Nghena endzeni

Hundzela eka leswi nga endzeni

 NDZIMA 37

Ku Tsundzuka Yehovha Ni N’wana Wa Yena

Ku Tsundzuka Yehovha Ni N’wana Wa Yena

A HI NGE munhu un’wana u ku nyike nyiko yo hlawuleka swinene. Xana u nga titwa njhani?— Xana u ta nkhensa ntsena kutani u rivala hi loyi a ku nyikeke yona? Kumbe, xana u ta n’wi tsundzuka u tlhela u tsundzuka nileswi a ku endleleke swona?—

Yehovha Xikwembu u hi nyike nyiko yo hlawuleka. U rhumele N’wana wakwe emisaveni leswaku a ta hi fela. Xana wa swi tiva leswaku ha yini Yesu a hi ferile?— Leyi i mhaka ya nkoka leyi hi faneleke hi yi twisisa.

Hilaha hi dyondzeke hakona eka Ndzima 23, Adamu u dyohile loko a tlula nawu wa Xikwembu lowu hetisekeke. Naswona hi kume xidyoho eka Adamu, tata wa hina hinkwerhu. Kutani, u anakanya leswaku hi kayivela yini?— Hi kayivela tatana lontshwa, loyi a hanyeke vutomi lebyi hetisekeke emisaveni. U vona onge i mani la nga fanelekaka ku va tata wa hina?— I Yesu.

Yehovha u rhumele Yesu emisaveni leswaku a ta va tata wa hina ematshan’weni ya Adamu. Bibele yi ri: “‘Munhu wo sungula Adamu u ve moya-xiviri lowu hanyaka.’ Adamu lowo hetelela u ve moya lowu nyikaka vutomi.” A ku ri mani Adamu wo sungula?— Ina, hi loyi Xikwembu xi n’wi vumbeke hi ntshuri wa misava. I mani Adamu wa vumbirhi?— I Yesu. Bibele yi seketela sweswo loko yi ku: “Munhu wo sungula [Adamu] u huma emisaveni naswona u endliwe hi ntshuri; munhu wa vumbirhi [Yesu] u huma etilweni.”1 Vakorinto 15:45, 47; Genesa 2:7.

Tanihi leswi Xikwembu xi tekeke vutomi bya Yesu loko a ha ri etilweni xi byi nghenisa endzeni ka wansati la vuriwaka Mariya, Yesu a nga kumanga xidyoho ni xin’we xa Adamu. Hi yona mhaka leyi Yesu a a ri munhu la hetisekeke. (Luka 1:30-35) Nakambe hi yona mhaka leyi  ntsumi yi byeleke varisi loko Yesu a velekiwa, yi ku: “Namuntlha mi velekeriwe Muponisi.” (Luka 2:11) Kambe, leswi Yesu a a ha ri n’wana, a a fanele a endla yini ku sungula leswaku a ta va Muponisi wa hina?— A a fanele a kula kutani a va munhu lonkulu ku fana na Adamu. Hi kona Yesu a a ta va ‘Adamu wa vumbirhi.’

Yesu lowa Muponisi wa hina u ta tlhela a va “Tatana [wa hina] La Nga Riki Na Makumu.” U vitaniwa tano eBibeleni. (Esaya 9:6, 7) Ina, Yesu la hetisekeke a nga va tata wa hina ematshan’weni ya Adamu loyi a veke la nga hetisekangiki loko a dyoha. Hi yona ndlela leyi hi nga kumaka ‘Adamu wa vumbirhi’ ha yona leswaku a va tata wa hina. I ntiyiso leswaku Yesu i N’wana wa Yehovha Xikwembu.

Xana Adamu na Yesu a va fana hi ndlela yihi naswona ha yini ku fana ka vona a ku ri ka nkoka swonghasi?

Hi ku dyondza ha Yesu, hi ta kota ku n’wi amukela tanihi Muponisi wa hina. Wa ha tsundzuka leswaku hi fanele hi ponisiwa eka yini?— Ina, hi fanele hi ponisiwa eka xidyoho ni rifu leswi hi swi kumeke eka Adamu. Vutomi lebyi hetisekeke lebyi Yesu a nyikeleke ha byona tanihi munhu la kuleke, hikwalaho ka hina byi vuriwa nkutsulo. Yehovha u humese nkutsulo leswaku swidyoho swa hina swi susiwa.—Matewu 20:28; Varhoma 5:8; 6:23.

Kunene a hi lavi ku rivala leswi Xikwembu ni N’wana wa xona va hi endleleke swona, a swi tano ke?— Yesu u kombise valandzeri va yena ndlela yo hlawuleka leyi nga hi pfunaka leswaku hi tsundzuka leswi a swi endleke. A hi vulavule ha yona.

Tivone u ri ekamareni ra xithezi xa le henhla, endlwini ya le Yerusalema. I  vusiku. Yesu ni vaapostola va yena va tshame etafuleni. Etafuleni rero, ku ni nyama ya xinyimpfana leyi oxiweke, swinkwa swa swiphepherhele ni vhinyo yo tshwuka. Va dya swakudya swo hlawuleka. Xana wa swi tiva leswaku hikwalaho ka yini?—

Swakudya leswi swi va tsundzuxa leswi Yehovha a swi endleke eka madzana ya malembe lama hundzeke, loko vanhu va yena, ku nga Vaisrayele, va ha ri mahlonga aEgipta. Hi nkarhi wolowo, Yehovha u byele vanhu va yena a ku: ‘Ndyangu wun’wana ni wun’wana a wu dlaye xinyimpfana kutani wu tota ngati ya xona ehenhla ka nyangwa wa yindlu ya wona.’ Endzhaku ka sweswo u te: ‘Nghenani etindlwini ta n’wina kutani mi dya nyama yoleyo ya xinyimpfana.’

Ngati ya xinyimpfana a yi va sirhelela njhani vanhu va Israyele?

 Vaisrayele va endle tano. Kutani hi byona vusiku byebyo, ntsumi ya Xikwembu yi tsemakanye etikweni ra Egipta. Etindlwini to tala, ntsumi yi dlaye n’wana wa mativula. Kambe loko ntsumi yi vona ngati ya xinyimpfana ehenhla ka nyangwa wa yindlu, a yi hundza yindlu yoleyo. Etindlwini toleto, a ku fanga n’wana ni un’we. Faro, hosi ya le Egipta, yi chavisiwe hi leswi ntsumi ya Yehovha yi swi endleke. Kutani Faro u byele Vaisrayele a ku: ‘Mi ntshunxiwile, fambani. Humani aEgipta!’ Hiloko va layicha mindzhwalo ya vona eka tikamela ni le ka timbhongolo kutani va famba.

Yehovha a nga swi lavanga leswaku vanhu va yena va rivala ndlela leyi a va ntshunxeke ha yona. Kutani u te: ‘Kan’we hi lembe mi fanele mi dya swakudya swo fana ni leswi mi swi dyeke madyambu ya namuntlha.’ Swakudya leswi swo hlawuleka va swi vitane Paseka. Xana wa swi tiva leswaku ha yini?— Hikuva hi vusiku byebyo, ntsumi ya Xikwembu yi ‘hundze ehenhla’ ka tindlu leti totiweke ngati.—Eksoda 12:1-13, 24-27, 31.

Yesu ni vaapostola va yena a va ri karhi va anakanya hi mhaka leyi loko va ri karhi va dya swakudya swa Paseka. Endzhaku ka sweswo, Yesu u endle nchumu wo hlawuleka swinene. Kambe, a nga si wu endla, u rhange hi ku hlongola Yudasi, muapostola la nga tshembekangiki. Hiloko Yesu a teka xin’wana xa swinkwa leswi a swi sele, a xi khongelela, a xi phema kutani a xi hundzisela eka vadyondzisiwa va yena. U te: “Tekani, mi dya.” Kutani a ku eka vona: ‘Xinkwa lexi xi yimela miri wa mina lowu ndzi nga ta nyikela ha wona loko ndzi mi fela.’

Endzhaku ka sweswo, Yesu u tlakule xinwelo xa vhinyo yo tshwuka. Loko a endle xikhongelo xin’wana xa ku nkhensa, u va hundzisele xona leswaku va siyerisana kutani a ku: “Nwanani eka xona, hinkwenu ka n’wina.” Naswona u te eka vona: ‘Vhinyo leyi yi yimela ngati ya mina. Ku nga ri khale ndzi ta chulula ngati ya mina leswaku ndzi mi ntshunxa eswidyohweni swa n’wina. Tshamani mi ri karhi mi endla leswi leswaku mi ndzi tsundzuka.’—Matewu 26:26-28; 1 Vakorinto 11:23-26.

Xana ngati ya Yesu, leyi Yesu a yi faniseke ni vhinyo, yi nga hi endlela yini?

 Xana u swi xiyile leswaku Yesu u vule leswaku vadyondzisiwa va fanele ku tshama va ri karhi va endla tano leswaku va n’wi tsundzuka?— A va nga ha ta dya swakudya swa Paseka. Ku ri na sweswo, kan’we hi lembe, a va ta dya swakudya swo hlawuleka leswaku va tsundzuka Yesu ni ku fa ka yena. Swakudya sweswo swi vitaniwa Xilalelo xa Hosi. Namuntlha hi tolovele ku swi vitana Xitsundzuxo. Ha yini?— Hikuva swi hi tsundzuxa leswi Yesu ni Tata wakwe, Yehovha Xikwembu, va hi endleleke swona.

Xinkwa xexo xi fanele xi endla leswaku hi anakanya hi miri wa Yesu. A a tiyimiserile ku nyikela hi miri wolowo leswaku hi kota ku kuma vutomi lebyi nga heriki. Kutani ku vuriwa yini hi vhinyo yo tshwuka?— Yi fanele ku hi tsundzuxa nkoka wa ngati ya Yesu. I ya risima swinene ku tlula ngati ya xinyimpfana xa Paseka ya le Egipta. Wa swi tiva leswaku ha yini?— Bibele yi vula leswaku ngati ya Yesu yi endla leswaku hi rivaleriwa swidyoho swa hina. Kutani loko swidyoho swa hina hinkwaswo swi susiwile, a hi nge he vabyi, hi dyuhala ni ku fa. Hi fanele hi anakanya hi sweswo loko hi ri eXitsundzuxweni.

Xana un’wana ni un’wana u fanele a dya xinkwa ni ku nwa vhinyo eXitsundzuxweni?— Phela, Yesu u byele lava dyaka ni ku nwa a ku: ‘Mi ta fuma na mina emfun’weni naswona mi tshama na mina eswiluvelweni etilweni.’ (Luka 22:19, 20, 30) Sweswo a swi vula leswaku va ta ya etilweni va ya va tihosi swin’we na Yesu. Kutani lava va faneleke ku dya xinkwa ni ku nwa vhinyo hi lava va nga ni ntshembo wa ku fuma na Yesu etilweni.

Kambe na hina lava va nga dyiki xinkwa kumbe ku nwa vhinyo hi fanele hi va kona eXitsundzuxweni. Xana wa swi tiva leswaku ha yini?— Hikuva na hina Yesu u hi ferile. Loko hi ya eXitsundzuxweni, hi kombisa leswaku a hi rivalanga leswaku na hina u hi ferile. Hi tsundzuka nyiko yo hlawuleka ya Xikwembu.

Man’wana ya matsalwa lama kombisaka nkoka wa nkutsulo wa Yesu i 1 Vakorinto 5:7; Vaefesa 1:7; 1 Timotiya 2:5, 6; na 1 Petro 1:18, 19.