Yu Save Bilif Long Ol Merikel We Baebol i Tokbaot

SIPOS wan man i talem wan stori long yu, save we yu gat long saed blong hem bambae i mekem se yu bilivim stori blong hem no nogat. Hemia i min se yu save fasin blong hem blong talem stori ya, mo sipos hem i wan man blong tok tru, no i man blong giaman. Sipos oltaem hem i talem samting we i tru, yu save bilif long stori we hem i stap talem.

Hemia i tru tu long ol merikel we Baebol i tokbaot. Taem ol merikel ya oli hapen, i no gat wan long yumi i laef long taem ya. Be yumi save luksave sipos ol stori blong Baebol oli tru, mo sipos yumi save bilif long hem. ?Yumi save mekem samting ya olsem wanem? Bambae yumi tokbaot sam samting we i mekem se yumi save trastem ol merikel long Baebol.

Oli hapen long ples we i gat plante man. Samtaem plante taosen man oli luk ol merikel ya. (Eksodas 14:21-31; 19:16-19) Ol man oli mekem ol merikel ya long fored blong ol man, i no long wan ples we i haed.

Oli no pulum ae blong ol narafala. Man we i mekem ol merikel, i no mekem long wan spesel ples we i gat ol samting olsem wan stej, jea mo laet. Bighaf blong ol merikel we Baebol i tokbaot, oli hapen long taem we man i no plan from, mo oli hapen from we man nao i askem. (Mak 5:25-29; Luk 7:11-16) Ol man we oli mekem ol merikel, oli no plan fastaem se bambae oli mekem long weples.

Ol man oli no mekem blong man i leftemap olgeta, blong kasem haenem, mo blong kam rijman. Defren olgeta, oli mekem blong leftemap nem blong God. (Jon 11:1-4, 15, 40) God i agensem ol man we oli mekem merikel blong kam rijman.—2 King 5:15, 16, 20, 25-27; Ol Wok 8:18-23.

Ol merikel we Baebol i tokbaot oli no sem mak, hemia i soemaot se oli no kamaot long paoa blong man. Yu traem tingbaot, solwota mo win tufala i kam kwaet, wota i jenis i kam waen, ren i no moa foldaon mo biaen i foldaon bakegen, ol sikman oli gud bakegen, ol blaen man oli save lukluk. Ol merikel ya mo plante narafala tu, oli soemaot se oli kamaot long wan paoa we i bitim paoa blong man. —1 King 17:1-7; 18:41-45; Matiu 8:24-27; Luk 17:11-19; Jon 2:1-11; 9:1-7.

I no gat wan man blong agens i talem se ol merikel ya oli no tru. Taem Jisas i mekem fren blong hem Lasaros i laef bakegen, ol Farisi oli no talem se merikel ya i no tru. ?From wanem? From we Lasaros i stap fo dei finis long beregraon. (Jon 11:45-48; 12:9-11) Mo plante handred yia afta we Jisas i ded, ol man we oli raetem buk blong ol man Jiu we oli kolem Talmud, oli gohed blong talem se Jisas i gat paoa blong mekem merikel. Be samting we oli agensem, hemia se hu i givim paoa long hem. Long sem fasin, taem tu man blong Jisas tufala i pas long Kaonsel blong ol man Jiu, ol tija blong loa oli no askem sipos tufala i stap mekem merikel. Be oli askem long tufala se: “?Yutufala i yusum wanem paoa, no yutufala i mekem long nem blong hu?”—Ol Wok 4:1-13.

?Olsem wanem? ?Yu save bilif long samting we Baebol i talem long saed blong ol merikel? Olsem we yumi jes luk, i klia se ol stori blong ol merikel long Baebol oli tru. I gat sam narafala samting tu we oli mekem se yumi save trastem ol stori ya. Yu traem tingbaot. Taem Baebol i talemaot wan samting we i hapen, hem i talem taem, ples, mo nem blong ol man we oli stap long stori ya. Ol man we oli traem faenem poen long Baebol oli sapraes we ol stori blong hem oli stret gud. Plante profet tok blong Baebol oli kamtru, mo evri smosmol haf blong olgeta tu oli kamtru. Mo tu, Baebol i fulap wetem ol advaes we oli save givhan long man blong i harem gud long laef. Ol advaes ya oli givhan long plante man, nomata se oli olfala no yangfala, mo nomata se fasin blong laef blong olgeta i olsem wanem. Ol advaes blong Baebol oli givhan long ol man blong oli joen gud. I no gat wan narafala advaes we i gud moa i bitim ol advaes blong Baebol.

Sipos yu no trastem Baebol, i gud yu tekem taem blong stadi gud long hem. Ale, moa we yu save hem, moa we bambae yu trastem hem. (Jon 17:17) Bambae yu faenemaot se yu save trastem samting we hem i talem long saed blong ol merikel we oli hapen bifo. Taem yu bilif long ol stori blong Baebol, bambae yu trastem moa ol samting we Baebol i talem se bambae oli hapen i no longtaem.

[Tok blong pija long pej 5]

Ol man we oli agensem Jisas oli save se Lasaros i ded mo i laef bakegen