“Tan-awa! Kini Mao ang Atong Diyos”
“Tan-awa! Kini Mao ang Atong Diyos”
Ang impormasyon nga gihisgotan niining duha ka tun-anang mga artikulo gipasukad sa librong Pakigsuod Kang Jehova, nga giluwatan sa distritong mga kombensiyon nga gihimo sa tibuok kalibotan sa tuig 2002/03—Tan-awa ang artikulong “Kini Mihulip sa Kahaw-ang sa Akong Kasingkasing,” sa panid 20.
“Tan-awa! Kini mao ang atong Diyos. Kita naglaom diha kaniya, ug siya magluwas kanato. Kini mao si Jehova.”—ISAIAS 25:9.
1, 2. (a) Unsay pagtawag ni Jehova sa patriarkang si Abraham, ug unsay atong hunahunaon bahin niini? (b) Sa unsang paagi ang Bibliya nagpasalig kanato nga ang suod nga relasyon uban sa Diyos maoy posible?
“AKONG HIGALA.” Kana ang pagtawag ni Jehova, ang Maglalalang sa langit ug yuta, sa patriarkang si Abraham. (Isaias 41:8) Tiaw mo na—yanong tawo nga nahimong higala sa Soberanong Ginoo sa uniberso! Tingali ikaw maghunahuna, ‘Posible ba nga ako mahimong ingon niana ka suod sa Diyos?’
2 Ang Bibliya nagpasalig kanato nga posible ang pagbaton ug suod nga relasyon uban sa Diyos. Gitugot kang Abraham ang maong suod nga relasyon kay siya “nagbutang ug pagtuo kang Jehova.” (Santiago 2:23) Karong adlawa, usab, ang kang Jehova nga “pagpakigsuod anaa uban sa mga matul-id.” (Proverbio 3:32) Sa Santiago 4:8, ang Bibliya nag-awhag kanato: “Duol sa Diyos, ug siya moduol kaninyo.” Tin-aw, kon mohimo kitag mga lakang aron masuod kang Jehova, molihok usab siya. Sa pagkatinuod, siya makigsuod kanato. Apan kining dinasig nga mga pulong nagpasabot ba nga kita—nga makasasala, dili-hingpit nga mga tawo—mao ang mouna sa paglihok? Dili gayod. Ang pagpakigsuod kang Jehova maposible lamang kay ang atong mahigugmaong Diyos nakahimo nag duha ka hinungdanong mga lakang.—Salmo 25:14.
3. Unsang duha ka lakang ang gihimo ni Jehova aron posible nga kita makighigala kaniya?
3 Una, gihikay ni Jehova nga ‘ihatag ni Jesus ang iyang kalag nga usa ka lukat baylo sa daghan.’ (Mateo 20:28) Kadto nga halad lukat nagpaposible nga kita masuod sa Diyos. Ang Bibliya nag-ingon: “Bahin kanato, kita nahigugma, tungod kay siya unang nahigugma kanato.” (1 Juan 4:19) Oo, sanglit ang Diyos “unang nahigugma kanato,” iyang gipahiluna ang patukoranan aron kita makighigala kaniya. Ikaduha, gipadayag ni Jehova ang iyang kaugalingon kanato. Sa bisan unsang pakighigala nga maugmad nato, ang panagsuod gibase diha sa tinuod nga pagkaila sa laing tawo o persona, pagdayeg ug pagpabili sa iyang linaing mga hiyas. Hunahunaa kon unsay kahulogan niini. Kon si Jehova maoy Diyos nga tinago ug dili-mailhan, kita dili gayod masuod kaniya. Apan, inay itago ang iyang kaugalingon, buot ni Jehova nga kita makaila kaniya. (Isaias 45:19) Diha sa iyang Pulong, ang Bibliya, siya nagpadayag sa iyang kaugalingon diha sa mga terminong atong masabtan—kini ebidensiya nga dili lang siya nahigugma kanato kondili buot niya nga kita makaila ug mahigugma kaniya ingong atong langitnong Amahan.
4. Unsay atong bation bahin kang Jehova samtang mas masabtan nato ang iyang mga hiyas?
4 Nakakita ka ba sukad ug gamayng bata nga nagpaila sa iyang amahan ngadto sa iyang mga higala ug unya moingon nga malipayon ug magarbohon kaayo, “Siya ang akong Papa”? Ang mga magsisimba sa Diyos aduna gayoy katarongan nga mobating sama niana bahin kang Jehova. Gitagna sa Bibliya ang usa ka panahon sa dihang ang matinumanong katawhan mopatugbaw: “Tan-awa! Kini mao ang atong Diyos.” (Isaias 25:8, 9) Kon mas masabtan nato ang mga hiyas ni Jehova, mas mobati kita nga kita nakabaton sa labing maayong Amahan ug labing suod nga Higala. Oo, ang pagsabot sa mga hiyas ni Jehova mohatag kanato ug daghang katarongan sa pagpakigsuod kaniya. Busa atong susihon kon sa unsang paagi ang Bibliya nagpadayag sa pangunang mga hiyas ni Jehova—ang gahom, hustisya, kaalam, ug gugma. Niining artikuloha, hisgotan nato ang unang tulo ka hiyas.
“Binayaw sa Gahom”
5. Nganong angay nga si Jehova lamang ang tawgon “ang Labing Gamhanan,” ug sa unsang mga paagi siya nagagamit sa iyang kahibulongan kaayong gahom?
5 Si Jehova “binayaw sa gahom.” (Job 37:23) Ang Jeremias 10:6 nag-ingon: “Wala gayoy bisan usa nga sama kanimo, Oh Jehova. Ikaw dako, ug ang imong ngalan dako sa pagkagamhanan.” Lahi sa bisan unsang linalang, si Jehova adunay walay-kinutobang gahom. Tungod niana, siya lamang ang gitawag “ang Labing Gamhanan.” (Pinadayag 15:3) Si Jehova nagagamit sa iyang kahibulongan kaayong gahom sa paglalang, paglaglag, pagpanalipod, ug pagpasig-uli. Tagda ang duha lamang ka pananglitan—ang iyang gahom sa paglalang ug iyang gahom sa pagpanalipod.
6, 7. Unsa ka gamhanan ang adlaw, ug unsang hinungdanong kamatuoran ang gipamatud-an niini?
6 Sa dihang motindog ka sa gawas sa balay sa usa ka sanag nga adlaw sa ting-init, unsay imong bation sa imong panit? Ang kainit sa adlaw. Apan, sa tinuoray imong gibati ang resulta sa gahom sa paglalang ni Jehova. Unsa ka gamhanan ang adlaw? Sa uyok niini, ang temperatura maoy mga 15 ka milyong grado Celsius. Kon makakuha kag tipik sa uyok sa adlaw nga samag ulo sa dinagom ug ibutang kana sa yuta, dili ka makatindog nga luwas sulod sa 140 ka kilometros gikan sa maong gamitoyng tinubdan sa kainit! Kada segundo, ang adlaw mobuga ug enerhiya nga katumbas sa pagbuto sa milyonmilyong nukleyar nga mga bomba. Bisan pa niana, ang yuta nagbiyo sa maong makapahingangha kaayong thermonuclear nga hurno sa husto ra gayong distansiya. Kon duol kaayo ang yuta, ang tubig sa yuta mokayab isip alisngaw; kon layo kaayo, kanang tanan mahimong yelo. Walay mabuhi sa atong planeta sa bisan haing hinobrang distansiya.
7 Bisan pag ang ilang kinabuhi nagdepende sa adlaw, ang kadaghanang tawo wala kaayo magtagad sa adlaw. Busa, sila dili makasabot kon unsay mahimong itudlo sa adlaw kanato. Ang Salmo 74:16 nag-ingon bahin kang Jehova: “Giandam mo ang banwag, bisan ang adlaw.” Oo, ang adlaw nagpasidungog kang Jehova, “ang Magbubuhat sa langit ug sa yuta.” (Salmo 146:6) Bisan pag ingon niana, kini usa lamang sa daghang linalang nga nagtudlo kanato bahin sa dako kaayong gahom ni Jehova. Kon kita mas makakat-on bahin sa gahom sa paglalang ni Jehova, mas modako pa ang atong pagkahingangha.
8, 9. (a) Unsang mabinationg ilustrasyon ang nagpakita kanato sa kaandam ni Jehova sa pagpanalipod ug pag-atiman sa iyang mga magsisimba? (b) Giunsa pag-atiman sa magbalantay sa hayop ang iyang mga karnero sa kapanahonan sa Bibliya, ug unsay gitudlo niini kanato bahin sa atong Dakong Magbalantay?
8 Gigamit usab ni Jehova ang iyang dako kaayong gahom sa pagpanalipod sa iyang mga alagad ug pag-atiman kanila. Ang Bibliya nagagamit ug pipila ka tin-aw apan makapatandog nga mga ilustrasyon sa paghubit sa mga saad ni Jehova bahin sa mapanalipdanong pag-atiman. Pananglitan, matikdi ang Isaias 40:11. Diha niana si Jehova nagtandi sa iyang kaugalingon ngadto sa usa ka magbalantay sa hayop ug sa iyang katawhan ngadto sa mga karnero. Mabasa nato: “Sama sa usa ka magbalantay sa hayop iyang bantayan ang iyang kaugalingong panon. Pinaagi sa iyang bukton iyang tapokon ang mga nating karnero; ug sa iyang sabakan iya silang kugoson. Kadtong mga nagapasuso iyang agakon uban ang pag-amping.” Mahanduraw mo ba kon unsay gihubit sa maong bersikulo?
9 Pipila ra ang mga hayop nga dili-makadepensa sama sa binuhing mga karnero. Ang usa ka magbalantay sa hayop sa kapanahonan sa Bibliya kinahanglang magmaisogon aron panalipdan ang iyang mga karnero batok sa mga lobo, mga oso, ug mga leyon. (1 Samuel 17:34-36; Juan 10:10-13) Apan may mga higayon nga ang pagkamabination gikinahanglan aron panalipdan ug atimanon ang mga karnero. Pananglitan, sa dihang ang usa ka karnero manganak nga halayo sa panon, unsay himoon sa magbalantay aron ang dili-makadepensang bag-ong gianak nga nating karnero mahilayo sa kapeligrohan? Kana iyang kugoson, tingali sa daghang adlaw, “sa iyang sabakan”—ang naglaylay nga mga bahin sa iyang pang-ibabaw nga besti. Apan, sa unsang paagi makaabot ang nating karnero sa sabakan sa magbalantay? Ang nating karnero tingali moduol sa magbalantay ug moid-id sa iyang bitiis. Ugaling lang, ang magbalantay sa hayop mao ang moyuko, mokab-ot ug moalsa sa nating karnero, ug magbutang niana diha sa iyang luwas nga sabakan. Pagkamabinationg hulagway sa kaandam sa atong Dakong Magbalantay sa pagpanalipod ug pag-atiman sa iyang mga alagad!
10. Unsang panalipod ang gitagana ni Jehova karon, ug nganong ang maong panalipod ilabinang mahinungdanon?
10 Wala lamang isaad ni Jehova ang panalipod. Sa kapanahonan sa Bibliya, iyang gipasundayag sa milagrosong mga paagi nga siya makaarang “pagluwas sa katawhan nga may diyosnong pagkamahinalaron gikan sa pagsulay.” (2 Pedro 2:9) Komosta karong adlawa? Nahibalo kita nga siya dili mogamit sa iyang gahom sa pagpanalipod kanato gikan sa tanang katalagman karon. Hinunoa, iyang gitagana ang mas hinungdanong butang—ang espirituwal nga panalipod. Ang atong mahigugmaong Diyos manalipod kanato gikan sa espirituwal nga kadaot pinaagi sa pagsangkap kanato kon unsay atong gikinahanglan aron makaagwanta sa mga pagsulay ug mapanalipdan ang atong relasyon uban kaniya. Pananglitan, ang Lucas 11:13 nag-ingon: “Kon kamo, bisan tuod daotan, mahibalong mohatag ug maayong mga gasa ngadto sa inyong mga anak, unsa ka labaw pa gayod nga ang inyong Amahan sa langit mohatag ug balaang espiritu niadtong nagapangayo kaniya!” Ang maong gamhanang puwersa magsangkap kanato sa pagsagubang sa bisan unsang pagsulay o suliran nga tingali atong maatubang. (2 Corinto 4:7) Busa si Jehova nagbuhat aron mapreserbar ang atong kinabuhi, dili lamang sulod sa pipila ka tuig, kondili hangtod sa hangtod. Tungod sa paghunahuna sa maong kalaoman, atong maisip gayod ang bisan unsang pag-antos niining sistemaha ingong “makadiyot lamang ug magaan.” (2 Corinto 4:17) Dili ba kita madani sa usa ka Diyos nga mahigugmaon kaayong nagagamit sa iyang gahom alang kanato?
“Si Jehova Mahigugmaon sa Hustisya”
11, 12. (a) Nganong ang hustisya ni Jehova magdani kanato ngadto kaniya? (b) Unsay gihinapos ni David mahitungod sa hustisya ni Jehova, ug sa unsang paagi kining dinasig nga mga pulong makapahupay kanato?
11 Ginabuhat ni Jehova kon unsay matarong ug makiangayon, ug iyang ginabuhat kana nga dili mabalhinon, nga dili mapihigon. Ang hustisya sa Diyos dili usa ka dili-mabination, mapintason nga hiyas nga moabog kanato, kondili maoy dalayegong hiyas nga magdani kanato kang Jehova. Ang Bibliya tin-awng naghubit sa makapalipayng kinaiyahan niining hiyasa. Nan, hisgotan nato ang tulo ka paagi diin si Jehova nagpasundayag sa iyang hustisya.
12 Una, ang hustisya ni Jehova nagdasig kaniya sa pagpadayag sa pagkakasaligan ug pagkamaunongon ngadto sa iyang mga alagad. Ang salmistang si David nakasinati sa personal niining bahina sa hustisya ni Jehova. Gikan sa iyang kaugalingong kasinatian ug sa iyang pagtuon sa mga paagi sa Diyos, unsay gihinapos ni David? Siya mipahayag: “Si Jehova mahigugmaon sa hustisya, ug dili niya pagabiyaan ang mga maunongon kaniya. Sila pagabantayan hangtod sa panahong walay tino.” (Salmo 37:28) Pagkamakapahupay nga pasalig! Ang atong Diyos dili gayod mobiya bisan sa usa ka gutlo sa mga maunongon kaniya. Busa makasalig kita sa iyang pagkahigala ug mahigugmaong pagtagad. Ang iyang hustisya mao ang garantiya niini!—Proverbio 2:7, 8.
13. Sa unsang paagi ang pagkamahunahunaon ni Jehova sa mga tawong timawa dayag diha sa Balaod nga iyang gihatag ngadto sa Israel?
13 Ikaduha, ang hustisya sa Diyos sensitibo sa mga panginahanglan sa mga sinakit. Ang pagkamahunahunaon ni Jehova sa mga tawong timawa dayag diha sa Balaod nga iyang gihatag ngadto sa Israel. Pananglitan, ang Balaod adunay mga kahikayan sa pagpaneguro nga maatiman ang mga ilo ug mga babayeng balo. (Deuteronomio 24:17-21) Kay nakaamgo kon unsa ka lisod ang kinabuhi alang nianang mga pamilyaha, si Jehova mismo nahimong ilang samag-amahan nga Maghuhukom ug Tigpanalipod. (Deuteronomio 10:17, 18) Iyang gipasidan-an ang mga Israelinhon nga kon ilang biktimahon ang dili-makadepensang mga babaye ug mga bata, iyang dunggon ang ilang pagtuaw. “Ang akong kasuko mosilaob gayod,” siya miingon, sumala sa natala sa Exodo 22:22-24. Bisan pag ang kasuko dili usa sa nagpatigbabawng mga hiyas sa Diyos, mahagit ang iyang matarong nga kasuko tungod sa tinuyong mga inhustisya, ilabina kon ang mga biktima maoy mga mahuyang.—Salmo 103:6.
14. Unsay talagsaon kaayong ebidensiya sa pagkadili-mapihigon ni Jehova?
14 Ikatulo, sa Deuteronomio 10:17, ang Bibliya nagpasalig kanato nga si Jehova “wala magpihig kang bisan kinsa ni modawat ug hiphip.” Lahi sa daghang tawo nga may gahom o impluwensiyado, si Jehova dili maimpluwensiyahan sa materyal nga bahandi o panggawas nga dagway. Siya dili mapihigon o walay pinalabi. Ang talagsaon gayong ebidensiya sa iyang pagkadili-mapihigon mao kini: Ang kahigayonan nga mahimong iyang matuod nga mga magsisimba, uban ang kalaoman nga walay-kataposang kinabuhi, dili limitado sa pipila ka hamiling tawo. Hinunoa, ang Buhat 10:34, 35 nag-ingon: “Ang Diyos dili mapihigon, apan sa matag nasod ang tawo nga mahadlok kaniya ug magabuhat sa pagkamatarong dalawaton kaniya.” Ang maong kalaoman ginatanyag sa tanan walay pagsapayan sa ilang kahimtang sa katilingban, kolor sa ilang panit, o nasod nga ilang gipuy-an. Dili ba kana mao ang kinalabwang matuod nga hustisya? Sa pagkatinuod, kita madani kang Jehova tungod sa mas maayong pagsabot sa iyang hustisya!
‘Oh Pagkalawom . . . sa Kaalam sa Diyos!’
15. Unsa ang kaalam, ug sa unsang paagi gipasundayag kini ni Jehova?
15 Si apostol Pablo nadasig sa pagpatugbaw, sumala sa natala sa Roma 11:33: “Oh pagkalawom . . . sa kaalam ug sa kahibalo sa Diyos!” Oo, samtang atong palandongon ang nagkalainlaing mga kinaiyahan sa dako kaayong kaalam ni Jehova, kita mahupong gayod sa kahingangha. Apan, sa unsang paagi mabatbat nato ang maong hiyas? Ang kaalam mao ang pagpadapat sa kahibalo, pag-ila, ug pagsabot aron mapatungha ang gitinguhang mga resulta. Pinaagi sa paggamit sa iyang dakong kahibalo ug sa iyang halawom nga pagsabot, si Jehova makahimo kanunay sa kinamaayohang mga desisyon, nga magtuman niana pinaagi sa labing maayong mga buhat.
16, 17. Sa unsang paagi ang mga linalang ni Jehova nagpamatuod sa iyang dako kaayong kaalam? Ihatag ang usa ka pananglitan.
16 Unsa ang pipila ka espesipikong mga ebidensiya sa dako kaayong kaalam ni Jehova? Matod sa Salmo 104:24: “Pagkadaghan sa imong mga buhat, Oh Jehova! Sa kaalam gibuhat mo silang tanan. Ang yuta napuno sa imong mga binuhat.” Sa pagkatinuod, kon mas daghan kitag makat-onan bahin sa mga butang nga gibuhat ni Jehova, kita mas mahingangha sa iyang kaalam. Ngani, ang mga siyentipiko daghag nakat-onan gikan sa pagtuon sa mga linalang ni Jehova! Aduna ganiy usa ka natad sa inhenyeriya, nga gitawag ug biomimetics, nga nagtinguha sa pagsundog sa mga disenyo nga anaa sa kinaiyahan.
17 Pananglitan, tingali nakasud-ong kang nahibulong sa katahom sa balayan sa lawalawa. Kahibulongan kaayo ang disenyo niini. Ang pipila ka huyang-tan-awon nga mga lanot sa proporsiyon mas lig-on pa kay sa asiro, mas hunit kay sa mga lanot sa dili-dutlag bala nga tsaliko. Unsa ba gayod ang ipasabot niana? Handurawa ang usa ka balayan sa lawalawa nga gipadak-an hangtod nga kini sama na sa usa ka pukot nga gigamit sa sakayan sa panagat. Ang maong balayan sa lawalawa mahimong lig-on kaayo nga kini makapahunong sa nagalupad nga ayroplanong depasahero! Oo, si Jehova nagbuhat nianang tanang butang diha “sa kaalam.”
18. Sa unsang paagi ang kaalam ni Jehova makita diha sa iyang paggamit ug mga tawo sa pagsulat sa iyang Pulong, ang Bibliya?
18 Ang kinadak-ang ebidensiya sa kaalam ni Jehova makaplagan diha sa iyang Pulong, ang Bibliya. Ang maalamong tambag nga makaplagan diha sa mga panid niini magpakita gayod kanato sa labing maayong paagi sa pagkinabuhi. (Isaias 48:17) Apan ang walay-ikatanding nga kaalam ni Jehova makita usab sa paagi sa pagkasulat sa Bibliya. Sa unsang paagi? Tungod sa iyang kaalam, gigamit ni Jehova ang mga tawo sa pagsulat sa iyang Pulong. Kon siya migamit pag mga manulonda sa pagsulat sa dinasig nga Pulong, ang Bibliya ba may samang katakos sa pagtukbil? Tinuod, ang mga manulonda makahulagway kang Jehova pinasukad sa ilang labaw nga panglantaw ug makapahayag sa ilang debosyon kaniya. Apan makaarang ba gayod kita sa pagpakiglangkit uban sa panglantaw sa hingpit nga espiritung mga linalang, kansang kahibalo, kasinatian, ug kusog labaw kay sa atoa?—Hebreohanon 2:6, 7.
19. Unsang pananglitan ang nagpakita nga ang paggamit ug mga tawo ingong mga magsusulat naghatag sa Bibliya sa dakong pagkamainiton ug katakos sa pagtukbil?
19 Tungod sa paggamit ug mga tawo ingong mga magsusulat, ang Bibliya adunay dakong pagkamainiton ug katakos sa pagtukbil. Ang mga magsusulat niini maoy mga tawong may mga pagbati nga sama sa atoa. Kay dili hingpit, gisagubang nila ang mga pagsulay ug mga kapit-osan nga susama sa atoa. Sa pipila ka kaso, ilang gisulat ang ilang personal nga mga pagbati ug mga pakigbisog. (2 Corinto 12:7-10) Busa sila nagsulat ug mga pulong nga dili ikapahayag sa usa ka manulonda. Pananglitan, tagda ang mga pulong ni David nga natala sa Salmo 51. Sumala sa superskripsiyon, si David maoy nagkomposo sa maong salmo human siya makahimog seryosong sala. Iyang gipahayag ang mga pagbati sa iyang kasingkasing, nga gipahayag ang dakong kasubo ug siya nangaliyupo sa kapasayloan sa Diyos. Ang mga bersikulo 2 ug 3 nag-ingon: “Hugasi ako sa bug-os gikan sa akong kasaypanan, ug hinloi ako gikan mismo sa akong sala. Kay nahibalo ako sa akong mga kalapasan, ug ang akong sala anaa kanunay sa akong atubangan.” Matikdi ang bersikulo 5: “Tan-awa! Sa kasaypanan ako natawo uban sa mga kasakit sa pagpanganak, ug sa sala ako gipanamkon sa akong inahan.” Ang bersikulo 17 nagdugang: “Ang mga halad ngadto sa Diyos mao ang gun-ob nga espiritu; usa ka kasingkasing nga gun-ob ug dugmok, Oh Diyos, dili mo pagatamayon.” Dili ba nimo bation ang kaguol sa magsusulat? Kinsa ba gawas sa dili-hingpit nga tawo ang makapahayag sa maong mga pagbati?
20, 21. (a) Nganong ikaingon nga bisan pa sa paggamit ug mga tawo ingong mga magsusulat, ang Bibliya naundan sa kaalam ni Jehova? (b) Unsay pagahisgotan sa sunod artikulo?
20 Tungod sa iyang paggamit ug dili-hingpit nga mga tawo, gitagana gayod ni Jehova kon unsay atong gikinahanglan—usa ka talaan nga “inspirado sa Diyos” apan daling masabtan sa tawo. (2 Timoteo 3:16) Oo, ang maong mga magsusulat gigiyahan sa balaang espiritu. Sa ingon gitala nila ang kaalam ni Jehova, dili ang ilang kaugalingong kaalam. Ang maong kaalam bug-os nga kasaligan. Kini labaw kaayo kay sa atong kaugalingong kaalam nga ang Diyos mahigugmaong nag-awhag kanato: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” (Proverbio 3:5, 6) Pinaagi sa pagsunod nianang maalamong tambag, kita masuod sa atong maalamon-sa-tanan nga Diyos.
21 Ang labing dalayegon ug matahom sa tanang hiyas ni Jehova mao ang gugma. Kon sa unsang paagi si Jehova nagpakitag gugma mao ang pagahisgotan sa sunod artikulo.
Makahinumdom Ka Ba?
• Unsang mga lakang ang gihimo ni Jehova aron kita makaugmad sa pagpakigsuod kaniya?
• Unsa ang pipila ka pananglitan sa gahom sa paglalang ni Jehova ug sa iyang mapanalipdanong gahom?
• Sa unsang mga paagi si Jehova nagpasundayag sa iyang hustisya?
• Sa unsang paagi ang kaalam ni Jehova makita diha sa iyang kalalangan ingon man diha sa Bibliya?
[Mga Pangutana sa Pagtuon]
[Hulagway sa panid 10]
Sama sa usa ka magbalantay sa hayop nga magkugos sa usa ka nating karnero diha sa iyang sabakan, si Jehova mabinationg mag-atiman sa Iyang mga karnero
[Hulagway sa panid 13]
Ang kaalam ni Jehova makita diha sa paagi sa pagkasulat sa Bibliya