Cabanga ngalokhu okulandelayo okumayelana nabaholi benkolo abavelele nempi ese-Ukraine:

•   “UPatriarch Kirill, ongumphathi weSonto Lobu-Orthodox LaseRussia, akakasho lutho oluhlaba isenzo seRussia sokugasela e-Ukraine. . . . ISonto lakhe liqhubekile nokusakaza amanga nge-Ukraine, uPutin lokho ukusebenzise njengesizathu sokuqhubeka nale mpi.”—Iphephandaba i-EUobserver, Mashi 7, 2022.

•   “UPatriarch Kirill . . . ubeke isizathu esivuna ukuhlasela kwezwe lakhe i-Ukraine ngokuthi athi le mpi iyingxenye yemizamo yokulwa nesono.”—I-AP News, Mashi 8, 2022.

•   “NgoMsombuluko, umholi weSonto Lobu-Orthodox Lase-Ukraine, u-Epiphanius I oyiMetropolitan of Kyiv, ubusise abase-Ukraine ‘empini abayilwa neRussia’ . . . uze wathi ukubulala amasosha aseRussia akusona isono.”—IJerusalem Post, Mashi 16, 2022.

•   “[SiwuMkhandlu WamaSonto Nezinhlangano Zenkolo Wase-Ukraine (UCCRO)] siyaweseka amaSosha Ase-Ukraine nabo bonke abavikela izwe lethu, siyayibusisa imizamo yabo yokuvikela i-Ukraine kulesi sitha, siyabathandazela.”—Amazwi e-UCCRO, a Febhuwari 24, 2022.

 UCabangani? Ingabe izinkolo ezithi zilandela uJesu Kristu kufanele zikhuthaze amalungu azo ukuba aye empini? Lithini iBhayibheli?

Umlando wenkolo empini

 Umlando uveza ukuthi inkolo ivamise ukukwamukela ukuthi abantu baye empini, noma ize iyikhuthaze impi, ibe yenza sengathi ifuna kube nokuthula. Sekuphele amashumi eminyaka, oFakazi BakaJehova bedalula lobo buzenzisi bamasonto. Cabanga nganazi izibonelo ezimbalwa ezitholakala ezincwadini zethu.

•   “IziMpi Zenkolo—‘Ukuzikhohlisa Okusabekayo’” lesi sihloko sibonisa ukuthi iSonto LamaRoma Katolika yilona elabangela ukuba kubulawe abantu ngonya egameni likaNkulunkulu nelikaKristu.

•   “ISonto LamaKatolika E-Afrika” lesi sihloko sichaza indlela inkolo ehluleke ngayo ukunqanda impi yezizwe, ngisho nokuqothulwa kohlanga.

•   Izihloko ezithi “Ingabe Kufanele Kusolwe Inkolo?,” “Indima Yenkolo Ezimpini Zabantu,” nesithi “Inkolo Ithatha Uhlangothi” zichaza indlela abefundisi bamaKatolika, beSonto lobu-Orthodox, namaProtestani abasekele ngayo zombili izinhlangothi ezimpini eziningi.

Ingabe izinkolo zobuKristu kufanele zeseke impi?

 Okwafundiswa uJesu: “Kumelwe uthande umakhelwane wakho njengoba uzithanda wena.” (Mathewu 22:39) “Qhubekani nithanda izitha zenu.”—Mathewu 5:44-47.

 Okwashiwo uJesu: “UMbuso wami awuyona ingxenye yaleli zwe. Ukube uMbuso wami ubuyingxenye yaleli zwe, izikhonzi zami ngabe zilwile ukuze nginganikelwa.” (Johane 18:36) “Bonke abaphatha inkemba bayofa ngenkemba.”—Mathewu 26:47-52.

 Cabanga ngalokhu: Uma amaKristu engakwazanga ngisho nokulwela uJesu, kukhona yini okudlula lokho angakulwela? Funda isihloko esithi “Ingabe Impi Iyahambisana NobuKristu?” ukuze ubone indlela amaKristu okuqala asilandela ngayo ngokwethembeka isibonelo sikaJesu kanye nezimfundiso zakhe.

Kuzokwenzekani ngezinkolo ezikhuthaza impi?

 IBhayibheli lisitshela ukuthi uNkulunkulu uyazichitha izinkolo ezithi zimelela uJesu zibe zingakwenzi lokho akufundisayo.—Mathewu 7:21-23; Thithu 1:16.

•   Incwadi yesAmbulo ibonisa ukuthi uNkulunkulu uzibeka icala lezo zinkolo ngokufa kwabo “bonke abaye babulawa emhlabeni.” (IsAmbulo 18:21, 24) Ukuze uthole ukuthi kungani enza lokho, funda isihloko esithi “Liyini IBhabhiloni Elikhulu?”

•   UJesu wabonisa ukuthi zonke izinkolo uNkulunkulu angazamukeli ziyobhujiswa ngenxa yemisebenzi yazo emibi, njengoba nje isihlahla esibolile esithela izithelo ezibolile ‘sigawulwa siphonswe emlilweni.’ (Mathewu 7:15-20) Funda isihloko esithi “Ukuphela Kwenkolo Yamanga Kuseduze!” ukuze ubone ukuthi kuzokwenzeka kanjani lokhu.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images