Biblu’n i su kosan’m be su tɛlɛ
?Ngue yɛle jɔlɛ dilɛ cɛn’n?
Laa’n, kɛ Izraɛlifuɛ’m be kpɔfuɛ’m bé klé be yalɛ’n, Ɲanmiɛn mannin be jɔlɛ difuɛ mun naan be de be. (Jɔlɛ Difuɛ Mun 2:18) Biblu’n kan kɛ Ɲanmiɛn Zoova w’a sie jɔlɛ dilɛ cɛn kun. Blɛ sɔ’n nun’n, Zoova m’ɔ di asiɛ’n sufuɛ’m be jɔlɛ’n, ɔ́ dé sran mun. Ɔ maan, aklunjuɛ’n yó dan.—An kanngan Jue Mun 96:12, 13, ɔ nin Ezai 26:9 be nun.
Ɲanmiɛn sieli Zezi kɛ ɔ di be nga be ɲin o su’n, ɔ nin be nga be wuli’n be jɔlɛ weinwein. (Sa Nga Be Yoli’n 10:42; 17:31) Sran kpanngban b’a siman Ɲanmiɛn naan b’a wu. Jɔlɛ dilɛ cɛn’n nun’n, Zezi cɛ́n i sɔfuɛ mun naan be si Ɲanmiɛn naan be klo i.—An kanngan Sa Nga Be Yoli’n 24:15 nun.
?Ngue ti yɛ Zezi fá afuɛ akpi dí sran’m be jɔlɛ ɔ?
Afuɛ akpi nga Zezi fá dí famiɛn’n, i nun yɛ ɔ́ cɛ́n be nga be wuli’n mun ɔn. (Sa Nglo Yilɛ 20:4, 12) Kpɛkun, bé klé be Ɲanmiɛn i mmla mun naan be nanti be su. Jɔlɛ dilɛ cɛn’n i su ndɛ nga sran’m be kan’n, nɛ́n i yɛ Biblu’n kan ɔn. Biblu’n kle kɛ, kɛ Zezi ko cɛn sran kun’n, wafa nga sran sɔ’n nánti’n i su yɛ ɔ́ jrán ɔ́ dí i jɔlɛ ɔ.—An kanngan Rɔmfuɛ Mun 6:7 nun.
Biblu’n kan jɔlɛ dilɛ cɛn kun ekun i ndɛ. Cɛn sɔ’n fú sran’m be nun, yɛ ɔ́ jú ka naan afuɛ akpi’n w’a bo i bo. Be flɛ cɛn sɔ’n i ekun kɛ mɛn’n i awieliɛ. Fluwa nga nun’n, ndɛ akpasua klikli’m be kan cɛn sɔ’n i ndɛ. Cɛn sɔ’n nun’n, Ɲanmiɛn núnnún be nga be sromɛn i’n be kwlakwla. (2 Piɛr 3:7) I sɔ’n ti’n, ɔ fata kɛ e yo sa ng’ɔ kle kɛ e sro Ɲanmiɛn naan e klo i’n.—An kanngan 2 Piɛr 3:9, 13 nun.