Nghena endzeni

Hundzela eka leswi nga endzeni

 NDZIMA 47

Ndlela Leyi Hi Swi Tivaka Ha Yona Leswaku Armagedoni Yi Kusuhi

Ndlela Leyi Hi Swi Tivaka Ha Yona Leswaku Armagedoni Yi Kusuhi

WA SWI tiva leswaku xikombiso i yini, a swi tano ke?— Eka Ndzima 46, hi hlaye hi ta xikombiso lexi Xikwembu xi xi nyikeke, lexi kombiseke leswaku a xi nge he yi lovisi misava hi ndhambi. Nakambe vaapostola va vutise Yesu hi ta xikombiso lexi a va ta vona ha xona loko se a vuyile ni loko makumu ya misava kumbe mafambiselo ya swilo ma ri ekusuhi.—Matewu 24:3.

Leswi Yesu a a nga ta voniwa etilweni, a ku laveka xikombiso lexi vanhu va nga ta vona ha xona leswaku se u sungule ku fuma. Kutani Yesu u byele vadyondzisiwa va yena malunghana ni swilo leswi va faneleke ku swi xiya kona kwala misaveni. Loko swilo sweswo swi endlekile, a swi ta vula leswaku se u vuyile naswona u sungule ku fuma tanihi Hosi etilweni.

Leswaku Yesu a dyondzisa vadyondzisiwa va yena nkoka wa ku tshama va xalamukile, u va byele a ku: “Langutani nkuwa ni mirhi leyin’wana hinkwayo: Loko se yi hluka, hi ku yi languta, mi  swi vona kahle leswaku ximumu xi kusuhi.” Wa swi kota ku vona loko ximumu xi ri ekusuhi. Naswona u nga swi tiva loko Armagedoni yi ri ekusuhi loko u vona swilo leswi Yesu a vulavuleke ha swona swi ri karhi swi humelela.—Luka 21:29, 30.

Loko Yesu a vulavula hi murhi wa nkuwa, xana a a dyondzisa yini?

Eka tluka leri ni leri landzelaka, hi ta vona swifaniso swa swilo leswi Yesu a vuleke leswaku swi ta va swin’wana swa swikombiso swa leswaku Mfumo wa Xikwembu wu kusuhi. Loko swilo leswi hinkwaswo swi humelela, Mfumo wa Xikwembu lowu Mufumi wa wona ku nga ta va ku ri Kreste, wu ta herisa mimfumo leyin’wana hinkwayo, hilaha hi dyondzeke hakona eka Ndzima 46.

 Kutani swi langutisise kahle swifaniso leswi nga eka matluka mambirhi lama hundzeke, hi ta vulavula hi swona. U nga hlaya rungula ra leswi u swi vonaka eswifanisweni leswi, eka Matewu 24:6-14 na Luka 21:9-11. Nakambe, xiya nomboro leyitsongo eka xifaniso ha xin’we. Nomboro leyi fanaka yi kumeka eku sunguleni ka ndzimana leyi hlamuselaka xifaniso xexo. Sweswi a hi vone loko swiyenge swo tala swa xikombiso lexi Yesu a vulavuleke ha xona swi ri karhi swi hetiseka namuntlha.

(1) Yesu u te: “Mi ta twa hi ta tinyimpi ni swiviko swa tinyimpi; . . . tiko ri ta pfukela tiko rin’wana ni mfumo wu ta pfukela mfumo wun’wana.” Xana u tshama u twa vanhu va vulavula hi tinyimpi?— Nyimpi yo sungula ya misava yi lwiwe ku sukela hi 1914 ku ya fika hi 1918 kutani ku landzela Nyimpi ya Vumbirhi ya Misava, leyi lwiweke ku sukela hi 1939 ku ya fika hi 1945. A ku nga si tshama ku lwiwa nyimpi leyi katseke misava hinkwayo! Sweswi ku lwiwa tinyimpi emisaveni hinkwayo. Phela siku rin’wana ni rin’wana eka TV, eka xiya-ni-moya ni le ka maphepha-hungu, hi twa kumbe hi hlaya hi tinyimpi.

(2) Nakambe Yesu u te: “Ku ta va ni ku kayivela ka swakudya . . . ku suka endhawini yin’wana ku ya eka yin’wanyana.” Tanihi laha u swi tivaka hakona, vanhu van’wana va kayivela swakudya. Siku rin’wana ni rin’wana, ku fa magidi ya vanhu hi leswi va nga riki na swakudya leswi ringaneke.

(3) Yesu u engetele a ku: ‘Ku suka endhawini yin’wana ku ya eka yin’wanyana ku ta va ni mintungu.’ Xana wa swi tiva leswaku ntungu i yini?— I vuvabyi lebyi dlayaka vanhu vo tala. Ntungu wun’wana lowukulu, lowu a wu vuriwa Chachalaza, wu dlaye vanhu va kwalomu ka 20 wa timiliyoni hi lembe rin’we ntsena. Enkarhini wa hina, swi nga endleka leswaku vanhu vo tarisa xisweswo va dlayiwa hi AIDS. Nakambe ku ni vuvabyi bya khensa, bya mbilu ni mavabyi man’wana lama dlayaka magidi yo tala ya vanhu lembe ni lembe.

(4) Yesu u vule xiphemu xin’wana xa xikombiso, a ku: “Ku ta va ni ku . . . tsekatseka ka misava ku suka endhawini yin’wana ku ya eka  yin’wanyana.” Xana wa swi tiva leswaku ku endleka yini loko ku ri ni ku tsekatseka ka misava?— Misava ya ninginika laha u yimeke kona. Tindlu ta hirimuka naswona hakanyingi ku fa vanhu. Ku sukela hi 1914 ku ve ni ku tsekatseka ko tala ka misava lembe rin’wana ni rin’wana. Xana u tshama u twa ku vulavuriwa hi ku tsekatseka ka misava?—

(5) Yesu u vule leswaku xiphemu xin’wana xa xikombiso a ku ta va ‘ku engeteleka lokukulu ka vubihi.’ Hi yona mhaka leyi ku teleke madzolonga ni vanhu lava yivaka. Kun’wana ni kun’wana vanhu va chava leswaku van’wana va ta tshova tindlu ta vona va yiva. A ku si tshama ku va ni vugevenga ni madzolonga yo tala swonghasi emisaveni hinkwayo, ku fana ninamuntlha.

(6) Yesu u vule xiphemu xa nkoka swinene xa xikombiso loko a ku: “Naswona mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Matewu 24:14) Loko “mahungu lamanene lawa ya mfumo” ma ri ya nkoka eka wena, u fanele ku byela van’wana ha wona. Hi ku endla tano, u ta hoxa xandla eku hetisekeni ka xiphemu lexi xa xikombiso.

Vanhu van’wana va nga ha vula leswaku swilo leswi Yesu a swi vuleke ka ha ri emahlweni swi tshama swi ri karhi swi humelela. Kambe swilo leswi a swi si tshama swi humelela hinkwaswo hi nkarhi wun’we emisaveni hinkwayo. Kutani wa swi twisisa leswaku xikombiso xi vula yini?— Xi vula leswaku loko hi vona swilo leswi hinkwaswo swi humelela, ku nga ri khale mafambiselo lawa yo biha ya misava ma ta siviwa hi misava leyintshwa ya Xikwembu.

Loko Yesu a vulavula hi xikombiso lexi, u tlhele a vulavula hi nguva yo hlawuleka ya lembe. U te: “Hambetani mi khongela leswaku ku baleka ka n’wina ku nga fiki hi vuxika.” (Matewu 24:20) Xana u ehleketa leswaku a a vula yini hi marito wolawo?—

Xana ku nga humelela yini loko munhu a lava ku balekela khombo ro karhi hi nkarhi wa vuxika, loko maxelo ma endla swi nga olovi nikatsongo,  kumbe ku ri ku tihoxa ekhombyeni ku teka riendzo?— Hambiloko o kota ku baleka kambe swi ta n’wi tikela swinene. Xana a swi nge twisi ku vava loko munhu wo karhi a dlayiwa hi moya wa vuxika lowu titimelaka hileswi a a khomekile hi ku endla swilo swin’wana kutani a nga swi koti ku teka riendzo hi nkarhi lowu nga riki na khombo?—

Loko Yesu a vulavula hi ku ringeta ku baleka hi nkarhi wa vuxika, xana a a dyondzisa yini?

Xana wa swi twisisa leswi Yesu a a vula swona hi ku vula leswaku vanhu va nga rindzi kukondza ku fika vuxika ku ri kona va balekaka?— A a hi byela leswaku tanihi leswi hi swi tivaka leswaku Armagedoni yi le kusuhi, a hi fanelanga hi hlwela ku teka goza ra ku tirhela Xikwembu, loko hi nga hlweli hi kombisa leswaku ha xi rhandza. Loko hi hlwela hi nga kuma leswaku a wa ha ri kona nkarhi wa ku xi tirhela. Kutani hi ta va hi fana ni vanhu lava hanyeke hi nkarhi wa Ndhambi leyikulu, lava tweke xitsundzuxo xa Nowa kambe va nga ngheni engalaveni.

Eka xihloko lexi landzelaka, hi ta vulavula hi ndlela leyi vutomi byi nga ta va ha yona loko nyimpi leyikulu ya Armagedoni yi herile. Hi ta dyondza hileswi Xikwembu xi hi lunghiseleleke swona hina hinkwerhu lava xi rhandzaka ni lava xi tirhelaka sweswi.

Lawa i man’wana ya matsalwa lama kombisaka leswaku Armagedoni yi le kusuhi: 2 Timotiya 3:1-5; 2 Petro 3:3, 4.