1. ?Yu bin lanem wanem long saed blong Krieta blong yumi?

SIPOS yu gruap olsem wan Witnes blong Jehova, i sua se yu lanem sam samting finis long saed blong Jehova stat taem yu smol. Yu lanem se hem nao i Krieta, hem i gat ol nambawan fasin, mo se hem i wantem mekem wol ya i kam wan Paradaes.—Jen. 1:1; Wok 17:24-27.

2. ?Sam man oli gat wanem tingting long olgeta we oli bilif se i gat wan Krieta?

² Plante man oli no bilif se i gat wan God, mo se hem nao i Krieta. Be oli bilif se laef i kamaot olsem nomo, mo se i stat long wan smol laef samting mo biaen i jenis i kam ol defdefren kaen laef samting. Sam man we oli bilif long samting ya, oli skul gud, mo oli talem se sayens i pruvum se Baebol i rong, mo se olgeta we oli bilif se i gat wan Krieta oli ol man we oli no skul, oli no gat save, o i isi blong man i trikim olgeta.

3. ?From wanem i impoten blong mekem bilif blong yumi i kam strong moa?

³ ?Olsem wanem? ?Toktok blong ol man ya we oli skul gud bambae i mekem yu yu gat tu tingting long saed blong Krieta blong yumi Jehova? Hemia i dipen long samting we i pulum yumi blong bilif se Jehova nao i Krieta. ?Yumi bilif from we narafala i talem long yumi blong bilif olsem, o from we yumi tekem taem blong stadi mo pruvum samting ya yumi wan? (1 Kor. 3:12-15) Nating se yumi stap longtaem olsem wan Witnes blong Jehova, yumi evriwan i mas gohed blong mekem bilif blong yumi i kam strong moa. Sipos yumi mekem olsem, “waes blong wol mo ol giaman tok” blong ol man ya we oli no bilif long Baebol i no save trikim yumi. (Kol. 2:8; Hib. 11:6) Stadi ya bambae i halpem yumi blong save (1) ?from wanem  plante man oli no bilif se i gat wan Krieta? (2) ?Olsem wanem yu save bilif strong moa long Jehova we i Krieta blong yu? (3) ?Olsem wanem yu save holemtaet strong bilif ya?

4. Folem Hibru 11:1, ?trufala bilif i stanap long wanem?

⁴ Sam man oli ting se bilif i min se man i bilivim wan samting we i no gat pruf blong hem. Be folem Baebol, hemia i no tru. (Ridim Hibru 11:1.) Baebol i eksplenem se bilif i stanap long pruf. Taswe nating se yumi no save luk Jehova, Jisas, mo Kingdom, be yumi gat pruf se oli tru. (Hib. 11:3) Wan saentis we i kam wan Witnes i talem se: “Ol Witnes blong Jehova oli gat pruf blong ol samting we oli bilif long hem, mo oli no sakemaot ol pruf blong ol samting we ol saentis oli faenemaot.”

5. ?From wanem plante man oli bilif se laef i kamaot olsem nomo?

⁵ Maet yumi askem se: ‘?From wanem plante man oli no bilif se God i Krietem ol laef samting, nating se i gat plante pruf i stap?’ Samfala oli neva traem faenemaot pruf olgeta wan. Robert we naoia i wan Witnes blong Jehova i talem se: “From we oli neva tokbaot kriesen long skul, mi ting se hemia i no tru. Be taem mi gat 20 yia olsem, mi storian wetem ol Witnes blong Jehova, mo mi lanem se Baebol i givim sam gudfala risen blong bilif se God i krietem evri samting.” *—Yu luk bokis ya “ Blong Ol Perens.”

6. ?From wanem sam man oli no bilif se i gat wan Krieta?

⁶ Samfala oli no bilif se i gat wan Krieta from oli talem se oli bilif nomo long samting we oli save luk. Be yet, oli bilif long ol samting we oli no save luk olsem graviti, from oli gat pruf se  samting ya i tru. Bilif we Baebol i tokbaot i stanap tu long pruf blong ol narafala samting we ‘i tru, nating se yumi no luk.’ (Hib. 11:1) I nidim plante taem mo traehad blong stadi long ol pruf ya yumi wan, be plante man oli no wantem mekem traehad ya. Wan man we i no stadi long ol pruf ya hem wan, bambae hem i save gat tingting ya se i no gat God.

7. ?I tru se olgeta man we oli skul gud oli no bilif se God nao i Krieta? Yu eksplenem.

⁷ Sam saentis oli bilif se God i krietem yunives, * afta we oli stadi long ol pruf blong samting ya. Olsem Robert we yumi tokbaot hem finis, samfala oli save talem se i no gat Krieta, from we oli neva tijing kriesen long yunivesiti. Nating se i olsem, plante saentis oli lanem sam samting long saed Jehova, mo oli lavem  hem. Olsem ol saentis ya oli mekem, yumi tu yumi mas mekem bilif blong yumi long God i kam strong moa, nomata se yumi skul gud o nogat. I no gat wan narafala man i save mekem samting ya blong yumi.

8-9. (1) ?Bambae yumi tokbaot wanem kwestin naoia? (2) Taem yu stadi long kriesen, ?hemia i halpem yu olsem wanem?

⁸ ?Olsem wanem blong mekem bilif blong yu long Krieta i kam strong moa? Bambae yumi tokbaot fo rod.

⁹ Stadi long kriesen. Yu save mekem bilif blong yu long Krieta i kam strong moa, taem yu lukluk ol animol, ol plant mo ol sta. (Sam 19:1; Aes. 40:26) Moa we yu stadi long ol samting ya, moa we bambae yu bilif strong se Jehova nao i Krieta. Yumi gat ol atikol long ol buk blong yumi we oli eksplenem ol defren samting long saed blong kriesen. I gud blong ridim ol atikol ya nating se i had blong kasemsave, mo no foget blong go long websaet blong yumi, jw.org, blong wajem ol naesfala video long saed blong kriesen we oli bin kamaot long bigfala asembli blong yumi long ol yia we i pas.

10. Talem wan eksampol we i soem se i gat wan Krieta. (Rom 1:20)

¹⁰ Taem yu stadi long kriesen, traem makem sam samting we yu save lanem long saed blong Krieta blong yumi. (Ridim Rom 1:20.) Eksampol, san i givim hit mo laet we ol laef samting long wol oli nidim, be sam laet blong san ya oli nogud. Taswe i nidim wan samting blong protektem yumi long ol laet ya. I gat wan klaod blong ol gas we i goraon long wol blong protektem yumi long ol nogud laet ya. Taem ol nogud laet ya oli kam strong moa, ol gas ya tu oli kam bigwan moa. ?Olsem wanem? ?Yu yu agri se i gat wan Krieta we i gat lav mo i waes we i wokem samting ya?

11. ?Yu save go wea blong faenem ol infomesen blong mekem bilif blong yu i kam strong moa long saed blong kriesen? (Yu luk bokis ya “ Sam Samting Blong Mekem Bilif i Strong Moa.”)

¹¹ Yu save faenem ol samting we oli save mekem bilif blong yu i strong moa long kriesen, taem yu mekem risej long Watchtower Publications Index o long jw.org. Yu save stat wetem ol atikol mo ol video long haf ya “?I Gat Wan Man We i Wokem Samting Ya?” Oli sot mo oli soem ol nambawan pruf long saed blong ol animol mo ol plant. Mo tu, i gat ol eksampol we oli soem olsem wanem ol saentis oli traem kopi ol samting we oli luk long kriesen.

12. Taem yumi stadi long Baebol, ?i gud yumi traem tingbaot wanem?

¹² Stadi long Baebol. Saentis ya we yumi tokbaot hem finis, i no bilif kwiktaem se i gat wan Krieta. I tekem sam taem bifo we hem i bilif long samting ya. Hem i se: “Bilif blong mi i no stanap nomo long ol samting we mi stadi long hem long sayens, be i stanap tu long ol samting we mi stadi long hem long Baebol.” Maet yu save finis ol tijing blong Baebol. Be nating se i olsem, blong mekem bilif blong yu i strong moa long Krieta, yu nidim blong gohed blong stadi long Tok blong Hem. (Jos. 1:8; Sam 119:97) Eksampol, traem tingbaot olsem wanem Baebol i tokbaot gud ol samting we oli bin hapen long taem bifo. Mo tu, traem tingbaot ol samting we Baebol i bin talemaot we oli stap kamtru mo olsem wanem tok blong ol defren man ya we oli raetem Baebol i joen gud. Taem yu mekem olsem, bilif blong yu i kam strong moa se i gat wan Krieta we i waes mo i gat lav we i wokem yumi, mo se Baebol i kamaot long hem. *—2 Tim. 3:14; 2 Pita 1:21.

13. Talem wan eksampol blong gudfala advaes we i stap long Baebol.

 ¹³ Taem yumi stadi long Baebol, i gud blong makem olsem wanem ol advaes blong hem oli save halpem yumi. Eksampol, Baebol i givim woning ya longtaem finis se fasin blong laekem mane tumas i nogud mo i save mekem man i “harem nogud.” (1 Tim. 6:9, 10; Prov. 28:20; Mat. 6:24) ?Woning ya i stret yet tede? Buk ya The Narcissism Epidemic i talem se: “Plante taem ol man we oli ting se mane i no impoten long laef, oli no hapi mo oli wari. Mo ol man we oli jes wantem gat moa mane, olgeta tu oli no hapi mo oli gat plante problem long helt.” !Taswe woning ya blong Baebol long saed blong mane, i wan gudfala advaes! ?Yu yu tingbaot sam narafala advaes blong Baebol we oli bin halpem yu? Taem yumi tingbaot ol gudfala advaes ya blong Baebol, bambae yumi luk se Krieta blong yumi we i lavem yumi, i save gud samting we i save mekem yumi hapi, mo oltaem bambae yumi trastem ol advaes blong hem. (Jem. 1:5) Mo hemia bambae i mekem yumi glad moa long laef blong yumi.—Aes. 48:17, 18.

14. ?Yu save lanem wanem long saed blong Jehova taem yu stadi long Baebol?

¹⁴ Taem yumi stadi, mak blong yumi i blong save gud Jehova. (Jon 17:3) Bambae yu lanem se Jehova i gat ol gudfala fasin, mo hemia ol semfala fasin ya nomo we yu faenemaot taem yu stadi long kriesen. Taem yumi save gud ol fasin blong Jehova, hemia i mekem yumi bilif strong se Jehova i rili stap. (Eks. 34:6, 7; Sam 145:8, 9) Taem yu save Jehova moa, bilif, lav, mo frensip blong yu wetem hem i kam strong moa.

15. ?Yu save kasem wanem taem yu talemaot bilif blong yu?

¹⁵ Tokbaot long ol narafala, bilif we yu gat long God. Sipos yu mekem olsem, bilif blong yu bambae i kam strong moa. ?Be olsem wanem sipos yu prij long wan man we i no sua sipos God i stap, mo yu no save wanem blong talem? Traem faenem wan vas blong Baebol we i givim ansa long kwestin ya long ol buk blong yumi, mo tokbaot wetem man ya. (1 Pita 3:15) Mo tu, yu askem wan Witnes we i gat ekspiriens blong i halpem yu. Nating se man ya i akseptem ansa ya blong Baebol o nogat, be risej ya bambae i givhan bigwan long yu. Bambae i mekem bilif blong yu i kam strong moa. Nao bambae yu no save bilivim tok blong ol man we i luk olsem se oli waes, o oli skul gud, we oli stap talem se i no gat wan Krieta.

16. ?Wanem i save hapen sipos yumi no moa gohed blong mekem bilif blong yumi i kam strong moa?

¹⁶ Nomata se yumi mekem wok blong Jehova longtaem finis, be yumi mas gohed blong mekem bilif blong yumi long hem i kam strong moa. ?From wanem? From we sipos yumi no lukaot gud, bilif blong yumi i save kam slak. Olsem yumi tokbaot finis, bilif i stanap long pruf blong ol samting we yumi no luk. Mo i isi nomo blong fogetem ol samting we yumi no luk. From samting ya, Pol i tokbaot bilif we i slak se i olsem ‘sin we i save blokem yumi isi nomo.’ (Hib. 12:1) ?So olsem wanem yumi save meksua se bilif blong yumi i stap strong oltaem?—2 Tes. 1:3.

17. ?Wanem i save halpem yumi blong holemtaet bilif?

¹⁷ Faswan, askem strong long Jehova blong i givim tabu spirit, mo yu mekem olsem oltaem. ?From wanem? From we bilif i wan long ol frut blong tabu spirit. (Gal. 5:22, 23) Yumi no save bilif strong long Krieta mo holemtaet bilif ya, sipos tabu spirit i no halpem yumi. Sipos yumi gohed blong askem tabu spirit long Jehova, bambae hem i givim long yumi. (Luk 11:13)  Yumi save prea tu se: “Yu mekem bilif blong mifala i kam strong moa.”—Luk 17:5.

18. Folem Ol Sam 1:2, 3, ?wanem sas presen we yumi kasem naoia?

¹⁸ Mo tu, yu mas mekem prapa stadi blong yu oltaem long Tok blong God. (Ridim Ol Sam 1:2, 3.) Taem oli raetem sam ya, i gat sam man Isrel nomo oli gat ful kopi blong Loa blong God. Ol king mo ol pris oli gat ol kopi, mo evri seven yia oli mekem arenjem blong “ol man, ol woman, ol pikinini,” mo ol man blong narafala kantri we oli stap long Isrel, oli kam lesin taem oli ridimaot ol Loa blong God. (Dut. 31:10-12) Long taem blong Jisas, smol man nomo oli gat ol kopi ya, mo sam oli stap long sinagog. Be tede, bighaf blong ol man oli gat haf o ful kopi blong Baebol. Hemia i wan sas presen. ?Olsem wanem yumi save soemaot se yumi glad long presen ya?

19. ?Yumi mas mekem wanem blong bilif blong yumi i stap strong oltaem?

¹⁹ Yumi soemaot se yumi glad long presen ya Baebol, taem yumi ridim evri dei. Yumi sud mekem wan program blong ridim mo stadi Baebol oltaem, be i no long taem we yumi nomo i wantem. Sipos yumi folem gud program blong yumi blong Baebol oltaem, bilif blong yumi bambae i stap strong.

20. ?Yumi gat strong tingting blong mekem wanem?

²⁰ Yumi no olsem ol man blong wol ya we “oli waes mo oli skul gud,” be yumi gat wan strong bilif we i stanap long Tok blong God. (Mat. 11:25, 26) Baebol i eksplenem from wanem wol ya i stap kam moa nogud, mo i talem samting we Jehova bambae i mekem. Taswe i gud yumi gat strong tingting blong mekem bilif blong yumi i kam strong moa, mo blong halpem plante moa man blong oli bilif long Krieta blong yumi. (1 Tim. 2:3, 4) Mo i gud yumi gohed blong wet long taem ya we olgeta laef samting long wol bambae oli presem Jehova mo oli talem tok we i stap long Revelesen 4:11 se: “Jehova God blong mifala, i stret nomo blong yu kasem glori . . . from we yu yu mekem olgeta samting.”