Nghena endzeni

Hundzela eka leswi nga endzeni

 NDZIMA 30

Lexi Nga Hi Pfunaka Leswaku Hi Hlula Ku Chava

Lexi Nga Hi Pfunaka Leswaku Hi Hlula Ku Chava

XANA swa ku olovela ku tirhela Yehovha?— Mudyondzisi Lonkulu a nga vulanga leswaku swi ta olova ku n’wi tirhela. Eka vusiku lebyi a dlayiweke ha byona, Yesu u byele vaapostola vakwe a ku: “Loko misava yi mi venga, ma swi tiva leswaku yi ndzi vengile yi nga si mi venga.”—Yohane 15:18.

Petro u tikurisile a vula leswaku yena a nge tshuki a siye Yesu, kambe Yesu u vule leswaku Petro u ta n’wi landzula kanharhu hi vusiku byebyo. Naswona swi ve tano, Petro u n’wi landzurile! (Matewu 26:31-35, 69-75) Swi tise ku yini leswaku ku humelela nchumu wo fana ni lowu?— Wu humelerile hikuva Petro u ngheniwe hi ku chava ni vaapostola lavan’wana na vona va ngheniwe hi ku chava.

Xana wa swi tiva leswaku ha yini vaapostola va ngheniwe hi ku chava?— Va hluleke ku endla nchumu wun’wana wa nkoka swinene. Ku tiva nchumu wa kona swi ta hi pfuna ku tirhela Yehovha ku nga khathariseki leswaku munhu un’wana u ri yini kumbe u hi endla yini. Kambe, a hi sungule hi ku pfuxeta leswi humeleleke eka vusiku byo hetelela lebyi Yesu a byi heteke a ri ni vaapostola vakwe.

Xo sungula, va tlangele Paseka swin’we. Leswi a swi ri swakudya swo hlawuleka leswi a swi dyiwa lembe ni lembe leswaku ku tsundzukiwa ndlela leyi Xikwembu xi poniseke vanhu va xona ha yona evuhlongeni aEgipta. Hiloko Yesu a sungula paseka yin’wana na vona. Hi ta bula hi yona eka xihloko lexi landzelaka, hi tlhela hi hlamusela ndlela leyi paseka yoleyo yi hi pfunaka ha yona leswaku hi tsundzuka Yesu. Endzhaku ka paseka yoleyo ni loko se a khutaze vaapostola vakwe, Yesu u fambe na vona entangeni wa Getsemani. Leyi i ndhawu leyi a va yi rhandza swinene, a va tala ku ya eka yona.

 Yesu u ye ekulenyana na vona entangeni, a ya khongela a ri yexe. U byele Petro, Yakobo na Yohane leswaku na vona va khongela. Kambe va sale va khomiwa hi vurhongo. Yesu u fambe kanharhu a ri swakwe a ya khongela, naswona u vuye kanharhu a kuma Petro ni lavan’wana va etlele! (Matewu 26:36-47) Xana wa swi tiva leswaku ha yini a va fanele va tshame va xalamukile loko va ri karhi va khongela?— A hi bule ha yona mhaka leyi.

Ha yini Petro, Yakobo na Yohane a va fanele va tshama va xalamukile?

Yudasi Iskariyota a a ri kona ePasekeni na Yesu swin’we ni vaapostola lavan’wana eka madyambu wolawo. Tsundzuka leswaku Yudasi se a a hundzuke khamba. Hi nkarhi lowu se a a hundzuke muxengi. A a yi tiva ndhawu ya le ntangeni wa Getsemani, leyi Yesu a a tala ku hlangana ni vaapostola va yena eka yona. Kutani Yudasi u te ni masocha kwalaho leswaku ma ta khoma Yesu. Loko ma fika, Yesu u ma vutisile a ku: “Mi lava mani?”

Masocha ma hlamule ma ku: ‘Hi lava Yesu.’ Yesu a a nga chuhanga naswona u hlamurile a ku: “Hi mina loyi.” Masocha ma hlamarisiwe swinene hi xivindzi lexi Yesu a a ri na xona lerova ma tlhentlhela endzhaku kutani ma wela ehansi. Hiloko Yesu a ku: ‘Loko ku ri leswaku mi lava mina, tshikani vaapostola va mina va famba.’—Yohane 18:1-9.

Loko masocha ma khoma Yesu ma n’wi boha mavoko, vaapostola va khomiwe hi ku chava kutani va baleka. Kambe Petro na Yohane a va lava ku vona leswi nga ta humelela, hiloko va landzelela hi le ndzhaku. Eku heteleleni, Yesu u nghenisiwe ekaya ra Kayafasi, muprista lonkulu. Leswi Yohane a a tiviwa hi muprista lonkulu, murindzi u n’wi pfumelerile leswaku a nghena exivaveni, yena na Petro.

Vaprista ana se a va hlanganile ekaya ra Kayafasi leswaku ku ta tengiwa. A va lava leswaku Yesu a dlayiwa. Kutani va tise vanhu lava fikeke va n’wi hehla hi mavunwa. Vanhu va himetele Yesu hi swibakele va tlhela va n’wi makala. Loko swilo leswi swi ri karhi swi humelela, Petro a a ri kona kwalaho.

Nhwanyana la nga nandza, ku nga murindzi la pfumeleleke Petro na Yohane leswaku va nghena, u tsundzuke Petro. Hiloko a ku: “Na wena, a  wu ri na Yesu!” Kambe Petro u landzurile a vula leswaku a nga n’wi tivi Yesu. Endzhaku ka nkarhinyana, nhwanyana un’wana na yena u tsundzuke Petro, hiloko a byela lava va nga yima ekusuhi a ku: “Wanuna loyi a a ri na Yesu.” Nakambe Petro u landzurile a vula leswaku a nga n’wi tivi. Endzhakunyana, ntlawa wun’wana wa vanhu wu vone Petro kutani wu ku eka yena: “Hakunene u wun’wana wa vona.” Petro u landzule ra vunharhu a ku: “A ndzi n’wi tivi munhu loyi!” Petro u tlhele a hlambanya leswaku leswi a swi vulaka i ntiyiso, hiloko Yesu a hundzuluka a n’wi languta.—Matewu 26:57-75; Luka 22:54-62; Yohane 18:15-27.

Hikwalaho ka yini Petro a khomiwe hi ku chava lerova a kala a hemba, a vula leswaku a nga n’wi tivi Yesu?

Xana wa swi tiva leswaku ha yini Petro a hembile?— Ina, u hembile hikuva a a chuhile. Kambe ha yini a khomiwe hi ku chava? Xana i yini lexi a tsandzekeke ku xi endla leswaku a kuma xivindzi? A hi anakanye hi mhaka leyi. Xana Yesu u endle yini leswaku a va ni xivindzi?— U khongele eka Xikwembu, kutani Xikwembu xi n’wi pfuna leswaku a va ni xivindzi. Naswona tsundzuka leswaku Yesu u byele Petro kanharhu leswaku a khongela ni leswaku a tshama a xalamukile. Kambe, i yini leswi humeleleke?—

Eminkarhini leminharhu Petro u khomiwe hi vurhongo. A nga khongelanga naswona a nga tshamanga a xalamukile. Kutani a nga swi  tivanga leswaku a nga endla yini loko a vona Yesu a khomiwa. Endzhakunyana loko ku ri karhi ku tengiwa, Petro u khomiwe hi ku chava loko a vona vanhu va himetela Yesu va tlhela va endla makungu yo n’wi dlaya. Kambe, eka tiawara ti nga ri tingani leti hundzeke, i yini leswi Yesu a byeleke vaapostola va yena leswaku va swi rindzela?— Yesu u va byele leswaku misava yi ta va venga, tanihi leswi na yena yi n’wi vengeke.

Xana u nga tikuma u ri exiyin’weni xo fana ni xa Petro hi ndlela yihi?

Kutani sweswi a hi anakanye hi nchumu lowu wu nga hi humelelaka, lowu fanaka ni lowu humeleleke Petro. A hi nge u le tlilasini loko van’wana va sungula ku hlekula lava nga wu losiki mujeko kumbe lava va nga yi tlangeriki Khisimusi. Xana u ta endla yini loko munhu  un’wana o ku vutisa, a ku: “Xana i ntiyiso leswaku wena a wu wu losi mujeko?” Kumbe van’wana va ku: “Hi twa leswaku ni Khisimusi a wu yi tlangeli!” Xana u ta chava ku vula ntiyiso?— Xana u ta vula mavunwa, ku fana na Petro?—

Hi ku famba ka nkarhi, Petro u tisole swinene hikwalaho ka leswi a landzuleke Yesu, a vula leswaku a nga n’wi tivi. Loko a vona xihoxo xakwe, u humele ehandle kutani a rila. Ina, u tlhele a byi kondletela vuxaka bya yena na Yesu. (Luka 22:32) Kutani sweswi anakanya hi mhaka leyi. I yini lexi nga hi pfunaka leswaku hi nga khomiwi hi ku chava lerova hi vula swilo swo fana ni leswi Petro a swi vuleke?— Tsundzuka leswaku Petro u tsandzekile ku khongela ni ku tshama a xalamukile. Kutani u ehleketa leswaku hi fanele hi endla yini loko hi lava ku va valandzeri va Mudyondzisi Lonkulu?—

Hi fanele hi khongela eka Yehovha hi kombela leswaku a hi pfuna. Loko Yesu a khongerile, xana wa swi tiva leswaku Xikwembu xi n’wi endlele yini?— Xi rhumele ntsumi leswaku yi ta n’wi tiyisa. (Luka 22:43) Xana tintsumi ta Xikwembu ti nga hi pfuna?— Bibele yi ri: “Ntsumi ya Yehovha yi aka nxaxa ku rhendzela hinkwavo lava n’wi chavaka, naswona ya va ponisa.” (Pisalema 34:7) Kambe leswaku hi kuma mpfuno wa Xikwembu, a swi lavi leswaku hi khongela ntsena. Xana wa swi tiva leswaku hi swihi swin’wana leswi hi faneleke hi swi endla?— Yesu u byele valandzeri va yena leswaku va tshama va hitekile ni ku tshama va xalamukile. Xana u anakanya leswaku hi nga swi endlisa ku yini sweswo?—

Hi fanele hi rhiya ndleve eka leswi vuriwaka eminhlanganweni ya Vukreste ni ku anakanyisisa hi leswi hi swi hlayaka eBibeleni. Kambe hi fanele hi khongela eka Yehovha minkarhi hinkwayo, hi kombela leswaku a hi pfuna hi n’wi tirhela. Loko hi endla tano, hi ta kuma mpfuno wo hlula ku chava. Kutani hi ta tsaka loko hi kuma nkarhi wo byela van’wana malunghana ni Mudyondzisi Lonkulu swin’we ni Tata wakwe.

Matsalwa lawa ma nga hi pfuna leswaku hi nga pfumeleli ku chava vanhu van’wana ku hi sivela ku endla swilo swo lulama: Swivuriso 29:25; Yeremiya 26:12-15, 20-24; na Yohane 12:42, 43.