XANA u nga tiphina loko wo tihanyela hi ku rhandza? Xana yi kona minkarhi leyi u navelaka onge ku nga va ku nga ri na munhu loyi a ku byelaka leswaku u endla yini? Ndzi kombela u ndzi byela leswaku wena u swi vonisa ku yini.—

Kambe, i yini lexi xi antswaka eka wena? Xana i vutlhari hakunene ku endla xin’wana ni xin’wana lexi u xi lavaka? Kumbe swilo swi ku fambela kahle loko u yingisa tata wa wena ni mana wa wena?— Xikwembu xi vula leswaku u fanele u yingisa vatswari va wena, kutani ku fanele ku ri ni xivangelo lexinene xo endla sweswo. A hi voneni loko hi ta swi kota ku twisisa xivangelo xa kona.

U ni malembe mangani?— Xana wa swi tiva leswaku tata wa wena u ni malembe mangani?— Xana mana wa wena kumbe vakokwa wa wena va ni malembe mangani?— Va hanye nkarhi wo leha ku tlula wena. Loko munhu a hanya nkarhi wo leha u va ni nkarhi lowu engetelekeke wo dyondza swilo. Lembe ni lembe u twa swilo swo tala, a vona swilo swo tala a tlhela a endla swilo swo tala. Hikwalaho, vantshwa va nga dyondza eka lavakulu.

Xana u tiva munhu un’wana loyi a nga ntsongo eka wena?— Xana u tiva swo tala ku n’wi tlula?— Ha yini swi ri tano?— Hikuva u hanye nkarhi wo leha ku n’wi tlula. U ve ni nkarhi wo tala wo dyondza swilo ku tlula munhu lontsongo eka wena.

 I mani loyi a hanyeke nkarhi wo leha ku tlula wena, mina kumbe munhu wihi ni wihi?— I Yehovha Xikwembu. U tiva swilo swo tala ku ku tlula, naswona u tiva swilo swo tala ku ndzi tlula. Loko a hi byela leswaku hi endla swo karhi, hi fanele hi tiyiseka leswaku i swinene, hambiloko swi nonon’hwa ku swi endla. Xana wa swi tiva leswaku hambi ku ri Mudyondzisi Lonkulu nkarhi wun’wana u swi kume swi nonon’hwa ku yingisa?—

Siku rin’wana Xikwembu xi kombele Yesu leswaku a endla nchumu wun’wana wo tika swinene. Yesu u khongerile malunghana ni nchumu lowu, hilaha hi swi vonaka hakona laha. U khongele a ku: “Loko u swi rhandza, susa xinwelo lexi eka mina.” Hi ku khongela hi ndlela leyi, Yesu a a kombisa leswaku a hi minkarhi hinkwawo swi olovaka ku endla ku rhandza ka Xikwembu. Kambe Yesu u xi gimete njhani xikhongelo xa yena? Xana wa swi tiva?—

Yesu u xi gimete hi ku vula a ku: “Ku nga endleki ku rhandza ka mina, kambe a ku endleke ka wena.” (Luka 22:41, 42) Ina, a a lava leswaku ku endliwa ku rhandza ka Xikwembu, ku nga ri ka yena. Naswona u ye emahlweni a endla ku rhandza ka Xikwembu ematshan’weni yo endla leswi a ehleketaka leswaku swa antswa.

Xana hi nga dyondza yini eka leswi?— Hi dyondza leswaku i swinene ku endla leswi Xikwembu xi hi byelaka swona minkarhi hinkwayo, hambiloko swi vonaka onge swa tika ku swi endla. Kambe hi tlhela hi dyondza swin’wana. Xana wa swi tiva swilo swa kona?— Hi dyondza leswaku Xikwembu na Yesu i vanhu vambirhi lava hambaneke, a hi munhu un’we hilaha vanhu van’wana va vulaka hakona. Yehovha Xikwembu hi lonkulu naswona u tiva swilo swo tala ku tlula leswi N’wana wa yena Yesu a swi tivaka.

 Loko hi yingisa Xikwembu, hi kombisa leswaku ha xi rhandza. Bibele yi ri: “Ku rhandza Xikwembu, hi kona ku hlayisa swileriso swa xona.” (1 Yohane 5:3) Waswivo, hinkwerhu hi fanele hi yingisa Xikwembu. Wa swi lava ku xi yingisa, a hi swona ke?—

A hi pfule Bibele ya hina kutani hi vona leswi Xikwembu xi byelaka vana leswaku va swi endla. Hi ta hlaya leswi Bibele yi swi vulaka eka Vaefesa ndzima 6, tindzimana 1, 2 na  3. Yi ri: “Vana, yingisani vatswari va n’wina evun’weni ni Hosi, hikuva leswi swi lulamile: ‘Xixima tata wa wena ni mana wa wena’; ku nga xileriso xo sungula lexi nga ni xitshembiso: ‘Leswaku swi ku fambela kahle ni leswaku u tshama nkarhi wo leha emisaveni.’”

Waswivo, i Yehovha Xikwembu hi byakwe loyi a ku byelaka leswaku u yingisa tata wa wena ni mana wa wena. Xana ku va “xixima” swi vula yini? Swi vula leswaku u va komba xichavo. Naswona Xikwembu xa tshembisa leswaku loko wo yingisa vatswari va wena, swilo swi ta “ku fambela kahle.”

Sweswi ndzi lava ku ku byela swo karhi hi vanhu van’wana lava va poniseke vutomi bya vona hikwalaho ko yingisa. Vanhu lava va hanye enkarhini wa khale swinene, emutini lowukulu wa Yerusalema. Vanhu vo tala emutini wolowo a va xi yingisanga Xikwembu, xisweswo Yesu u va lemukise leswaku Xikwembu xi ta lovisa muti wa vona. Yesu u tlhele a va byela leswaku i yini lexi va nga xi endlaka leswaku va pona. U te: ‘Loko mi vona Yerusalema wu rhendzeriwa hi mavuthu lama goveke, swi tiveni leswaku ku lovisiwa ka wona ku tshinele. Kutani i nkarhi wa leswaku mi huma eYerusalema mi balekela etintshaveni.’—Luka 21:20-22.

Xisweswo, hilaha Yesu a vuleke hakona, masocha ma tile eYerusalema. Masocha lawa ya Varhoma ma fike ma rhendzela muti hinkwawo. Hiloko mo na swi pfuketana ma tlhelela endzhaku. Vanhu vo tala a va anakanya leswaku khombo se ri hundzile. Hiloko va tshama emutini va nga humi. Kambe i yini leswi Yesu a a lerise leswaku va swi endla?— Xana wena a wu ta va u endle yini loko a wu ri eYerusalema?— Lava va yingiseke Yesu va siye makaya ya vona kutani va balekela etintshaveni leti nga ekule ni muti wa Yerusalema.

 Ku hele lembe hinkwaro ku nga si humelela nchumu eYerusalema. Lembe ra vumbirhi na rona ri fikile ri tlhela ri hundza. Lembe ra vunharhu na rona ri fika, kambe ko fana ni kwala. Vanhu van’wana va nga ha va va anakanye leswaku lava va balekeke va huma emutini a va ri swiphukuphuku. Kambe hi lembe ra vumune, masocha ya Varhoma ma tlhele ma vuya. Hiloko ma rhendzela Yerusalema nakambe. Sweswi, nkarhi wo baleka a wu nga ha ri kona. Masocha lawa ma sungule ku onhetela muti. Vanhu vo tala lava a va ri emutini va dlayiwile, kutani lavan’wana va yisiwa evuhlongeni.

Kambe ku humelele yini hi vanhu lava yingiseke Yesu?— Va ponile. A va ri ekule ni muti wa Yerusalema. Hi swona leswi endleke leswaku va nga weriwi hi khombo. Ku yingisa ku va ponisile.

Xana ku yingisa swi nga ku ponisa na wena?— Vatswari va wena va nga ha ku byela leswaku u nga tshuki u tlangela epatwini. Ha yini va vula sweswo?— Hikuva u nga ha tlumbiwa hi movha. Kambe nkarhi  wun’wana u nga ha ku: ‘A ku na mimovha epatwini sweswi. A ndzi nge tlumbiwi. Vana van’wana va tlangela epatwini, a ndzi si tshama ndzi va vona va tlumbiwa.’

Phela vanhu vo tala va le Yerusalema a va titwa hi ndlela yoleyo. Loko masocha ya Varhoma ma tlhelele endzhaku, tiko a ri tikomba ri lele. Va vone van’wana va tshama va nga suki emutini. Hiloko na vona va tshama. Va lemukisiwile kambe a va yingisanga. Leswi swi endle leswaku va dlayiwa.

A hi kambisiseni xikombiso xin’wana. Xana u tshame u tlanga hi mencisi?— Swi nga ku tsakisa ku vona ndzilo wu pfurha loko u wu lumeka. Kambe ku tlanga hi mencisi swi nga vanga khombo. U nga hisa yindlu hinkwayo, u tlhela u fa!

Tsundzuka, ku yingisa u pfa u nga yingisi swi ni khombo. Kambe loko u yingisa minkarhi hinkwayo, swi ta ku sirhelela hakunene. Kutani i mani loyi a ku byelaka a ku, “Vana, yingisani vatswari va n’wina”?— I Xikwembu. Tsundzuka leswaku xi ku byela sweswo hikwalaho ka leswi xi ku rhandzaka.