Nghena endzeni

Hundzela eka leswi nga endzeni

 NDZIMA 27

Xikwembu Xa Wena I Mani?

Xikwembu Xa Wena I Mani?

HIKWALAHO ka yini xivutiso lexi nge, Xikwembu xa wena i mani, xi ri xa nkoka?— Hikuva vanhu va gandzela swikwembu swo tala. (1 Vakorinto 8:5) Loko Yehovha a nyike muapostola Pawulo matimba ya leswaku a hanyisa munhu loyi a a nga si tshama a famba, vanhu va huwelerile va ku: “Swikwembu se swi fana ni vanhu naswona swi xikele eka hina!” Vanhu a va lava ku gandzela Pawulo ni munghana wakwe Barnaba. Va thye Pawulo vito ra Hermesi kasi Barnaba va n’wi thye ra Zewusi, ku nga mavito ya swikwembu swa hava.

Kambe Pawulo na Barnaba va arile leswaku vanhu lava va va gandzela. Va tsutsume va nghena exikarhi ka ntshungu kutani va ku: ‘Hundzukani eka swilo leswi swa hava mi ya eka Xikwembu lexi hanyaka.’ (Mintirho 14:8-15) I mani “Xikwembu lexi hanyaka,” lexi tumbuluxeke swilo hinkwaswo?— I Yehovha, “La nge Henhla-henhla emisaveni hinkwayo.” Yesu u vule leswaku Yehovha i “Xikwembu xi ri xin’we xa ntiyiso.” Kutani, i mani loyi ku nga yena ntsena la faneriwaka hi ku gandzeriwa?— I Yehovha ntsena!—Pisalema 83:18; Yohane 17:3; Nhlavutelo 4:11.

Ha yini Pawulo na Barnaba va ale leswaku vanhu va va nkhinsamela?

Vanhu vo tala va gandzela swikwembu swin’wana ematshan’weni yo gandzela “Xikwembu xi ri xin’we xa ntiyiso.” Hakanyingi va gandzela swilo leswi va swi endlaka hi ntsandze, hi maribye kumbe hi nsimbi. (Eksoda 32:4-7; Levhitika 26:1; Esaya 44:14-17) Hambi ku ri vavanuna ni vavasati lava dumeke minkarhi yin’wana va vitaniwa swikwembu kumbe tinghwazi. Xana swi fanerile leswaku va gandzeriwa?—

Loko Sawulo se a ri muapostola Pawulo, u tsarile a ku: ‘Xikwembu xa mafambiselo lawa ya swilo xi dlaye mianakanyo ya lava va nga riki vapfumeri.’ (2 Vakorinto 4:4) I mani xikwembu lexi?— Ina, i Sathana Diyavulosi!  Sathana wa swi kota ku endla leswaku vanhu va gandzela vanhu ni swilo swo tala.

Xana Yesu u n’wi hlamurise ku yini Sathana, loko Sathana a ringeta ku endla leswaku Yesu a khinsama a n’wi gandzela?— U te: “U fanele ku gandzela Yehovha Xikwembu xa wena, naswona u fanele ku endlela yena ntsena ntirho wo kwetsima.” (Matewu 4:10) Kutani Yesu u swi veke erivaleni leswaku i Yehovha ntsena loyi a faneleke ku gandzeriwa. A hi hlaye hi majaha man’wana lawa a ma swi tiva leswi. Mavito ya wona i Xadraka, Mixaka na Abedinigo.

Majaha lawa ya Vaheveru a ma ri xiphemu xa tiko ra Xikwembu ra Israyele naswona a ma ri mahlonga etikweni ra Babilona. Loko ma ri kwale hosi leyi vuriwaka Nebukadnetsara yi yimise xifaniso lexikulu xa nsuku. Siku rin’wana yi lerise leswaku loko vuyimbeleri byi tlangiwa, un’wana ni un’wana u fanele a nkhinsamela xifaniso xexo. Yi lemukise  yi ku: ‘Loyi a nga taka a nga khinsami, a gandzela u ta hoxiwa ekheleni ra ndzilo.’ Xana wena a wu ta endla yini?—

Ha yini vavanuna lava va ale ku nkhinsamela xifaniso lexi?

Hi ntolovelo, Xadraka, Mixaka na Abedinigo a va endla hinkwaswo leswi hosi yi va lerisaka swona. Kambe sweswi va arile ku swi endla. Xana wa swi tiva leswaku ha yini va arile?— Hikuva nawu wa Xikwembu a wu ku: ‘U nga tshuki u va ni swikwembu swin’wana handle ka mina. U nga tshuki u tiendlela xifaniso lexi vatliweke, u xi nkhinsamela.’ (Eksoda 20:3-5) Xadraka, Mixaka na Abedinigo va yingise nawu wa Yehovha ematshan’weni yo yingisa xileriso xa hosi.

Hosi a yi karihe ngopfu, kutani yi lerisa leswaku majaha lawa manharhu ya Vaheveru ma tisiwa xikan’we emahlweni ka yona. Yi vutise yi ku: ‘Xana swi tano hakunene, leswaku a mi swi tirheli swikwembu swa mina? Ndzi humesa xileriso xin’wana nakambe. Loko mi twa vuyimbeleri, mi fanele mi wela ehansi mi gandzela xifaniso lexi ndzi xi endleke. Loko mi nga endli tano, mi ta hoxiwa ekheleni ra ndzilo. Ndzi lava ku vona leswaku hi xihi xikwembu lexi nga ta mi ponisa evokweni ra mina!’

Xana majaha lawa a ma ta endla yini? Xana wena a wu ta va u endle yini?— Ma byele hosi ma ku: ‘Xikwembu xa hina lexi hi xi tirhelaka xi ta hi ponisa. Hambiloko xi nga hi ponisi, swikwembu swa wena a hi nge swi tirheli. A hi nge xi nkhinsameli xifaniso xa wena xa nsuku.’

 Hosi yi karihe ngopfu. Hiloko yi lerisa yi ku: ‘Hlanganyetani khele ri hisa hilaha ku andzisiweke ka nkombo eka ku hisa loku tolovelekeke!’ Kutani yi lerisa vavanuna va yona lava nga tinhenha leswaku va boha Xadraka, Mixaka na Abedinigo, va va hoxa ekheleni! Khele rero a ri hisa ngopfu lerova vavanuna volavo va hosi va dlayiwa hi malangavi ya ndzilo! Ku humelele yini hi Vaheveru lava vanharhu?

Xadraka, Mixaka na Abedinigo va wele exikarhi ka ndzilo. Kambe va swi kotile ku pfuka va yima! A va nga vavisekanga. Naswona a va nga ha bohiwanga. Leswi a swi hlamarisa hakunene!— Loko hosi yi languta ekheleni, yi ngheniwe hi ku chava loko yi vona leswi humelelaka. Yi vutisile: ‘Xana a hi hoxanga vavanuna vanharhu endzilweni?’ Malandza ya yona ma hlamule ma ku: “Ina, a va ri vanharhu, Wena hosi.”

Yehovha u ma ponise njhani malandza ya yena ekheleni ra ndzilo?

Hiloko hosi yi ku: ‘Waswivo, ndzi vona mune wa vavanuna va ri karhi va famba-famba ekheleni kambe a nga kona ni un’we la tshwaka.’ Xana wa swi tiva leswaku a ku ri mani wanuna loyi wa vumune?— A ku ri ntsumi ya Yehovha. Yi sirhelele Vaheveru lava vanharhu leswaku va nga tshwi.

Loko hosi yi vona sweswo, yi tile enyangweni wa khele kutani yi huwelela yi ku: “Xadraka, Mixaka na Abedinigo,  n’wina malandza ya Xikwembu Lexi nge Henhla-henhla, humani mi ta laha!” Loko va humela ehandle, un’wana ni un’wana u swi vonile leswaku a va nga tshwanga. Naswona a va nga nun’hwi musi. Hiloko hosi yi ku: ‘A ku vongiwe Xikwembu xa Xadraka, Mixaka na Abedinigo, lexi rhumeke ntsumi leswaku yi ta ponisa malandza ya xona hileswi ma nga tirhelangiki xikwembu xin’wana handle ka Xikwembu xa wona.’—Daniyele ndzima 3.

Hi swihi swifaniso leswi vanhu va swi gandzelaka namuntlha?

Hi nga dyondza swo karhi emhakeni leyi humeleleke enkarhini lowu hundzeke. Ninamuntlha vanhu va ha swi endla swifaniso leswaku va swi gandzela. The Encyclopedia Americana yi ri: “Mujeko wu tekiwa wu ri lowu kwetsimaka ku fana ni xihambano.” Swifaniso swi nga ha endliwa hi ntsandze, hi ribye, hi nsimbi kumbe hi nguvu. Vadyondzisiwa vo sungula va Yesu a va nga n’wi gandzeli mufumi wa le Rhoma, ku nga leswi n’wamatimu Daniel P. Mannix a vuleke leswaku swi fana ni ku “ala ku losa mujeko kumbe ku ala ku hlambanya.”

Xana u ehleketa leswaku Xikwembu xa xi amukela xifaniso xa vukhongeri loko xi endliwe hi nguvu, hi ntsandze, hi ribye kumbe hi nsimbi?— Xana swi fanerile leswaku nandza wa Yehovha a gandzela xifaniso xo tano?— Xadraka, Mixaka na Abedinigo a va xi gandzelanga naswona sweswo swi tsakise Yehovha. U nga xi tekelela hi ndlela yihi xikombiso xa vona?—

Malandza ya Yehovha a ma fanelanga ma gandzela munhu un’wana kumbe nchumu wo karhi. Malunghana ni mhaka leyi, hlaya Yoxuwa 24:14, 15, 19-22; Esaya 42:8; 1 Yohane 5:21; na Nhlavutelo 19:10.