Mwe Bacaice Bushe Mulelunduluka lwa ku Mupashi?

ILYO Hideo aibukishe inshita aali mu gredi 7 ukufika mu gredi 9 atile: “Nelyo ca kuti nalesangwa ku kulongana kwa Bwina Kristu, nshalefwaisha ukubombela Yehova. Ilingi line nale-elenganya pa kuba uwatemwikwa nga nshi ku banandi ba mu kalasi no kwenda cilumba cilumba pamo na cikashana mu musebo. Nshakwete buyo bwine bwine, kabili nshalefwaya ukulunduluka lwa ku mupashi.” Abacaice abengi belenganya fye nga Hideo, abashifwaya kufika pa amabuyo ayali yonse ayengabanonsha nelyo kulunduluka.

Nga uli wacaice, napamo ulatemwa sana ukwangalako ifyangalo nelyo ukucitako fimo ifya kuleseshamo icitendewe. Lelo, ifya ku mupashi kwena, pambi tawafitemwa nge fi. Bushe kuti watemwisha amabuyo ya ku mupashi na yo? Tontonkanya pali aya mashiwi aya kwa kemba wa malumbo ayatila: “Ukushimika kwa kwa Yehova kwa cishinka, kulengo wapelwa amano ukubo wa mano. . . . Ifunde lya kwa Yehova lyalisanguluka, libuutusha pa menso.” (Amalumbo 19:7, 8) Icebo ca kwa Lesa kuti catungulula “uwapelwa mano” ukucite fintu mano mano, ‘ukumubuutusha pa menso.’ Cine cine ne fya ku mupashi kuti fyakucincimusha. Lelo bushe cinshi cikabilwa pa kuti cibe fi? Ni pi ufwile ukutendekela?

Kuntwa ku Mutima Ukubombela Lesa

Ica ntanshi, ufwile ukukuntwa ku mutima. Tontonkanya pa cacitile Imfumu yacaice iya Yuda Yoshia . Ilyo ibuuku lye Funde lya kwa Yehova balitulile mwi tempele, Yoshia alilibelengele kabili ifyo aumfwilemo fyalimufikile pa mutima nga nshi. E ico, “Yoshia afumishe ifya muselu fyonse mu fyalo fyonse ifyakwete abana ba kwa Israele.” (2 Imilandu 34:14-21, 33) Ukubelenga Icebo ca kwa Lesa kwaluminishe Yoshia ukucita ifingi ifyalundulwile ukupepa kwa cine.

Na iwe wine kuti walundulula ukufwaisha kwa kubombela Yehova nga ulebelenga Baibolo lyonse no kwetetula pa fyo ulebelenga. Ico e cacincishe Hideo. Atampile ukuikuminisha sana kuli painiya, umutumikishi wa nshita yonse uwa Nte sha kwa Yehova, uwamucilileko imyaka. Uyu painiya aali musambi wa Baibolo uwa mukoosha kabili alebombesha pa kuti abomfye ifufundisho fya iko mu bumi bwakwe. Ilyo akoseleshiwe apakalamba ku fyali painiya, Hideo atampile ukucita cimo cine kabili alundulwile ukufwaisha kwakosa ukwa kubombela Lesa na bantu bambi. Ukulunduluka alundulwike lwa ku mupashi kwamulengele ukuba no buyo mu bumi.

 Ukubelenga Baibolo cila bushiku kuti kwakunta abacaice ku mutima. Takahiro alondolola ati: “Ilyo lyonse naya ku kusendama kabili naibukisha ukuti nshibelengele Baibolo ubo bushiku, nalebuuka ku kuyabelenga. Ne ci calenga ndetungululwa na Yehova. Ukubelenga Baibolo cila bushiku kwalisangwilileko sana ku kulunduluka nalundulwike lwa ku mupashi. Pa kupampamina pa kulundako inshita nalepoosa mu mulimo wa kwa Yehova, natendeke bupainiya bwa nshita yonse pa numa ya kupwisha fye isukulu. Kabili ndeipakisha icine cine.”

Cinshi cimbi icingakwafwa ukukosha ukukuntwa kobe ukwa kulumbanya Yehova, ukulunda pa kubelenga Baibolo? Tomohiro asambilishiwe icine ca mu Baibolo na banyina. Atila: “Ilyo nasambilile sana ifyali mu icitabo ca Life Does Have a Purpose, ninshi ndi ne myaka 19, e lyo nakuntilwe sana ku mutima pa kutemwa kwa kwa Yehova ne lambo lya cilubula ilya kwa Yesu. Uko kutasha pa kutemwa kwa kwa Lesa kwancincishe ukwingilishako inshita nalepoosa mu mulimo wa kwa Yehova.” (2 Abena Korinti 5:14, 15) Ukupala Tomohiro, abacaice abengi balakoseleshiwa ukulunduluka lwa ku mupashi nga baletwalilila isambililo lya pa lwabo ilya Baibolo no mukoosha.

Nangu cingabe fi, cinshi wingacita nga ca kuti umutima obe ucili taulefwaya ukubombela Yehova? Bushe kuli untu wingalombako ubwafwilisho? Umutumwa Paulo alembele ati: “Pantu Lesa e ulebombela muli imwe ku kulenga mufwaye e lyo no kucita.” (Abena Filipi 2:13) Nga wapepa kuli Yehova ukuti akwaafwe, akakupeela umupashi wakwe uwa mushilo apa fye, uukakukosha te ku “kucita” fye kweka iyo, lelo no kuti ‘ufwaye’ ukucita. Ici cilepilibula ukuti umupashi wa mushilo uwa kwa Lesa ukakwafwa ukukosha ukufwaisha ufwaisha ukwa kubomba umulimo wa kwa Yehova apapela amaka yobe no kukula lwa ku mupashi. E ico kanshi, tetekela amaka ya kwa Yehova kabili kosha umutima obe!

Imikile Amabuyo we Mwine

Ilyo wapampamina pa kubombela Yehova mu kufikapo, ulekabila ukuimikila amabuyo pa kuti ulunduluke lwa ku mupashi. Mana, umukashana wa Bwina Kristu, atile: “Ukwimika amabuyo kwalengafwa sana. Ukucila kubwelela inuma, nalelunduluka mu kushipa. Pa kuba na yo mabuyo, nalepepa kuli Yehova no mukoosha ukuti antungulule, kabili nalilundulwike ukwabula no kupumbuka.”

Amabuyo wimika yafwile ukuba aya cine cine kabili ayengafikwapo. Ukubelenga icipandwa cimo ica Baibolo cila bushiku buyo bwalinga. Kuti waipeela ifikongwani fya kusapika ifyebo. Pa kuti tulangilile ici ukubomfya impapulo shabako mu ciNgeleshi, kuti pambi wasambilila imibele ya kwa Yehova iyatantikwa pe samba lya kamutwe kanono akatila “Qualities by Name” pa mutwe ukalamba uutila “Jehovah” mu citabo ca fisontelelo ica Watch Tower Publications Index. Paba imitwe 40 iyo wingabelengapo, kabili te ca kutwishika no kutwishika ukuti uku kusapika kukakupalamika kuli Yehova kabili kukakucincisha ukupoosa inshita iikalambako mu milimo umubombela. Amabuyo yambi ayengafikwapo yalesanshamo ukwasukapo nelyo muku umo fye pa kulongana kwa Bwina Kristu ukulekabila ibumba ukwasukapo, ukwishibana bwino na umo uwa mu cilonganino pa kulongana kumo na kumo, no kukanaleka ubushiku bwapita fye ukwabula ukupepa kuli Yehova no kumulandapo kuli bambi.

Nga taulalembesha mwi Isukulu lya Butumikishi Ilya Bulesa, ubo kuti bwaba buyo busuma. Bushe ulayako mu butumikishi bwa ku cintubwingi? Nga te ifyo, pambi kuti wafwaya ukubombela pa kuba kasabankanya ushabatishiwa.  Ukwetetula pali bucibusa bobe na Yehova no kuipeela kuli wene e buyo bwingakonkapo. Abacaice abengi besha apo bengapesha ukwikalilila ku kuipeela kwabo pa kutinamina umulimo wa nshita yonse.

Nangula caliwama ukwimika amabuyo mu bumi bobe, cenjela ukuti taulundulwile umutima wa kucimfyanya. Ukalasekelela sana mu fintu ulecita nga tauleilinganya kuli bambi.—Abena Galatia 5:26; 6:4.

Napamo utila tawabelesha kabili cilakwafya ukwimika amabuyo yengafikwapo. Kanshi konka ukufunda kwa Baibolo ukutila: “Teyamiko kutwi, no kuumfwe fyebo fya ba mano.” (Amapinda 22:17) Ipusha abafyashi bobe nelyo Abena Kristu bambi abakosoka ukukwafwa. Kwena, abafyashi na bantu bambi, balekabila ukuba abalinga na ba kukoselesha pa kwaafwa. Ukupatikishiwa ukufisha ubuyo bambi bemike kuti kwakungumanika abacaice no kucimfya ubufwayo bwa kuimikila amabuyo. Ico e cacitikile umukashana umo, uwatile: “Abafyashi bandi balenjimikila amabuyo ayengi, pamo nga ukulembesha mwi Sukulu lya Butumikishi Ilya Bulesa, ukubombako mu mulimo wa mwi bala, ukubatishiwa, no kuba painiya. Nalebombesha sana pa kuti mfike pa buyo bumo na bumo. Ilyo nafika pa buyo bumo, abafyashi bandi tabalentasha, lelo, balembikilapo ubuyo na bumbi ubwa kuwishikana na bo. Ne ci, canengele ukuumfwa ukuti nalepatikishiwa fye ukufika pa mabuyo. Nalifunshike kabili naleyumfwa ngo ushilecita cintu.” Cinshi calubene? Amabuyo yonse yaali fye bwino, lelo tayaali yakwe. Pa kuti utunguluke, we mwine ufwile wakuntwa ukuimikila ubuyo bobe!

Tontonkanya pali Yesu Kristu. Ilyo aishile pe sonde, alishibe ico wishi, Yehova, alefwaya ukuti acite. Ukucita ukufwaya kwa kwa Yehova, tabwali fye buyo kuli Yesu, lelo wali mulimo aali no kufishapo. Bushe Yesu alemona shani umulimo apeelwe? Atile: “Ica kulya candi kucito kufwaya kwa wantumine no kupwisho mulimo wakwe.” (Yohane 4:34) Yesu abekelwe mu kucita icalefwaya Yehova no kwikalilila ku fyo Wishi ale-enekela. Kwali nge filyo kuli Yesu—aleipakisha no kwikushiwa pa kupwisha umulimo wale-enekelwa ukucitwa na wene. (AbaHebere 10:5-10) Na iwe wine kuti wabekwa nga wacincishiwa bwino ukucita ico abafyashi bobe balekukoselesha ukucita.

Winenuka mu Kucite Cawama

Ilyo waimika ubuyo, bombesha ku kubufishapo. Pa Abena Galatia 6:9 patila: “E ico twinenuka mu kucite cawama, pantu mu nshita yalinga tukalobolola nga tatutompweke.” Wishintilila fye pa bukose bobe nelyo amaka. Ukaponenwa na mafya kabili limo limo kuti wafilwa fye no kufilwa. Lelo Baibolo yatulaya ati: “uko konse wenda umwishibe [Lesa], na o akatambalike nshila shobe.” (Amapinda 3:6) Yehova akakutungilila ilyo ulebombesha ukufika pa mabuyo ya ku mupashi ayo waimika.

Cine cine, nga walundulula ukufwaisha kwa kubombela Yehova no kutinamina amabuyo ya ku mupashi, ukalenga ‘ukulunduluka kobe ukumoneka kuli bonse.’ (1 Timote 4:15) E lyo ukaipakisha ubumi bwaba no buyo mu mulimo wa kwa Lesa.

[Icikope pe bula 9]

Ukubelenga Baibolo no kwetetula pa fyo ubelengele kukakucincisha ukubombela Yehova

[Icikope pe bula 10]

Yesu afishishepo ico Wishi amwenekeele ukucita