Nghena endzeni

Hundzela eka leswi nga endzeni

 NDZIMA 42

Lexi Endlaka Leswaku Hi Tirha

Lexi Endlaka Leswaku Hi Tirha

EKA KU tirha ni ku tlanga, i yini lexi u xi rhandzaka ngopfu?— Ku vula ntiyiso a swi hoxana ku tlanga. Bibele yi vula leswaku muti wa Yerusalema a wu ‘tele hi vafana ni vanhwanyana, va tlanga emintsendzeleni ya yona.’—Zakariya 8:5.

Mudyondzisi Lonkulu a a tsakela ku hlalela vana loko va ri karhi va tlanga. Loko a nga si ta emisaveni, u te: “A ndzi ri etlhelo ka [Xikwembu] ndzi ri mutirhi la nga ni vuswikoti, . . . ndzi tsakile emahlweni ka [xona] nkarhi hinkwawo.” Xiya leswaku Yesu a a tirha na Yehovha ematilweni. Naswona loko a ri kwale tilweni, u te: “Swilo leswi a ndzi swi rhandza a swi ri ni vana va vanhu.” Ina, hilaha hi dyondzeke hakona eku sunguleni, Mudyondzisi Lonkulu a a rhandza vanhu hinkwavo ku katsa ni vana.—Swivuriso 8:30, 31.

Hi wihi ntirho lowu Mudyondzisi Lonkulu a wu endleke loko a nga si ta emisaveni?

Xana u ehleketa leswaku Yesu a a tlanga loko a ha ri n’wana?— Swi nga endleka. Kambe, leswi a a ri  “mutirhi la nga ni vuswikoti” etilweni, xana u tirhile niloko a ri la misaveni?— Phela, Yesu a a vitaniwa “n’wana wa muvatli.” Nakambe a a vitaniwa “muvatli.” Sweswo swi kombisa yini?— Swi kombisa leswaku Yosefa, loyi a kuriseke Yesu tanihi n’wana wa yena, u fanele a n’wi dyondzisile. Kutani Yesu u ve muvatli.—Matewu 13:55; Marka 6:3.

Xana Yesu a a ri muvatli wa njhani?— Leswi a a ri mutirhi la nga ni vuswikoti etilweni, xana a wu ehleketi leswaku u ve muvatli la nga ni vuswikoti emisaveni?— Xiya ndlela leyi a swi tika ha yona ku va muvatli enkarhini wolowo. Swi nga endleka leswaku Yesu a a fanele a ya enhoveni a ya tsema murhi, a wu tsemelela wu va mintsandza, a yi rhwala a famba na yona ekaya kutani a vatla matafula, mabenci ni swilo swin’wana hi mintsandza yoleyo.

 Xana u anakanya leswaku ntirho wolowo a wu n’wi tsakisa Yesu?— Xana u nga tsaka loko wo kota ku endla matafula lamanene ni switulu ni swilo swin’wana leswaku vanhu va ta swi tirhisa?— Bibele yi vula leswaku i swinene leswaku munhu a “tsaka emintirhweni yakwe.” Ntirho wu tisa ntsako lowu u nga taka u nga wu kumi loko u tlanga.—Eklesiasta 3:22.

Ina, ntirho wu vuyerisa mianakanyo ni mimiri ya hina. Vana vo tala va tshama ntsena, va hlalela TV kumbe va tlanga mintlango ya vhidiyo. Va nyuhela swinene kutani va tsana emirini, ku vula ntiyiso, a va tsakanga. Naswona va endla leswaku van’wana va nga tsaki na vona. I yini lexi hi faneleke hi xi endla leswaku hi tsaka?—

Eka Ndzima 17 ya buku leyi, hi dyondze leswaku ku nyika ni ku endla swilo leswi pfunaka van’wana swi tisa ntsako. (Mintirho 20:35) Bibele yi vula leswaku Yehovha i “Xikwembu lexi tsakeke.” (1 Timotiya 1:11) Naswona, hilaha hi dyondzeke hakona eka Swivuriso, Yesu a a “tsakile emahlweni ka yena nkarhi hinkwawo.” Ha yini Yesu a a tsakile?— U vule xin’wana xa swivangelo swa kona loko a ku: “Tata wa mina u ya emahlweni a tirha ku fikela sweswi, na mina ndzi ya emahlweni ndzi tirha.”—Yohane 5:17.

Loko Yesu a ri laha misaveni, a nga hanyanga vutomi bya yena hinkwabyo a ri muvatli. Yehovha Xikwembu a a ri ni ntirho wo hlawuleka lowu a a fanele a wu endla emisaveni. Xana wa wu tiva ntirho wa kona?— Yesu u te: “Ndzi fanele ku vula mahungu lamanene ya mfumo wa Xikwembu, hikuva hi swona leswi ndzi rhumeriweke swona.” (Luka 4:43) Minkarhi yin’wana loko Yesu a chumayela vanhu, a va pfumela leswi a swi vulaka kutani va byela van’wana leswi a swi vuleke, hilaha wansati loyi u n’wi vonaka laha wa Musamariya a endleke hakona.—Yohane 4:7-15, 27-30.

Hi yihi mintirho yimbirhi leyi Yesu a yi endleke loko a ri emisaveni?

Xana Yesu a a titwisa ku yini hi ku endla ntirho lowu? Xana u ehleketa leswaku a a swi lava ku wu endla?— Yesu u te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.” (Yohane 4:34) Xana u swi rhandza ku fikela kwihi ku dya swakudya leswi ku nandzihelaka ngopfu?— Phela hi yona ndlela leyi Yesu a a wu  rhandza ha yona ntirho lowu Xikwembu xi n’wi nyikeke leswaku a wu endla.

Xikwembu xi hi endle hi ndlela ya leswaku hi kota ku tsaka loko hi dyondza ntirho. Xi vula leswaku nyiko ya xona leyi xi yi nyikeke munhu hi leswaku a “tsaka hi ku tikarhata kakwe.” Kutani loko u dyondza ku tirha wa ha ri ntsongo, vutomi bya wena hinkwabyo byi ta tsakisa swinene.—Eklesiasta 5:19.

Sweswo a swi vuli leswaku n’wana u ta endla ntirho lowu endliwaka hi munhu lonkulu, kambe hinkwerhu hi nga endla ntirho wo karhi. Vatswari va wena va nga ha boheka ku ya entirhweni siku rin’wana ni rin’wana, leswaku va ta kuma mali yo xavela ndyangu wa ka n’wina swakudya ni yindlu yo tshama eka yona. Tanihi laha na wena u swi tivaka hakona, ku ni ntirho wo tala lowu faneleke wu endliwa ekaya leswaku ku tshama ku basile naswona ku languteka.

Hi wihi ntirho lowu u nga wu endlaka, lowu nga pfunaka ndyangu hinkwawo?— U nga pfuna ku lunghiselela tafula loko ku ri nkarhi wa swakudya, ku hlantswa swibya, ku halata thyaka, ku basisa kamara ra wena ni ku veka tithoyi ta wena laha ti faneleke ti tshama kona. Kumbexana se wa yi endla yin’wana ya mintirho leyi. Hakunene ndyangu wa pfuneka loko u endla ntirho wolowo.

Ha yini swi ri swa nkoka leswaku u veka tithoyi ta wena loko u heta ku tlanga hi tona

A hi vone ndlela leyi ntirho wolowo wu pfunaka ha yona. Tithoyi ti fanele ti vekiwa loko u hete ku tlanga hi tona. U anakanya leswaku ha yini swi ri swa nkoka ku endla tano?— Swi endla leswaku yindlu yi tshama yi basile naswona swi sivela makhombo. Loko u tshika tithoyi ta wena lomu ku fambiwaka kona, siku rin’wana mana wa wena u ta ta a khome swilo swo tala emavokweni kutani a kandziya yin’wana ya tithoyi teto. A nga ha phijeka a wa kutani a vaviseka. Kumbexana a nga ha boheka ni ku ya exibedlhele. Sweswo a swi nge tsakisi, a swi tano ke?— Kutani loko u veka tithoyi ta wena loko u hetile ku tlanga hi tona u ta va u va pfune hinkwavo endyangwini.

Ku ni ntirho wun’wana lowu vana va faneleke va wu endla. Hi xikombiso, ntirho wa xikolo. Exikolweni u dyondza ku hlaya. Vana van’wana  swa va olovela ku hlaya kambe van’wana swa va tikela. Hambiloko swi vonaka swi tika eku sunguleni, u ta tsaka loko u dyondza ku hlaya hi ku rhelela. Ku ni swilo swo tala leswi tsakisaka, leswi u nga swi dyondzaka loko u tiva ku hlaya. U ta tiva ni ku tihlayela buku ya Xikwembu, ku nga Bibele. Kutani wa swi vona leswaku loko u wu endla kahle ntirho wa wena wa xikolo, swa pfuna hakunene, a swi tano ke?—

Ku ni vanhu van’wana lava ringetaka ku balekela ku tirha. Kumbexana u tiva un’wana la endlaka tano. Kambe leswi Xikwembu xi endleke leswaku hi va lava tirhaka, hi fanele ku dyondza ndlela leyi hi nga wu tsakelaka ha yona ntirho. Xana Mudyondzisi Lonkulu a a wu tsakela ku fikela kwihi ntirho wa yena?— A wu fana ni ku dya swakudya leswi n’wi nandzihelaka ngopfu. Kutani hi wihi ntirho lowu a a vulavula ha wona?— A ku ri ku byela vanhu hi Yehovha Xikwembu ni ndlela leyi va nga kumaka vutomi lebyi nga heriki ha yona.

Hi leswi swilo leswi nga hi pfunaka leswaku hi tsakela ku tirha. Tivutise, ‘Ha yini ntirho lowu wu fanele wu endliwa?’ Loko u tiva leswaku ha yini nchumu wo karhi wu ri wa nkoka, swa olova ku wu endla. Naswona ku nga khathariseki leswaku ntirho wa kona i wutsongo kumbe i wukulu, wu endle hi mbilu hinkwayo. Loko u wu endla hi mbilu hinkwayo, u ta tsakisiwa hi ntirho lowu u wu endlaka, hilaha Mudyondzisi wa hina Lonkulu a endleke hakona.

Bibele yi nga pfuna munhu leswaku a va mutirhi lonene. Hlaya leswi yi swi vulaka eka Swivuriso 10:4; 22:29; Eklesiasta 3:12, 13; na Vakolosa 3:23.