Letem Jeova i Lidim Yu

“Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.”—1 JON 5:3.

1, 2. (a) ?From wanem plante man tede oli no laekem blong stap aninit long wan man we i lidim olgeta? (b) ?Ol man ya we oli no wantem we narafala i lidim olgeta, oli rili independen? Eksplenem.

PLANTE man oli no laekem nating we narafala i lidim olgeta. Ol man we oli no wantem we narafala i lidim olgeta, oli talem tok olsem se: “Bambae mi no letem eni man i talem long mi wanem we mi mas mekem.” ?Olsem wanem? ?Ol man ya oli rili independen? Nogat. Bighaf blong ol man ya oli stap mekem samting nomo folem wanem we plante narafala man oli stap mekem hemia se oli stap ‘letem fasin blong olgeta i kam olsem fasin blong wol.’ (Rom 12:2) Aposol Pita i tokbaot ol man ya we oli no independen nating se oli “slef nomo blong ol fasin ya we i stap spolem olgeta.” (2 Pita 2:19) Oli wokbaot ‘folem rod blong wol ya, mo oli folem jif ya blong paoa blong win,’ hemia Devel Setan.—Efes. 2:2.

² Wan man i raetem long buk blong hem se: “Mi no letem we papa mama blong mi, wan pris, wan man blong skul, wan man we ol narafala oli luk hem olsem wan lida no Baebol, i talem long mi wanem we i tru mo i stret blong mi mekem.” I tru se samfala oli mekem i strong tumas long narafala taswe maet i no stret nating blong obei long olgeta ya. ?Be yu ting se hemia nao risen blong talem se yumi no nidim wan man blong i lidim yumi? Ol bigfala stori nomo long nius oli givim wan ansa we i mekem man i harem nogud. I nogud tumas we long ol taem we ol man oli nidim moa we narafala i lidim olgeta, plante oli no wantem blong mekem olsem.

Tingting We Yumi Gat Long Olgeta We Oli Lidim Yumi

3. ?Olsem wanem ol Kristin long faswan handred yia oli soemaot se oli no folem nomo wanem we ol haeman oli talem?

³ From we yumi Kristin, tingting blong yumi i mas defren long tingting blong ol man long wol. Hemia i no min se yumi folem evri samting we man i talem we yumi no tingting long hem fastaem, nogat. Samtaem yumi no save obei long olgeta we oli lidim yumi. Hemia i tru long ol Kristin long faswan handred yia. Taem ol hae pris mo ol narafala haeman blong Sanhedrin oli talem long ol aposol blong oli stop blong talemaot gud nius, ol aposol oli no obei long olgeta. Oli no lego ol stret fasin blong folem tingting blong ol man ya.—Ridim Ol Wok 5:27-29.

4. ?Wanem ol eksampol long Hibru haf blong Baebol we oli soemaot se plante man blong God oli folem wan rod we bighaf blong ol man oli no laekem?

⁴ Plante man blong God bifo long taem blong Kraes, oli folem sem fasin nomo. Eksampol, Moses “i no wantem we olgeta oli talem se hem i pikinini blong gel blong Fero. Hem i . . . glad moa blong go joen long ol man blong God blong harem nogud wetem olgeta,” nating se hem i save se king bambae “i kros tumas.” (Hib. 11:24, 25, 27) Josef i stanap strong taem woman blong Potifa i traem pulum hem blong  slip wetem hem. Josef i mekem olsem, nating se hem i save we woman ya hem i woman blong wan haeman mo hem i save yusum posisen blong hem isi nomo blong givimbak long Josef mo mekem trabol long Josef. (Jen. 39:7-9) “Tingting blong Daniel i strong blong hem i no kakae ol kakae ya blong king, mo blong i no dring ol waen ya blong hem, from we hem i save se bambae ol samting ya oli save mekem hem i no klin long fes blong God,” nating se haeman blong king i no agri long desisen blong hem. (Dan. 1:8-14) Ol eksampol ya oli soemaot se longtaem finis i kam, ol man blong God oli stanap strong blong sapotem samting we i stret nating se oli mas kasem trabol from. Oli no stap mekem samting jes blong mekem man i glad long olgeta, nogat. Yumi tu yumi mas mekem sem mak.

5. ?Olsem wanem tingting blong yumi long saed blong bos i defren long tingting blong wol?

⁵ Fasin ya we yumi stanap strong i no minim se yumi stronghed no yumi rebel agensem samting we gavman i talem, nogat. Defren olgeta, yumi soemaot se yumi letem Jeova i lidim yumi i bitim eni lida no haeman long wol ya. Taem loa blong man i agensem loa blong God, i no had long yumi blong tekem desisen se bambae yumi mekem wanem. Olsem ol aposol long faswan handred yia, yumi obei long God olsem rula i bitim we yumi obei long man.

6. ?From wanem fasin blong obei long ol tok blong Jeova i beswan rod blong folem?

⁶ ?Wanem i halpem yumi blong letem Jeova i lidim yumi? Yumi folem tingting we i stap long Ol Proveb 3:5, 6 we i talem se: “I nogud yu ting se save ya blong yu naoia, hem i naf blong givhan long yu. Yu mas trastem Hae God long olgeta tingting blong yu. Long olgeta samting we yu stap mekem, yu mas tingbaot hem oltaem, mo sipos yu stap mekem olsem, hem bambae i soemaot stret rod long yu, blong yu yu folem.” Yumi agri se olgeta samting we God i wantem yumi blong mekem oli blong givhan long yumi. (Ridim Dutronome 10:12, 13.) Mo tu, Jeova i tokbaot hem wan long ol man Isrel i se, “Mi mi God blong yufala, God ya we i stap tijim yufala blong karem gudfala frut long laef blong yufala. Mi mi stap mekem yufala i wokbaot long rod we i stret.” Mo hem i gohed i se: “!Mi mi wantem tumas we yu lesin gud long ol oda blong mi! Sipos yu mekem olsem, bambae pis blong yu i kam olsem wan bigfala reva, mo stret fasin blong yu bambae oli kam olsem ol wef blong solwora.” (Aes. 48:17, 18) Yumi trastem ol tok ya. Yumi sua fulwan se fasin blong obei long ol tok blong God i beswan rod blong folem.

7. ?Yumi save mekem wanem sipos yumi no kasem save fulwan ol tok blong God long Baebol?

⁷ Yumi letem Jeova i lidim yumi mo yumi obei long hem nating sipos yumi no kasem save fulwan ol risen blong sam samting we hem i askem yumi blong mekem we i kamaot long Baebol. Hemia i wan fasin we i stanap long tras. Samting ya i soemaot se wetem fulhat, yumi trastem se Jeova i save wanem samting we i gud long yumi. Fasin blong yumi blong obei i soemaot lav we yumi gat long Hem, from we aposol Jon i raetem se: “Sipos yumi lavem God, hemia i min se yumi stap folem ol tok blong hem.” (1 Jon 5:3) Be i gat wan narafala risen tu long saed blong fasin obei ya we yumi no mas ting nating long hem.

Trenem Tingting Blong Yumi

8. ?Olsem wanem fasin blong “trenem tingting blong yumi” i joen wetem fasin ya we yumi letem Jeova i lidim yumi?

⁸ Baebol i talem long yumi se yumi mas ‘trenem tingting blong yumi gogo yumi kam naf blong luksave mo jusumaot wanem i stret mo wanem i no stret.’ (Hib. 5:14, NW) Taswe, mak blong yumi i no blong obei long loa blong God olsem nomo we yumi no tingtinggud long hem. Defren olgeta, folem ol rul blong Jeova, yumi wantem blong kam naf blong “luksave mo jusumaot wanem i stret mo wanem i no stret.” Yumi wantem luk olsem wanem ol rod blong Jeova oli waes, nao bambae yumi save talem olsem man blong raetem Sam se: “Mi mi holem tok blong yu long tingting blong mi.”—Sam 40:8.

9. ?Olsem wanem yumi save mekem se voes blong hat blong yumi i laenap wetem ol tingting blong Jeova, mo from wanem i impoten we yumi mekem olsem?

⁹ Blong laekem tumas loa blong God olsem man ya blong raetem Sam, yumi nidim blong tingting dip long samting we yumi ridim long Baebol. Eksampol, taem yumi lanem wan rul no loa blong Jeova, maet yumi save askem se: ‘?From wanem stamba loa no rul ya i waes? ?From wanem i gud we mi obei long rul no stamba loa ya? ?Wanem nogud samting i hapen long olgeta we oli no tinghevi long ol advaes blong God long saed blong bisnes ya?’ Taem voes blong hat blong yumi i laenap wetem ol tingting blong Jeova, bambae i isi moa long yumi blong mekem ol desisen we oli laenap wetem wil blong Hem. Bambae yumi naf blong ‘save olgeta samting we [Jeova] i wantem blong yumi mekem.’ (Efes. 5:17) Samting ya i no isi oltaem.

 Setan i Lukaot Rod Blong Spolem Raet We God i Gat Blong Lidim Yumi

10. ?Wanem wan rod we Setan i yusum blong spolem raet we Jeova i gat blong lidim ol man?

¹⁰ Setan i lukaot rod longtaem finis blong spolem raet we God i gat blong lidim yumi. Fasin blong Setan blong folem prapa tingting blong hem wan, yumi save luk i klia nomo long plante defren samting. Eksampol, man i no moa gat respek long fasin blong mared we God i stanemap. Sam man mo woman oli jus blong stap tugeta we oli no mared mo sam narafala oli lukaot rod blong lego hasban no waef blong olgeta. Maet olgeta ya oli agri wetem woman ya we i aktem ol film we i talem se: “Wan man i no save gat wan patna nomo.” Hem i gohed i talem se: “Mi mi no save eni man we i gat wan waef nomo mo eni woman we i gat wan hasban nomo. Mi no save eni man mo woman we i wantem mekem olsem.” Wan man we i aktem ol film we ol man oli save gud hem mo we mared blong hem i brokdaon, i talem wan tok we i klosap sem mak i se: “Mi no sua sipos yumi bon wetem filing ya blong stap wetem wan waef no wan hasban nomo long ful laef blong yumi.” Yumi mas tingbaot kwestin ya se: ‘?Mi mi letem Jeova i lidim mi long saed blong mared no mi gat sem tingting olsem ol man blong wol se mared i blong smoltaem nomo?’

11, 12. (a) ?From wanem maet i had long ol yangfala blong letem Jeova i lidim olgeta? (b) Talem wan ekspiriens we i soemaot se i krangke nomo blong no obei long ol rul mo stamba loa blong Jeova.

¹¹ ?Yu yu wan yangfala insaed long ogenaesesen blong Jeova? Sipos yes, maet Setan bambae i traehad moa blong pulum yu blong ting se raet we Jeova i gat blong lidim man i no save mekem i gud long yu. “Ol krangke fasin blong ol yangfala” wetem traem we yu kasem long ol fren blong yu, i save pusum yu blong talem se ol loa blong God oli had tumas. (2 Tim. 2:22) Yu no mas letem samting ya i hapen. Traehad blong tingbaot oltaem se i waes blong folem ol samting we God i talem se oli gud blong mekem. Eksampol, Baebol i talem long yumi blong “ronwe long nogud fasin long saed blong seks.” (1 Kor. 6:18, NW) Bakegen, i gud yu tingbaot ol kwestin ya se: ‘?From wanem loa ya i waes? ?Olsem wanem mi save kasem gudfala frut taem mi obei long loa ya?’ Maet yu save samfala we oli no wantem folem ol advaes blong God nao oli kasem nogud frut from desisen we oli mekem. ?Olgeta ya oli rili hapi naoia? ?Oli gat wan laef we i gud moa long hemia we oli gat fastaem taem oli joen long ogenaesesen blong Jeova? ?Oli rili faenem sam rod blong givim glad we ol man blong God oli no faenem?—Ridim Aesea 65:14. *

¹² Traem luk toktok we Kristin sista ya Sharon i talem sam yia i pas finis. Hem i se: “From we mi no obei long loa blong Jeova, mi kasem sik ya AIDS. Oltaem mi stap lukluk bak long ol hapi yia long laef blong mi taem mi stap mekem wok blong Jeova.” Sharon i luksave se i krangke nomo blong no obei long loa blong Jeova mo se hem i sud luksave se ol loa ya oli impoten tumas. Ol loa blong Jeova oli stap blong lukaotgud long yumi. Sharon i ded seven wik afta we hem i raetem ol tok ya antap. Sharon i kasem trabol mo samting ya i soemaot long yumi se Setan i no gat wan gudfala samting blong givim long olgeta we oli kam haf blong rabis wol ya. Setan we i papa no i “stamba blong ol giaman toktok,” i mekem plante promes be hem i no holem ol promes ya olsem we hem i no holem promes ya tu we hem i bin mekem long Iv. (Jon 8:44) Tru ya, beswan samting i blong letem Jeova i lidim yumi.

Blokem Fasin Blong Folem Prapa Tingting Blong Yumi

13. ?Wetaem yumi nidim blong blokem fasin ya blong folem prapa tingting blong yumi?

¹³ Blong letem Jeova i lidim yumi, yumi mas lukaotgud long tingting ya blong independen. Fasin praod i save mekem se yumi harem olsem we yumi no nidim narafala blong i lidim yumi. Eksampol,  maet yumi kasem advaes long olgeta we oli lidim yumi insaed long kongregesen. God i mekem plan blong wan slef we i stret mo waes i givim ol kakae long saed blong spirit long stret taem. (Mat. 24:45-47, NW) Yumi mas luksave wetem tingting daon se tru long rod ya nao, Jeova i stap lukaotgud long ol man blong hem tede. Yumi mas olsem ol aposol blong Jisas we oli stap tru long hem. Taem sam disaepol oli lego Jisas, oli no moa biaen long hem, Jisas i askem ol aposol blong hem se: “?Olsem wanem long yufala? ?Yufala tu i wantem gowe long mi?” Pita i ansa se: “Masta. ?Bambae mifala i save go long hu? Yu nomo yu gat ol tok blong laef ya we i no save finis.”—Jon 6:66-68.

14, 15. ?From wanem yumi mas folem ol advaes blong Baebol wetem tingting daon?

¹⁴ Letem Jeova i lidim yumi i minim tu se yumi folem ol advaes blong hem long Baebol. Eksampol, slef we i stret mo waes i givim woning long yumi blong “yumi wekap, we hed blong yumi i klia gud.” (1 Tes. 5:6) Advaes ya i stret gud long ol lasdei ya naoia we plante man oli ‘tingbaot olgeta nomo, mo oli wantem mane tumas.’ (2 Tim. 3:1, 2) ?Olsem wanem? ?Ol samting ya oli save spolem yumi? Yes. Sipos yumi putum mak blong kasem sam samting we oli no joen wetem wok blong God, samting ya i save mekem se yumi slip mo maet yumi gat fasin blong ronem ol samting long saed blong bodi. (Luk 12:16-21) !Taswe, i waes tumas blong agri mo folem ol advaes blong Baebol mo lego ol fasin we i fulap long wol ya blong Setan hemia fasin blong laef we yumi tingbaot yumi wan nomo!—1 Jon 2:16.

¹⁵ Ol elda long ol kongregesen wanwan oli givimaot ol kakae long saed blong spirit we i kamaot long slef we i stret mo waes. Baebol i givim woning ya long yumi se: “Yufala i mas obei long olgeta we oli stap lidim yufala, mo yufala i mas stap aninit long olgeta. Olgeta ya oli stap lukaotgud long laef blong yufala, from we oli mas talemaot long God se oli holem wok ya olsem wanem. I gud yufala i mekem we ol man ya oli glad blong mekem wok ya, i nogud oli harem se oli taed long wok ya, from we samting ya i save spolem yufala.” (Hib. 13:17, NW) ?Hemia i minim se ol elda oli no save mekem mastik? !Nogat, i no minim olsem! God i save luk klia ol mastik blong olgeta i bitim wanem we yumi save luk. Nating se i olsem, God i wantem blong yumi stap aninit long olgeta. Taem yumi wok wetem ol elda, nating se oli sinman, samting ya i soemaot klia se yumi letem Jeova i lidim yumi.

Tingting Daon i Impoten Tumas

16. ?Olsem wanem yumi save soem respek long Jisas olsem Hed blong Kristin kongregesen?

¹⁶ Yumi mas tingbaot oltaem se Jisas i trufala Hed blong kongregesen. (Kol. 1:18) Hemia nao risen from wanem yumi mas stap daon aninit long ol elda, yumi mas “ona gud long olgeta from ol wok ya we oli stap mekem mo [yumi] mas lavem olgeta.” (1 Tes. 5:12, 13) I tru, ol elda long kongregesen oli soemaot tu se oli obei taem oli lukaotgud se oli tijim ol tok blong God long kongregesen, i no prapa tingting blong olgeta. Oli “no mas bitim mak blong ol tok ya we oli raetem finis,” blong leftemap sam tingting blong olgeta nomo.—1 Kor. 4:6, NW.

17. ?From wanem yumi mas lukaotgud long tingting ya blong wantem kasem haenem?

¹⁷ Evriwan insaed long kongregesen oli mas lukaotgud long fasin ya blong leftemap olgeta wan. (Prov. 25:27) Aposol Jon i tokbaot wan disaepol we i foldaon long trap ya. Hem i se: “Diotrefes, hem i laekem tumas blong i lida blong olgeta, nao hem i no save lesin long tok blong mifala. Oraet, taem mi mi kam, bambae mi talemaot . . . ol fasin we hem i stap mekem, mo bambae mi talemaot ol giaman toktok we hem i stap talem blong spolem mifala.” (3 Jon 9, 10) I gat wan lesen long stori ya we yumi tede tu, yumi save lanem. Yumi gat gudfala risen blong sakemaot eni tingting we maet yumi gat hemia blong wantem kasem haenem. Baebol i talem long yumi se: “Man we i praod bambae i kasem trabol we i spolemgud hem, mo man we i flas tumas bambae i foldaon we i foldaon olgeta.” Olgeta we oli letem God i lidim olgeta oli mas stanap strong agensem fasin ya blong folem tingting blong olgeta nomo from sipos no bambae oli save sem.—Prov. 1:2; 16:18.

18. ?Wanem bambae i halpem yumi blong letem Jeova i lidim yumi?

¹⁸ Yes, putum mak ya se bambae yu winim tingting blong wol ya we i pulum man blong folem prapa tingting blong hem nomo. Letem Jeova i lidim yu. Wanwan taem, i gud we yu tingting dip mo gat tangkiu from bigfala blesing we yu gat hemia blong mekem wok blong Jeova. Tingbaot se from we yu stap long medel blong ol man blong God, hemia i wan klia pruf se Jeova i pulum yu wetem tabu spirit blong hem. (Jon 6:44) Yu neva mas ting nating long fasin fren blong yu wetem Jeova. Mekem bes blong yu blong soemaot long olgeta haf blong laef blong yu se yu sakemaot tingting ya blong independen mo se yu letem Jeova i lidim yu.

[Futnot]

?Yu Yu Tingbaot?

• ?I minim wanem blong letem Jeova i lidim yumi?

• ?Olsem wanem fasin blong trenem tingting blong yumi i joen wetem fasin blong letem Jeova i lidim yumi?

• ?Long wanem rod Setan i traem blong spolem raet we Jeova i gat blong lidim man?

• ?From wanem tingting daon i impoten taem yumi letem Jeova i lidim yumi?

[Kwestin]