Jesus het verduidelik hoe ons sou weet “dat die Koninkryk van God naby is” (Lukas 21:31). Hy het voorspel dat daar byvoorbeeld groot oorloë, groot aardbewings, voedseltekorte en vreeslike siektes sou wees – die einste dinge wat ons vandag sien. – Lukas 21:10-17.

Die Bybel wys ook dat die “laaste dae” van vandag se regerings geïdentifiseer sou word deur mense se slegte gedrag. Jy kan lees hoe hierdie mense beskryf word in 2 Timoteus 3:1-5. Wanneer jy sien hoe mense vandag dink en optree, stem jy sekerlik saam dat hierdie Bybelprofesie grootliks ooreenstem met wat vandag gebeur.

Wat beteken dit? God se Koninkryk sal binnekort groot veranderinge maak wat die lewe op die aarde baie beter sal maak (Lukas 21:36). In die Bybel belowe God goeie dinge vir die aarde en vir die mense wat daarop lewe. Hier is ’n paar voorbeelde.

“En aan hom [Jesus] is heerskappy, eer en ’n koninkryk gegee, sodat al die volke, nasies en taalgroepe hom sal dien. Sy heerskappy is ’n ewige heerskappy wat nie tot ’n einde sal kom nie, en sy koninkryk sal nie vernietig word nie.” – DANIËL 7:14.

Wat dit beteken: Jy kan die lewe geniet onder ’n beter regering wat God oprig, met sy Seun as Koning. Hierdie regering sal oor die hele aarde regeer.

“Geen inwoner sal sê: ‘Ek is siek’ nie.” – JESAJA 33:24.

Wat dit beteken: Jy sal nooit siek word of gestremd wees nie. Jy sal kan lewe sonder om ooit te sterf.

“Hy maak regoor die aarde ’n einde aan oorloë.” – PSALM 46:9.

Wat dit beteken: Oorloë en al die lyding wat daardeur veroorsaak word, sal nie meer bestaan nie.

“Die goddeloses sal nie meer bestaan nie. . . . Die nederiges sal die aarde besit.” – PSALM 37:10, 11.

Wat dit beteken: Daar sal nie meer slegte mense wees nie. Daar sal net mense wees wat graag aan God gehoorsaam wil wees.

“Hulle sal huise bou en daarin woon, en hulle sal wingerde plant en die vrugte daarvan eet.” – JESAJA 65:21, 22.

Wat dit beteken: Die hele aarde sal pragtig gemaak word. God sal ons gebed dat sy wil “op die aarde” moet plaasvind, beantwoord. – Matteus 6:10.