Amapinda 29:1-27
29 Umuntu uushifwaya ukwaluka* pa numa ya kumulungika imiku iingi,+Akafunika mu kupumikisha kabili takapole.+
2 Abalungama nga bafula, abantu balasekelela,Lelo umubifi nga aleteka, abantu balateta.+
3 Uwatemwa amano alalenga wishi alasekelela,+Lelo uwangala na bacilende alonaula ifyuma fyakwe.+
4 Imfumu nga ili no mulinganya ubufumu bwa iko bulakosa,+Lelo uwatemwa amafisakanwa alabuwisha.
5 Umuntu uutasha umunankwe mu bumbimunda,Afungulwila isumbu ku makasa ya munankwe.+
6 Imembu isho umubifi acita, citeyo kuli ena,+Lelo uwalungama alemba kabili alasekelela.+
7 Uwalungama alabika amano ku nsambu isho abapiina bakwata,+Lelo umubifi ena tabikako amano.+
8 Abayumfwa balenga mu musumba mwaba ukuumana ne fimfulunganya,+Lelo aba mano balenga abantu banashako ubukali.+
9 Uwa mano nga alelubulula no muwelewele,Kuba fye ukukalipa no kulanda ifyabipa, tamufuma ifisuma.+
10 Abepaya abantu balipata uwa kaele,*+Kabili bafwaya ukwipaya* uwalungama.*
11 Umuwelewele alafumya ubukali bwakwe bonse,*+Lelo uwa mano alailama.+
12 Kateka nga alebika amano ku fya bufi,Ababomfi bakwe bonse bakaba ababifi.+
13 Muli ici e mo umupiina no ucusha abantu baba cimo cine:*
Yehova e upeela amenso yabo ulubuuto.*
14 Imfumu nga tailefyenga abapiina pa kubapingula,+Icipuna ca iko ica bufumu cikatwalilila ukubako.+
15 Ubwembya* no kulungika filenga umuntu aba na mano,+Lelo umwana uo bashisalapula alaseebanya nyina.
16 Ababifi nga bafula, ifyabipa na fyo filafula,Lelo abalungama bakamona uko ababifi bakawa.+
17 Salapula umwana obe, na o akalenga ukatuushe;Kabili akalenga ukasansamuke nga nshi.*+
18 Apashili ubutungulushi bwa kwa Lesa,* abantu tabailama+Lelo abakonka amafunde balaba ne nsansa.+
19 Umubomfi taleka amashiwi yamulungika,Nangu ca kuti alayomfwa, tayakonka.+
20 Bushe walimonapo umuntu uulanda ukwabula ukutontonkanya pa fyo alalanda?+
Ku watumpa kwaliba isubilo lya kutila kuti ayaluka ukumucila.+
21 Umubomfi nga balimutumpika ukutula ku bwaice,Pa numa takaletasha.
22 Umuntu uukalipa bwangu alenga kwaba ukukansana,+Uwa cipyu alacita ifyabipa ifingi.+
23 Amatutumuko ya muntu yakalenga akaicefye,+Lelo uwaicefya bakamucindamika.+
24 Uwangala no mupuupu ali-ipata.*
Nga bamweba ukuti alondolole ifishinka* talanda nangu cimo.+
25 Ukututuma* abantu citeyo,*+Lelo uucetekela Yehova akacingililwa.+
26 Abantu abengi balafwaya ukulanda na kateka pa kuti abafwe,*Lelo uupingula bwino umuntu ni Yehova.+
27 Abalungama bamona uwa lufyengo ukuti wa bunani,+Ababifi nabo bamona uucita ifyalungama ukuti wa bunani.+
Amafutunoti
^ Mu ciHebere, “uutalamika umukoshi wakwe.”
^ Nelyo “uwabula umulandu.”
^ Nelyo “bafwaya ukwipaya umweo wa walungama.”
^ Nelyo kuti yapilibula no kuti, “Lelo uwalungama afwaya ukucingilila umweo wakwe.”
^ Mu ciHebere, “umupashi wakwe onse.”
^ Mu ciHebere, “bakumana pamo.”
^ E kutila, alabapeela ubumi.
^ Nelyo “Ukusalapula; Ukukanda.”
^ Nelyo “akalenga umweo obe ukasansamuke nga nshi.”
^ Nelyo “icimonwa ca busesemo; ukusokolola.”
^ Nelyo “alipata umweo wakwe.”
^ Nelyo “aumfwa umulapo wa kulapisha.”
^ Nelyo “Ukutiina.”
^ Nelyo “kulateya iciteyo.”
^ Nelyo kuti yapilibula no kuti, “balafwaya ukuti kateka abe ne cikuuku kuli bena.” Mu ciHebere, “balafwaya icinso ca kwa kateka.”
