Nghena endzeni

Hundzela eka leswi nga endzeni

 NDZIMA 9

Hi Fanele Hi Lwisana Ni Miringo

Hi Fanele Hi Lwisana Ni Miringo

XANA ku ni munhu loyi a nga tshama a ku kombela leswaku u endla nchumu wo karhi wo biha?— Xana u ku sindzisile leswaku u wu endla? Kumbe, xana u ku byele leswaku swi tsakisa ngopfu naswona a swi hoxanga ku swi endla?— Loko munhu a endla leswi, u ringeta ku hi kanganyisa.

Xana hi fanele hi endla yini loko hi ringiwa? Xana hi fanele hi pfumela ku hluriwa hi ndzingo kutani hi endla leswi hoxeke?— Sweswo a swi nge n’wi tsakisi Yehovha Xikwembu. Xana wa n’wi tiva loyi a nga ta tsaka?— I Sathana Diyavulosi.

Sathana i nala wa Xikwembu nakambe Sathana i nala wa hina. A hi nge swi koti ku n’wi vona hikuva i munhu wa moya. Kambe yena wa swi kota ku hi vona. Siku rin’wana Diyavulosi u vulavule na Yesu, Mudyondzisi Lonkulu, naswona u ringete ku n’wi kanganyisa. A hi voneni leswaku Yesu u angurise ku yini. Leswi swi ta hi pfuna leswaku hi tiva lexi hi faneleke hi xi endla loko hi ringiwa.

I yini leswi Yesu a nga ha vaka a sungule ku swi tsundzuka loko se a khuvuriwile?

Nkarhi hinkwawo Yesu a a lava ku endla ku rhandza ka Xikwembu. Leswi u swi kombise erivaleni hi ku khuvuriwa eNambyeni wa Yordani. Sathana u ringete ku ringa Yesu loko A ha ku khuvuriwa. Bibele yi vula leswaku Yesu u vone “matilo ma pfuleka.” (Matewu 3:16) Leswi swi nga ha va swi vula leswaku Yesu u sungule ku tsundzuka leswi a a ri xiswona loko a ha ri ni Xikwembu etilweni.

Endzhaku ka loko a khuvuriwile, Yesu u ye emananga  a ya anakanyisisa hi swilo leswi a sunguleke ku swi tsundzuka. U hete masiku ya 40 ni vusiku bya 40 a ri emananga. Nkarhi lowu hinkwawo Yesu a a nga dyi nchumu, xisweswo a a khomiwe hi ndlala swinene. Lowu hi wona nkarhi lowu Sathana a ringeteke ku ringa Yesu ha wona.

Xana Diyavulosi u ma tirhise njhani maribye leswaku a ringa Yesu?

Diyavulosi u te: “Loko u ri n’wana wa Xikwembu, byela maribye lawa leswaku ma hundzuka swinkwa.” Phela a xi ta nandziha ngopfu xinkwa hi nkarhi lowu! Kambe xana Yesu a a ta swi kota ku hundzula maribye ma va malofo ya xinkwa?— Ina, a a ta swi kota. Hikwalaho ka yini? Hikuva Yesu, la nga N’wana wa Xikwembu, a a ri ni matimba yo hlawuleka.

Loko a ku ri wena, xana a wu ta va u ri endlile ribye ri va lofo ra xinkwa loko Diyavulosi a ku kombela?— Yesu a a khomiwe hi ndlala. Xana a ku ta va ku ri xihoxo loko a a lo swi endla?— Yesu a a swi tiva leswaku swi hoxile ku tirhisa matimba yakwe hi ndlela yoleyo. Yehovha u n’wi nyike matimba wolawo leswaku a tshineta vanhu eka Xikwembu, ku nga ri ku ma tirhisela swilo swakwe.

Hikwalaho ka sweswo, Yesu u byele Sathana leswi tsariweke eBibeleni a ku: ‘Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.’ Yesu a a swi tiva leswaku ku endla leswi tsakisaka Yehovha i swa nkoka ngopfu ku tlula ku va ni swakudya.

Kambe Diyavulosi u tlhele a ringeta ku n’wi kanganyisa. U teke Yesu a n’wi yisa eYerusalema kutani a n’wi yimisa exihlungwanini xa  tempele. Kutani Sathana a ku: ‘Loko u ri n’wana wa Xikwembu, tilahlele ehansi. Hikuva ku tsariwile leswaku tintsumi ta Xikwembu ti ta ku khawulela.’

Hikwalaho ka yini Sathana a vule leswi?— A a lava ku endla leswaku Yesu a endla swilo swo huma endleleni. Kambe Yesu a nga n’wi yingisanga Sathana ni le mhakeni leyi. U byele Sathana a ku: “Ku tsariwile, ‘U nga tshuki u ringa Yehovha Xikwembu xa wena.’” Yesu a a swi tiva leswaku swi hoxile ku ringa Yehovha hi ku peta vutomi bya yena ekhombyeni.

Hambiswiritano, Sathana a nga n’wi tshikanga. Hiloko a teka Yesu a n’wi yisa entshaveni yo leha swinene. Loko a ri kwalaho u n’wi kombe mimfumo hinkwayo, kumbe tihulumendhe hinkwato ta misava ni ku vangama ka tona. Hiloko Sathana a byela Yesu a ku: “Swilo leswi hinkwaswo ndzi ta ku nyika swona loko wo nkhinsama u ndzi gandzela.”

Anakanya hi nyiko leyi Diyavulosi a yi tshembisaka. Xana mimfumo leyi hinkwayo kumbe tihulumendhe ta vanhu, hakunene a ti ri ta Sathana?— Yesu a nga kanetanga leswaku a ti ri ta Sathana. Loko a ti nga ri ta Sathana, a a ta va a n’wi kanetile. Ina, Sathana hi yena mufumi wa matiko hinkwawo ya misava. Bibele yi n’wi vitana “mufumi wa misava leyi.”—Yohane 12:31.

Hikwalaho ka yini Sathana a swi kotile ku tshembisa Yesu mimfumo leyi hinkwayo?

U nga endla yini loko Diyavulosi o ku byela leswaku loko wo n’wi gandzela u ta ku nyika nchumu wo karhi?— Yesu a a swi tiva leswaku a swi hoxile ku gandzela Diyavulosi, ku nga khathariseki leswaku U ta kuma yini. Kutani Yesu u te: ‘Suka, Sathana! Hikuva Bibele yi vula leswaku i Yehovha Xikwembu xa wena loyi u faneleke ku n’wi gandzela naswona u fanele u tirhela yena ntsena.’—Matewu 4:1-10; Luka 4:1-13.

Xana u ta endla yini loko u ringiwa?

Na hina hi lwisana ni miringo. Xana wa yi tiva yin’wana ya yona?— Xikombiso xin’wana hi lexi. Mana wa wena a nga ha endla khekhe ro nandziha. A nga ha ku byela leswaku u nga ri dyi kukondza ku fika nkarhi wa swakudya. Kambe u twa ndlala swinene, lerova u navela onge u ngo ri dya. Xana u ta n’wi yingisa mana wa wena?— Sathana u lava leswaku u nga n’wi yingisi.

Tsundzuka Yesu. Na yena a a khome hi ndlala swinene. Kambe a a swi  tiva leswaku ku tsakisa Xikwembu a swi ri swa nkoka swinene ku tlula ku dya. U ta va u kombisa leswaku u fana na Yesu loko u yingisa leswi mana wa wena a ku byelaka swona.

Swi nga ha endleka vana van’wana va ku kombela leswaku u nwa tiphilisi to karhi. Va nga ha ku byela leswaku ti ta ku endla u titwa u tsakile. Kambe swi nga ha endleka tiphilisi ta kona ti ri swidzidzirisi. Ti nga ha ku endla u vabya swinene naswona swi nga ha endleka ti ku dlaya. Kumbe  un’wana a nga ha ku nyika fole, leri na rona ri nga ni swidzidzirisi, kutani a ku sindzisa leswaku u ri dzaha. Xana u ta endla yini?—

Tsundzuka Yesu. Sathana u ringete ku endla leswaku Yesu a peta vutomi byakwe ekhombyeni hi ku n’wi byela leswaku a suka emaninginingini ya tempele, a tilahlela ehansi. Kambe Yesu u arile. Xana wena u ta endla yini loko munhu un’wana a ku sindzisa leswaku u endla nchumu lowu nga ni khombo?— Yesu a nga n’wi yingisana Sathana. Na wena a wu fanelanga u yingisa munhu wihi ni wihi loyi a ringetaka ku ku endlisa swilo swo biha.

Hikwalaho ka yini swi hoxile ku tirhisa swifaniso loko hi gandzela?

Siku rin’wana u nga ha komberiwa ku gandzela xifaniso, ku nga nchumu lowu Bibele yi vulaka leswaku a hi fanelanga hi wu endla. (Eksoda 20:4, 5) Ku gandzela xifaniso ku nga ha va ku ri xiphemu xa xiendlakalo xo karhi xa le xikolweni. U nga ha byeriwa leswaku u nga ha ti exikolweni loko u ala ku endla leswi. Xana u ta endla yini?—

Swa olova ku endla leswinene loko vanhu hinkwavo va swi endla. Kambe swi nga ha hi tikela ku endla leswi lulameke loko vanhu van’wana va ringeta ku hi kucetela leswaku hi endla swilo swo biha. Va nga ha vula leswaku leswi va swi endlaka, entiyisweni a swi bihanga. Kambe xivutiso xa nkoka hi lexi, Xana Xikwembu xi ri yini hi swona? Hi xona xi tivaka swilo leswi nga swinene.

Xisweswo, ku nga khathariseki leswaku vanhu van’wana va ri yini, a hi fanelanga hi endla nchumu lowu Xikwembu xi vulaka leswaku wu hoxile. Loko hi endla tano, nkarhi hinkwawo hi ta tsakisa Xikwembu, naswona a hi nge pfuki hi tsakise Diyavulosi.

U nga ha kuma rungula leri engetelekeke malunghana ni ndlela ya ku lwisana ni ndzingo eka Pisalema 1:1, 2; Swivuriso 1:10, 11; Matewu 26:41 na 2 Timotiya 2:22.