Amapinda 10:1-32
10 Amapinda ya kwa Solomone.+
Umwana umwaume uwa mano alalenga wishi asekelela,+Lelo umwana umwaume umuwelewele alalenga nyina aba no bulanda.
2 Ifyo umuntu anonka mu bubifi tafyakamwafwe,Lelo ubulungami e bupokolola umuntu ku mfwa.+
3 Yehova takaleke uwalungama* akabe ne nsala,+Lelo akatana umubifi ifyo afwaisha.
4 Umunang’ani akaba umupiina,+Lelo uubombesha akaba umukankaala.+
5 Umwana wa mano asombola ifya kulya mu lusuba,Lelo umwana uulaala mu nshita ya kusombola+ ailetela umuseebanya.
6 Amapaalo yaba pa mutwe wa walungama,+Lelo akanwa ka mubifi kafisa ulukakaala.
7 Uwalungama bakamwibukisha kabili bakamupaala,+Lelo ishina lya mubifi likabola.+
8 Umuntu wa mano alasumina nga bamupandako amano,*+Lelo uulanda ifya buwelewele akacula.+
9 Uwa kaele akekala umutende,+Lelo uwa bucenjeshi bakamwikata.+
10 Uushinisha ku linso lyakwe alaleta ubucushi,+Kabili uulanda ifya buwelewele akacula.+
11 Akanwa ka walungama ni ntulo ya bumi,+Lelo akanwa ka mubifi kafisa ulukakaala.+
12 Ulupato e lulenga kwaba ukuumana,Lelo ukutemwa kufimba pa filubo fyonse.+
13 Amano yaba pa milomo ya muntu uwiluka,+Lelo inkonto yabelako inuma ya ushakwata mano.*+
14 Aba mano balasunga ukwishiba,+Lelo akanwa ka muwelewele kalamuletelela.+
15 Ifyuma fya mukankaala* fyaba ngo musumba wakwe uwacingililwa.
Ubupiina bwa bapiina e bulenga balecula.+
16 Ifyo uwalungama acita fitwala ku mweo;Lelo ifyo umubifi akwata fitwala ku lubembu.+
17 Uumfwa nga bamusalapula alatungulula abantu mu nshila ya ku mweo,*Lelo uushifwaya ukumfwa nga bamulungika alalufya abantu.
18 Uufisa ulupato lwakwe alanda ifya bufi,+Kabili uutandanya amalyashi ayabipa pa bantu* muwelewele.
19 Umuntu nga alelanda sana kuti abembuka,+Lelo uulama akanwa kakwe wa mano.+
20 Ululimi lwa walungama lwaba nga silfere iisuma sana,+Lelo umutima wa mubifi wa mutengo uunono fye.
21 Imilomo ya walungama ilafwa* abengi,+Lelo umuwelewele alafwa pa mulandu wa kuti takwata mano.+
22 Yehova nga apaala umuntu, ifintu filamwendela bwino,+Kabili uo apaala tacula.*
23 Umuwelewele amona ukucita ifyabipa kwati bwangalo,Lelo umuntu wa mano aleluka ifintu.+
24 Ifyo umubifi atiina e fikamucitikila;Lelo uwalungama bakamupeela ifyo afwaya.+
25 Icikuuku ca mwela nga caisa, umubifi akaloba,+Lelo uwalungama aba ngo mufula umuyayaya.+
26 Nga filya umwangashi uwakantuka umfwika mu meno kabili nga filya icushi cumfwika mu menso,E fyo no utuma umunang’ani omfwa.*
27 Ukutiina Yehova kulalenga umuntu aikala inshiku ishingi,+Lelo imyaka ya mubifi bakaipifya.+
28 Ifyo abalungami benekela* filalenga baba ne nsansa,+Lelo ifyo ababifi basubila tafyakacitike.+
29 Ifyo Yehova acita filacingilila uwa kaele,+Lelo filalenga uucite fyabipa aloba.+
30 Uwalungama tabakatale abamuwisha,+Lelo umubifi takatwalilile ukwikala pe sonde.+
31 Akanwa ka walungama kalanda ifya mano,*Lelo ululimi lwabipa bakaluputula.
32 Imilomo ya walungama yalishiba ukulanda ifisuma,Lelo akanwa ka mubifi ka bucenjeshi.
Amafutunoti
^ Nelyo “umweo wa walungama.”
^ Mu ciHebere, “alasumina amafunde.”
^ Nelyo “uwakwata umutima uufwaya ifyabipa.”
^ Nelyo “Icintu ca mutengo ico uwa fyuma akwata.”
^ Nelyo kuti yapilibula no kuti, “enda mu nshila ya ku mweo.”
^ Nelyo “uutandanya amang’umfung’umfu.”
^ Nelyo “ilatungulula.”
^ Nelyo “taba no bulanda.”
^ Nelyo “E fyo no waingisha incito umunang’ani omfwa.”
^ Nelyo “basubila.”
^ Nelyo “katwala icisabo ca mano.”
