɔgɔ minw suu fili yen, Yahutuw tun b’a jati k’u man kan ni sutarali ni suu kununni ye. O kama, zeyɛni tun ye halakili banbali tagamasiɲɛ ye min bɛnnen lo. Hali ni Yezu bena kiti tigɛ mɔgɔ ɲɛnamaw ni suuw kan, Jehova lo ye a sigi o kiti baara la (Kɛwaliw 10:42). A be minw jati mɔgɔ juguw ye ani u t’a fɛ ka yɛlɛma, a tɛna olu suu lakunu.

21, 22. (a) Suu kununni sifa wɛrɛ juman lo be yen? (b) Jɔn lo kɛra fɔlɔ ye ka lakunu ka kɛ danfɛn yebali ye?

²¹ Bibulu be suu kununni sifa wɛrɛ kofɔ. O ye ka lakunu ka taga ɲɛnamaya kɛ sankolo la i ko danfɛn yebali. Yezu Krista lakununi ye o suu kununni ɲɔgɔn kelenpe ye min kɛra ani a sɛbɛra Bibulu kɔnɔ.

²² Ka Yezu to adamaden cogo la, a fagara. Nka Jehova ma sɔn a Dencɛ kantigiman ka to kaburu kɔnɔ (Zaburuw 16:10; Kɛwaliw 13:34, 35). Ala ye Yezu lakunu, nka a m’a lakunu k’a kɛ adamaden ye. Ciden Piyɛri y’a ɲɛfɔ ko Krista “fagara farisogo ta fan fɛ, nka . . . a kɔsegira ɲɛnamaya la i ko danfɛn yebali.” (1 Piyɛri 3:18, NW ).  Tiɲɛn na, nin tun ye kabakoba lo ye. Yezu tun be ɲɛnamaya la tugun i ko mɛlɛkɛ barikaman! (1 Korɛntikaw 15:3-6). Yezu fɔlɔ lo ye o suu kununni nɔɔrɔman sɔrɔ (Zan 3:13). Nka a tun tɛna daan ale dɔrɔn ma.

23, 24. Jɔn lo ye Yezu ka “sagakulufitini” mɔgɔw ye, ani u ye mɔgɔ joli lo ye?

²³ Komi Yezu tun y’a lɔn ko yanni dɔɔni a bena kɔsegi sankolo la, a y’a fɔ a ka kalanden kantigiw ye ko a bena taga “yɔrɔ labɛn” u ye (Zan 14:2). Minw tun bena taga sankolo la, Yezu ye u weele ko “sagakulufitini” (Luka 12:32). Mɔgɔ joli lo tun bena kɛ o kerecɛn kantigimanw jɛnkulu kɔnɔ min man bon kojugu? Ka kɛɲɛ ni Yirali 14:1 (ABM ) ye, ciden Zan y’a fɔ ko: “O kɔ, ne ye filɛli kɛ ka Sagaden [ Yezu Krista] jɔlen ye Sion kulu kan. Mɔgɔ waa kɛmɛ ni binaani ni waa naani bɛ a fɛ. Sagaden tɔgɔ ni a Fa tɔgɔ sɛbɛnnen tun bɛ o mɔgɔw tenw na.”

²⁴ O kerecɛn 144 000 be lakunu ka taga ɲɛnamaya kɛ sankolo la. Yezu ka ciden kantigimanw niin b’u la. U lakununi be daminɛ tuma juman? Ciden Pol y’a sɛbɛ ko o tun bena kɛ tuma min na Krista be yen a ka Masaya la (1 Korɛntikaw 15:23). I bena a ye kalansen 9nan na ko an be o wagati lo la sisan. O mɔgɔ 144 000 tɔɔ minw be yen bi, u mana sa, u be lakunu yɔrɔninkelen ka taga ɲɛnamaya kɛ sankolo la (1 Korɛntikaw 15:51-55). Nka, adamadenw fanba ka jigiya ye ka lakunu ani ka ɲɛnamaya kɛ alijɛnɛ nata la dugukolo kan.

25. An bena mun lo ye kalansen nata la?

²⁵ Tiɲɛn na, Jehova bena see sɔrɔ an jugu saya kan, ani saya bena ban fɔɔ abada! (Ezayi 25:8). Nka, n’a sɔrɔ i bena i yɛrɛ ɲininga ko ‘minw be lakunu ka taga sankolo la, u bena taga mun lo kɛ o yɔrɔ la?’ U bena kɛ Masaya ɲumanba dɔ ka mɔgɔw ye. Kalansen nata bena kunnafoni wɛrɛw di an ma o sankolola gofɛrɛnɛman koo la.