Nghena endzeni

Hundzela eka leswi nga endzeni

 NDZIMA 24

U Nga Tshuki U Va Khamba!

U Nga Tshuki U Va Khamba!

XANA ku ni munhu loyi a nga tshama a ku yivela nchumu wo karhi?— Xana u titwe njhani hi sweswo?— Loyi a wu yiveke i khamba, naswona ku hava munhu la rhandzaka khamba. Xana u anakanya leswaku swi tisa ku yini leswaku munhu a va khamba? Xana u tswariwa a ri tano?—

Ha ha ku dyondza leswaku vanhu va tswariwa va ri ni xidyoho. Kutani hinkwerhu a hi hetisekanga. Kambe a nga kona la tswariwaka a ri khamba. Khamba ri nga ha va ri huma endyangwini lowu nga ni mahanyelo lamanene. Vatswari va rona ni vamakwavo wa rona va nga ha va va tshembekile. Kambe, loko munhu a navela mali ni swilo leswi swi nga xaviwaka hi yona, a nga ha tikuma a ri khamba.

I mani loyi u anakanyaka leswaku hi yena a veke khamba ro sungula?— A hi kambisise mhaka leyi. Mudyondzisi Lonkulu a a n’wi tiva munhu yoloye loko a ha ri etilweni. Khamba rero a ku ri ntsumi. Kambe leswi Xikwembu xi endleke tintsumi hinkwato ti hetisekile, swi tise ku yini leswaku ntsumi yoleyo yi hundzuka khamba?— Phela, hilaha hi swi voneke hakona eka Ndzima 8 ya buku leyi, yi navele nchumu lowu nga riki wa yona. Xana wa wu tsundzuka nchumu wa kona?—

Endzhaku ka loko Xikwembu xi vumbe wanuna ni wansati wo sungula, ntsumi yoleyo a yi lava leswaku va gandzela yona. Kambe a swi nga fanelanga leswaku va yi gandzela. A va fanele va gandzela Xikwembu. Kambe yi endle leswaku ku gandzeriwa yona! Hi ku xisa Adamu na Evha leswaku va yi gandzela, ntsumi yoleyo yi hundzuke khamba. Yi hundzuke Sathana Diyavulosi.

Xana i yini lexi endlaka munhu a va khamba?— I ku navela swilo leswi nga riki swa yena. Ku navela loku ku nga va kukulu lerova ku nga  endla ni vanhu vo lulama va endla swilo swo biha. Minkarhi yin’wana, vanhu lava hundzukaka makhamba a va ha tisoli kutani va cinca va endla swilo leswinene. Un’wana wa vona a ku ri muapostola wa Yesu. Vito ra yena i Yudasi Iskariyota.

Yudasi a a swi tiva leswaku swi hoxile ku yiva hikuva a a dyondzisiwe Nawu wa Xikwembu ku sukela loko a ha ri ntsongo. A a swi tiva leswaku Xikwembu xi tshame xi vulavula xi ri etilweni xi byela vanhu va ka vona xi ku: “U nga tshuki u yiva.” (Eksoda 20:15) Loko Yudasi a kurile, u hlangane ni Mudyondzisi Lonkulu kutani a va un’wana wa vadyondzisiwa va yena. Hi ku famba ka nkarhi, Yesu u hlawule Yudasi leswaku a va un’wana wa vaapostola va yena va 12.

Yesu ni vaapostola va yena a va famba-famba swin’we. A va dya swin’we. Naswona mali hinkwayo leyi a va ri na yona a yi hlayisiwa ebokisini. Yesu u nyike Yudasi bokisi rero leswaku a ri khathalela. Kambe, mali yoleyo a yi nga ri ya yena Yudasi. Xana wa swi tiva leswaku Yudasi u endle yini hi ku famba ka nkarhi?—

I yini lexi endleke leswaku Yudasi a yiva?

Yudasi u sungule ku pambula mali ebokisini handle ka mpfumelelo. A a yi teka loko lavan’wana va nga n’wi voni naswona a a ringeta ni tindlela to kuma leyi engetelekeke. U sungule ku ehleketa hi mali minkarhi hinkwayo. A hi vone leswaku ku navela loku ko biha ku ve ni vuyelo byihi loko ku sele masiku ma nga ri mangani leswaku Mudyondzisi Lonkulu a dlayiwa.

Mariya, makwavo wa Lazaro loyi a a ri munghana wa Yesu, u teke mafurha yo durha swinene kutani a chela Yesu ha wona emilengeni. Kambe Yudasi u gungurile. Wa swi tiva leswaku a a gungulela yini?— U vule leswaku mafurha wolawo a ma fanele ma xavisiwile kutani mali ya kona yi nyikiwa swisiwana. Kambe, entiyisweni a a lava leswaku mali ya kona yi nghena ebokisini leswaku a ta kota ku yi yiva.—Yohane 12:1-6.

Yesu u byele Yudasi leswaku a nga karhati Mariya, tanihi leswi a kombiseke musa lowukulu. Yudasi a nga tsakanga loko Yesu a n’wi byela sweswo, kutani u ye eka vaprista lavakulu, lava a va ri valala va Yesu.  Vona a va lava ku khoma Yesu, kambe a va lava ku n’wi khoma nivusiku leswaku va nga voniwi hi vanhu.

Yudasi u byele vaprista a ku: ‘Ndzi ta mi pfuna leswaku mi khoma Yesu, loko mo ndzi nyika mali. Mi ta ndzi nyika mali muni?’

Vaprista va hlamurile va ku: ‘Hi ta ku nyika swiphemu swa silivhere swa 30.’—Matewu 26:14-16.

Hiloko Yudasi a teka mali ya kona. Leswi a swi fana ni loko a xavisa Mudyondzisi Lonkulu eka vavanuna lava! Xana u nga ku yini hi munhu la endlaka nchumu wo biha ku fana ni lowu?— Hi swona leswi humelelaka loko munhu a va khamba kutani a yiva mali. Munhu wa kona u rhandza mali ku tlula vanhu ni Xikwembu.

Kumbexana embilwini ya wena u ri, ‘A ndzi nge pfuki ndzi rhandze nchumu wo karhi ku tlula Yehovha Xikwembu.’ Swa tsakisa leswi u titwaka hi ndlela yoleyo. Loko Yesu a hlawula Yudasi leswaku a va muapostola, swi nga ha endleka Yudasi a a titwa hi ndlela yoleyo. Vanhu van’wana lava hundzukeke makhamba va nga ha va va titwe tano na vona. A hi bule hi van’wana va vona.

Hi swihi swilo swo biha leswi Akani na Davhida a va anakanya ha swona?

Un’wana i Akani loyi a a ri nandza wa Xikwembu, la hanyeke khale Mudyondzisi Lonkulu a nga si velekiwa. Akani u vone nguvu yo saseka, xiphepherele xa nsuku ni  swiphemu swin’wana swa mali ya silivhere. A swi nga ri swa yena. Bibele yi vula leswaku a swi ri swa Yehovha hikuva a swi tekiwe eka valala va vanhu va Xikwembu. Kambe Akani a a swi rhandza ngopfu lerova a kala a swi yiva.—Yoxuwa 6:19; 7:11, 20-22.

Hi lexi xikombiso xin’wana. Khale swinene, Yehovha u hlawule Davhida leswaku a va hosi ya vanhu va tiko ra Israyele. Siku rin’wana Davhida u sungule ku languta Bati-xeba, wansati wo saseka. A a hambeta a languta Bati-xeba naswona a a anakanya hi ku n’wi teka a ta tshama na yena ekaya rakwe. Kambe a a ri nsati wa Uriya. I yini lexi Davhida a a fanele a xi endlile?—

Davhida a a fanele a tshike ku ehleketa hi ku teka Bati-xeba. Kambe a nga endlanga tano. Hiloko Davhida a n’wi teka a ya na yena ekaya rakwe. Kutani a endla leswaku Uriya a dlayiwa.  Ha yini Davhida a endle swilo leswi swo biha?— Hikuva a a hambeta a lava nsati wa munhu un’wana.—2 Samuwele 11:2-27.

Xana Absalomu a a ri khamba hi ndlela yihi?

Leswi Davhida a tisoleke, Yehovha u n’wi tshike a hanya. Kambe endzhaku ka leswi, Davhida u langutane ni swiphiqo swo tala. N’wana wa yena Absalomu a a lava ku teka xikhundlha xa Davhida, a va hosi. Kutani loko vanhu va ta va ta vona Davhida, Absalomu a a va angarha a tlhela a va tswontswa. Bibele yi ri: ‘Kutani Absalomu a yiva timbilu ta vanhu va Israyele.’ U endle vanhu va navela leswaku yena a va hosi ematshan’weni ya Davhida.—2 Samuwele 15:1-12.

Xana u tshama u navela nchumu wo karhi swinene, hilaha Akani, Davhida na Absalomu va endleke hakona?— Loko nchumu wolowo wu ri wa munhu un’wana, ku wu teka handle ka mpfumelelo i ku yiva. Wa ha swi tsundzuka leswi khamba ro sungula, Sathana, a ri swi lava?— A ri lava leswaku vanhu va gandzela rona ematshan’weni yo gandzela Xikwembu. Xisweswo, Sathana a a ri eku yiveni loko a xisa Adamu na Evha leswaku va n’wi yingisa.

Loko munhu a ri n’wini wa nchumu wo karhi, u ni mfanelo yo hlawula leswaku i mani la nga wu tirhisaka. Hi xikombiso, u nga ha ya u ya tlanga ni vana van’wana ekaya ka vona. Xana swi ta va swi ri swinene ku teka nchumu wo karhi kwale kutani u vuya na wona ekaya ka n’wina?— Nikatsongo, handle ka loko tatana ni mana wa vana volavo, vo ku pfumelela leswaku u wu teka. Loko wo teka nchumu wo karhi u muka na wona handle ka mpfumelelo, sweswo i ku yiva.

I yini lexi nga endlaka leswaku u yiva?— I ku navela nchumu lowu nga riki wa wena. Hambiloko munhu wo karhi a nga ku voni loko u wu teka, i mani loyi a ku vonaka?— I Yehovha Xikwembu. Kambe, hi fanele hi tsundzuka leswaku Xikwembu xa ku venga ku yiva. Ku rhandza Xikwembu ni vaakelani va wena swi ta ku pfuna leswaku u nga tshuki u va khamba.

Bibele yi swi veka erivaleni leswaku swi hoxile ku yiva. Ndzi kombela u hlaya Marka 10:17-19; Varhoma 13:9; na Vaefesa 4:28.