Nghena endzeni

Hundzela eka leswi nga endzeni

 NDZIMA 8

Ku Ni Vanhu Van’wana Lava Nga Ni Matimba Ku Hi Tlula

Ku Ni Vanhu Van’wana Lava Nga Ni Matimba Ku Hi Tlula

NDZA tshemba wa pfumela leswaku ku ni vanhu van’wana lava nga ni matimba naswona lava tlakukeke ku tlula mina na wena. Xana u nga ku i mani la nga ni matimba ku hi tlula?— I Yehovha Xikwembu. Ku vuriwa yini hi N’wana wa yena, la nga Mudyondzisi Lonkulu? Xana u ni matimba ku hi tlula?— Ina.

Yesu a a tshama ni Xikwembu etilweni. A a ri N’wana wa moya kumbe ntsumi. Xana ti kona tintsumi kumbe vana van’wana va moya lava Xikwembu xi va endleke?— Ina, xi endle timiliyoni ta tona. Tintsumi leti na tona ti ni matimba ku hi tlula naswona ti tlakukile eka hina.—Pisalema 104:4; Daniyele 7:10.

Xana wa ha ri tsundzuka vito ra ntsumi leyi vulavuleke na Mariya?— I ntsumi Gabriyele. Yi byele Mariya leswaku n’wana wakwe a a ta va N’wana wa Xikwembu. Xikwembu xi nghenise vutomi bya N’wana wa xona wa moya ekhwirini ra Mariya leswaku Yesu a ta tswariwa a ri n’wana laha emisaveni.—Luka 1:26, 27.

I yini leswi Mariya na Yosefa va nga ha vaka va swi byele Yesu?

Xana wa tshemba leswaku singita rero ri endlekile? Xana wa tshemba leswaku Yesu u tshame a hanya etilweni ni Xikwembu?— Yesu u vule tano. Xana Yesu a a swi tivisa ku yini sweswo? Phela loko a ha ri xifanyetana, swi nga ha endleka leswaku Mariya u n’wi byerile leswi Gabriyele a swi vuleke. Nakambe, Yosefa u fanele a n’wi byerile Yesu leswaku Tata wakwe wa xiviri i Xikwembu.

Loko Yesu a khuvuriwa, Xikwembu xi tlhele xi vulavula xi ri etilweni xi ku: “Loyi i N’wananga.” (Matewu 3:17) Nakambe eka vusiku bya le  mahlweni ka ku fa kakwe, Yesu u khongerile a ku: “Tatana, ndzi vangamise etlhelo ka wena hi ku vangama loku ndzi veke na kona etlhelo ka wena misava yi nga si va kona.” (Yohane 17:5) Ina, Yesu u kombele leswaku a tlheriseriwa etilweni a ya hanya ni Xikwembu nakambe. Xana a a ta ya njhani etilweni?— A a ta ya ntsena loko Yehovha Xikwembu o tlhela a n’wi endla a va munhu wa moya la nga vonakiki kumbe ntsumi.

Sweswi ndzi lava ku ku vutisa xivutiso xa nkoka. Xana tintsumi hinkwato ti lulamile? U nga ku yini?— Enkarhini lowu hundzeke hinkwato a ti lulamile. Leswi a a swi endliwa hi leswi ti nga vumbiwa hi Yehovha, naswona swilo hinkwaswo leswi a swi endlaka i swinene. Kambe yin’wana ya tintsumi leti yi hundzuke yo biha. Xana swi endlekise ku yini?

Leswaku hi kuma nhlamulo, hi fanele hi tlhelela enkarhini lowu ha wona Xikwembu xi endleke wanuna ni wansati wo sungula, ku nga Adamu na Evha. Vanhu van’wana va vula leswaku mhaka leyi ko va ntsheketo. Kambe Mudyondzisi Lonkulu a a swi tiva leswaku lowu i ntiyiso.

Loko Xikwembu xi endle Adamu na Evha, xi va veke entangeni wo saseka lowu vitaniwaka Edeni. A a ku ri ntanga wo saseka, paradeyisi. A va ta va ni vana vo tala, ndyangu lowukulu naswona a va ta hanya hilaha ku nga heriki eParadeyisini. Kambe a a ku ri ni dyondzo ya nkoka leyi a va fanele va yi dyondza. I dyondzo leyi se hi vulavuleke ha yona. A hi voneni loko ha ha yi tsundzuka.

I yini leswi Adamu na Evha a va fanele va swi endlile leswaku va kota ku hanya eParadeyisini hilaha ku nga heriki?

 Yehovha u byele Adamu na Evha leswaku va nga dya mihandzu ya mirhi hinkwayo leyi va yi lavaka entangeni. Kambe a a ku ri ni murhi wun’we lowu a va nga fanelanga va dya mihandzu ya wona. Xikwembu xi va byerile leswaku ku ta humelela yini loko vo wu dya. Xi te: “[Mi] ta fa hakunene.” (Genesa 2:17) Kutani hi yihi dyondzo leyi Adamu na Evha a va fanele va yi dyondza?—

A a ku ri dyondzo ya ku yingisa. Ina, vutomi byi titshege hi ku yingisa Yehovha Xikwembu! A a swi nga enelanga leswaku Adamu na Evha va vula ntsena leswaku va ta n’wi yingisa. A va fanele va swi kombisa hi mintirho leswaku va ta n’wi yingisa. Loko va yingisa Xikwembu, a va ta va va kombisa leswaku va xi rhandza naswona va lava leswaku xi va Mufumi wa vona. Kutani a va ta hanya hilaha ku nga heriki eParadeyisini. Kambe loko va dya mbhandzu wolowo, xana a swi ta va swi kombisa yini?—

A swi ta va swi kombisa leswaku a va swi tlangeli leswi Xikwembu xi va nyikeke swona. Loko a wu ri kona kwalaho, xana a a wu ta va u n’wi yingisile Yehovha?— Eku sunguleni, Adamu na Evha va n’wi yingisile. Kambe munhu un’wana la nga ni matimba ku va tlula u xise Evha. U endle leswaku a nga n’wi yingisi Yehovha. Xana a a ri mani munhu loyi?—

I mani loyi a a endla leswaku nyoka yi vulavula na Evha?

 Bibele yi vula leswaku nyoka yi vulavule na Evha. Kambe wa swi tiva leswaku nyoka a yi vulavuli. Xana yi swi kotise ku yini ku vulavula?— Ntsumi hi yona yi nga endla swi vonaka onge nyoka hi yona yi vulavulaka. Kambe a a ku ri ntsumi leyi a yi vulavula. Ntsumi leyi a yi sungule ku ehleketa swilo swo biha. A yi lava leswaku Adamu na Evha va gandzela yona. A yi lava leswaku va endla leswi yi va byelaka swona. A yi lava ku teka xikhundlha xa Xikwembu.

Kutani ntsumi leyi yo biha yi nghenise mianakanyo yo biha emiehleketweni ya Evha. Yi vulavule na yena hi ku tirhisa nyoka, yi ku: ‘Xikwembu xi mi byele mavunwa. A mi nge fi loko mo dya mihandzu ya murhi lowu. Mi ta tlhariha mi fana ni Xikwembu.’ Xana a a wu ta va u swi khorwile swilo leswi vuriwaka hi rito leri?—

Evha u sungule ku navela nchumu lowu Xikwembu a a xi nga n’wi nyikanga wona. U dye mbhandzu wa murhi lowu yirisiweke. A tlhela a teka wun’wana a nyika Adamu. Adamu a a nga swi tshembi leswi nyoka yi swi vuleke. Kambe a a rhandza Evha ngopfu ku tlula Xikwembu. Hiloko na yena a dya mbhandzu wolowo.—Genesa 3:1-6; 1 Timotiya 2:14.

Hi byihi vuyelo lebyi veke kona?— Adamu na Evha va hundzuke vanhu lava nga hetisekangiki, va dyuhala kutani va fa. Kutani leswi a va nga ha hetisekanga, ni  vana va vona a va nga hetisekanga, naswona eku heteleleni va dyuharile kutani va fa. Xikwembu a a xi nga hembanga! Vutomi byi titshege hi ku yingisa xona. (Varhoma 5:12) Bibele yi hi byela leswaku ntsumi leyi xiseke Evha yi vitaniwa Sathana Diyavulosi, naswona tintsumi tin’wana leti hundzukeke to biha ti vitaniwa madimona.—Yakobo 2:19; Nhlavutelo 12:9.

Ku humelele yini hi Adamu na Evha endzhaku ka loko va tlule nawu wa Xikwembu?

Xana se wa swi vona leswaku swi tise ku yini leswaku ntsumi leyinene, leyi Xikwembu xi yi endleke, yi hundzuka yo biha?— Hikuva se a yi sungule ku anakanya swilo swo biha. A a yi lava leswaku ku va yona yi Lawulaka. A a yi swi tiva leswaku Xikwembu xi byele Adamu na Evha leswaku va va ni vana, naswona a a yi lava leswaku hinkwavo ka vona va gandzela yona. Diyavulosi u lava leswaku munhu un’wana ni un’wana a nga n’wi yingisi Yehovha. Kutani u ringeta ku nghenisa mianakanyo yo biha emiehleketweni ya hina.—Yakobo 1:13-15.

Diyavulosi u vula leswaku a nga kona munhu loyi a rhandzaka Yehovha. U vula leswaku mina na wena a hi xi rhandzi Xikwembu naswona a hi swi lavi ku endla leswi Xikwembu xi hi byelaka swona. U vula leswaku hi yingisa Yehovha ntsena loko swilo swi famba hi ndlela leyi hi lavaka yona. Xana Diyavulosi u vula ntiyiso? Xana hi tano hakunene?

Mudyondzisi Lonkulu u vule leswaku Diyavulosi i muhembi! Yesu u kombise leswaku wa n’wi rhandza Yehovha, hi ku N’wi yingisa. Nakambe Yesu a a nga yingisi Xikwembu ntsena loko swi n’wi fambela kahle. Nkarhi hinkwawo a a xi yingisa, hambiloko vanhu va n’wi khomisa xo tika. U tshame a tshembekile eka Yehovha kukondza a fa. Hi swona swi endleke leswaku Xikwembu xi n’wi pfuxa leswaku a ta hanya hilaha ku nga heriki.

Kutani, xana u nga ku i mani nala wa hina lonkulu?— Ina, i Sathana Diyavulosi. Xana u nga n’wi vona?— Doo! Kambe ha swi tiva leswaku u kona nileswaku u tlakukile naswona u ni matimba lamakulu ku hi tlula. Kambe i mani la tlakukeke ku tlula Diyavulosi?— I Yehovha Xikwembu. Kutani ke, Xikwembu xi nga swi kota ku hi sirhelela.

Hlaya u twa hi ta Loyi hi faneleke hi gandzela yena: Deteronoma 30:19, 20; Yoxuwa 24:14, 15; Swivuriso 27:11; na Matewu 4:10.