Amapinda 16:1-33
16 Umuntu e upekanya amatontonkanyo mu mutima wakwe,Lelo ifyo asuka* fifuma kuli Yehova.+
2 Umuntu amona inshila shakwe shonse ukuti shalilungama,*+Lelo Yehova e uceeceeta ifilenga umuntu acita fimo.*+
3 Bika mu maboko ya kwa Yehova fyonse ifyo ucita,*+E lyo fyonse ifyo upanga ukucita fikenda bwino.
4 Yehova alabomfya ifintu fyonse pa kuti ifyo alefwaya ficitike,Kabili akashininkisha ukuti ababifi bonse baonaulwa.+
5 Onse uwaba no mutima wa cilumba wa bunani kuli Yehova.+
Nangu cibe shani bakamukanda.
6 Ukutemwa ukushipwa ne cishinka e fifimba pa filubo,+Kabili umuntu nga aletiina Yehova alataluka ku fyabipa.+
7 Yehova nga atemwa ifyo umuntu acita,Alalenga na balwani bakwe balaumfwana nankwe.+
8 Cawama ukukwata ifinono, lelo ulecita icalungama,+Ukucila ukukwata ifingi, lelo ulecita ifyabipa.+
9 Umuntu kuti apanga ifya kucita mu mutima wakwe,Lelo Yehova e utungulula intampulo shakwe.+
10 Ubupingushi ubwafuma kuli Lesa e bufwile ukuba pa milomo ya mfumu;+Taifwile ukulafyenga abantu.+
11 Amasekelo ayalungama ya kwa Yehova;E mwine wa mabwe ya kupiminako yonse aya mu mufuko.+
12 Imfumu ishisuma shalipata sana ifyabipa,+Pantu ubulungami e bukosha icipuna ca bufumu ca shiko.+
13 Abantu nga balanda ifyalungama imfumu shilasekelela;
Shalitemwa uulanda icishinka.+
14 Ubukali bwa mfumu bwaba nge nkombe ya mfwa,+Lelo uwa mano alalenga yacefyako ubukali.*+
15 Ulubuuto lwa cinso ca mfumu lulalenga umuntu apaalwa,Icikuuku ca iko caba nge kumbi lya mfula ya kulekelesha.+
16 Ukunonka amano kwawamapo ukucila ukunonka golde!+
Ukunonka ukwiluka kwawamapo ukucila ukunonka silfere.+
17 Ukutaluka ku fyabipa e nshila ya balungama.
Uucingilila inshila yakwe alasungilila umweo wakwe.+
18 Icilumba citungulula ku kuwa,No mupashi wa kuitutumuna utungulula ku kuipununa.+
19 Cawama ukuicefya no kuba pamo na bafuuka,+Ukucila ukwakana ifipe ifyo aba matutumuko bapokele abo bacimfishe.
20 Umuntu uwiluka, ifintu filamwendela bwino,*Kabili wa nsansa uucetekela Yehova.
21 Uwa mutima wa mano bakamwita ukuti aleluka,+Kabili uuba ne cikuuku pa kulanda* alalenga abantu balafwaisha ukumfwa ifyo alelanda.+
22 Ukwiluka kwaba nga kamfukumfuku ka mweo ku beluka,Lelo ifyo abawelewele bacita e fibasalapula.
23 Uwa mano alasala bwino amashiwi ya kulanda,+Kabili alalenga abantu balafwaisha ukumfwa ifyo alelanda.
24 Amashiwi ayasuma yaba ngo luto lwa buci,Yomfwika ayalowa ku mweo* kabili yalaposha amafupa.+
25 Umuntu kuti alatontonkanya ukuti ale-enda mu nshila iyalungama,Lelo iyo nshila itwala ku mfwa.+
26 Umuntu alabombesha pa kuti alekwata ifya kulya,Pantu insala* ilalenga alebombesha.+
27 Umuntu* icinangwa ashula ifyabipa;+Ifyo alanda fyaba ngo mulilo uulebilima.+
28 Uuleta ifimfulunganya* alenga abantu balaumana,+Kabili uwa lwambo alenga ababa ifibusa sana bapatana.+
29 Umunkalwe alasembeleka umunankwe,Kabili alenga aya mu nshila iyabipa.
30 Alakapakapa ilyo alepanga ukucita ifyabipa.
Alasuma imilomo yakwe ilyo alecita ifyabipa.
31 Imfwi cilongwe icayemba*+Nga ca kuti uukwete isho imfwi enda mu nshila iyalungama.+
32 Uukokola ukukalipa+ awamapo ukucila umwaume wa maka,No ulama ubukali bwakwe* awamapo ukucila uwacimfya umusumba.+
33 Abantu bapoosa ica kupendwilako pa matanta,+Lelo uupingula fyonse ni Yehova.+
Amafutunoti
^ Nelyo “Icasuko icalungama.” Mu ciHebere, “Ifyo ululimi lwasuka.”
^ Mu ciHebere, “shalisanguluka.”
^ Mu ciHebere, “e uceeceeta imipashi.”
^ Mu ciHebere, “Tuulila Yehova imilimo yobe.”
^ Nelyo “alataluka ubukali bwa iko.”
^ Mu ciHebere, “alasanga icisuma.”
^ Nelyo “uulanda ifisuma.” Mu ciHebere, “ukulowa kwa milomo.”
^ Mu ciHebere, “akanwa.”
^ Nelyo “Umweo.”
^ Nelyo “Uupanga ukucita ifyabipa.”
^ Nelyo “cilongwe ca bukata.”
^ Mu ciHebere, “uuteka umupashi wakwe.”
