Nghena endzeni

Hundzela eka leswi nga endzeni

 NDZIMA 22

Xivangelo Xo Papalata Ku Hemba

Xivangelo Xo Papalata Ku Hemba

AHI NGE wanhwana u byela mana wakwe a ku: “Ina, ndzi ta hatla ndzi vuya ekaya loko xikolo xi huma.” Kambe a nga hatli a vuya, a tlanga ni vanghana kutani loko a fika ekaya a byela mana wakwe a ku: “Thicara u ndzi kombele leswaku ndzi sala exikolweni.” Xana swi fanerile ku vula nchumu wo fana ni lowu?—

Xana mufana loyi u endle yini?

Kumbe, a hi nge mufana u byela tata wakwe a ku: “A ndzi tlanganga hi bolo endlwini.” Kambe ku vuriwa yini loko a tlangile hi yona? Xana swi fanerile ku vula a ku a nga tlanganga hi yona?—

Mudyondzisi Lonkulu u hi byerile leswi hi faneleke hi swi endla. U te: ‘Ntsena Ina wa n’wina a a ve Ina, E-e wa n’wina a va E-e; hikuva swin’wana ni swin’wana handle ka leswi swi huma eka lowo homboloka.’ (Matewu 5:37) Xana Yesu a a vula yini hi marito lawa?— A a vula leswaku hi fanele hi endla leswi hi swi vulaka.

Ku ni xitori xin’wana eBibeleni lexi kombisaka ntikelo wo vulavula ntiyiso. Xi vulavula hi vanhu  vambirhi lava a va tivula vadyondzisiwa va Yesu. A hi vone leswi nga humelela.

Loko ku nga si hela tin’hweti timbirhi Yesu a file, ku te vanhu vo tala eYerusalema, va huma etindhawini ta le kule, va ta enkhubyeni wa nkoka wa Vayuda, lowu a wu vitaniwa Pentekosta. Muapostola Petro u nyikele nkulumo leyi nga rivalekiki leyi eka yona a byeleke vanhu ha Yesu, loyi Yehovha a n’wi pfuxeke eku feni. Vanhu vo tala lava teke eYerusalema a vo sungula ku twa hi ta Yesu. Kutani va navele ku twa leswi engetelekeke. I yini lexi va xi endleke?

Va tshame nkarhi wo leha ku tlula lowu a va tiyimisele ku wu tshama. Kambe hi ku famba ka nkarhi, van’wana va vona va heleriwe hi mali naswona va lave mpfuno leswaku va ta kota ku xava swakudya. Vadyondzisiwa va le Yerusalema va lave ku pfuna vaendzi lava. Kutani, vo tala va vona va xavise leswi va nga na swona kutani va tisa mali eka vaapostola va Yesu. Hiloko vaapostola va hundzisela mali eka lava va yi pfumalaka.

Ananiya ni nsati wakwe, Safira, lava nga swirho swa vandlha ra Vukreste ra le Yerusalema va xavise nsimu ya vona. A va byelanga hi munhu leswaku va yi xavisa. Hi vona va tiendleleke xiboho xexo. Kambe  leswi a va swi endlanga hileswi a va rhandza vadyondzisiwa lava lavantshwa va Yesu. Kahle-kahle, Ananiya na Safira a va lava leswaku vanhu va anakanya leswaku va antswa. Hiloko va endla xiboho xo vula leswaku mali hinkwayo va ta nyikela ha yona leswaku va pfuna van’wana. Kambe, a va ta nyikela hi xiphemu xo karhi xa yona ntsena hambileswi vona va vuleke leswaku va ta nyikela hi yona hinkwayo. Xana u yi vona njhani mhaka leyi?—

Hiloko Ananiya a ta a ta vona vaapostola. U va nyike mali. Kambe Xikwembu a xi swi tiva leswaku a a nga yi humesanga hinkwayo. Kutani Xikwembu xi endle leswaku muapostola Petro a swi tiva leswaku Ananiya a a nga vulavuli ntiyiso.

Hi wahi mavunwa lawa Ananiy a ma byela Petro?

Hiloko Petro a ku: ‘Ananiya, ha yini u pfumelele Sathana a ku endlisa nchumu wo fana ni lowu? Nsimu a ku ri ya wena. A swi nga bohi leswaku u yi xavisa. Niloko se u yi xavisile, a swi ri eka wena leswaku u lava ku endla yini hi mali ya kona. Kambe ha yini u endle onge u humese mali hinkwayo kasi u lo humesa yin’wana ya yona? Sweswi a wu hembanga eka hina ntsena, kambe u hembe ni le ka Xikwembu.’

Leyi a hi mhaka yitsongo. Ananiya u hembile! A nga endlanga swona leswi a vuleke leswaku u swi endlile. U endle onge wa swi endla kasi a nga swi endlanga. Bibele yi hi byela leswi yeke emahlweni swi humelela. Yi ri: ‘Kuteloko Ananiya a twa marito ya Petro, a wela ehansi a fa.’ Xikwembu xi dlaye Ananiya! Endzhaku ka sweswo, ntsumbu wakwe wu humeseriwe ehandle wu ya celeriwa.

Xana ku humelele yini hi Ananiya hikwalaho ka leswi a nga hemba?

 Endzhaku ka tiawara tinharhu, ku nghene Safira. A a nga swi tivi leswi nga endleka eka nuna wakwe. Hiloko Petro a n’wi vutisa a ku: ‘Xana havumbirhi mi xavise nsimu hi ntsengo wa mali leyi mi hi nyikeke yona?’

Safira u hlamule a ku: ‘Ina, hi xavise nsimu hi mali yoleyo.’ Kambe wolawo a ku ri mavunwa! Ku ni mali leyi va nga titekela yona endzhaku ko xavisa nsimu leyi. Hiloko Xikwembu xi tlhela xi dlaya na Safira.—Mintirho 5:1-11.

I yini lexi hi faneleke hi xi dyondza eka leswi humeleleke Ananiya na Safira?— Hi dyondza leswaku Xikwembu a xi va lavi vanhu lava hembaka. Minkarhi hinkwayo xi lava leswaku hi vulavula ntiyiso. Kambe vanhu vo tala va vula leswaku ku hemba a swi bihanga. Xana u vona onge vanhu volavo va tiyisile?— Xana a wu swi tiva leswaku vuvabyi, switlhavi ni rifu, hinkwaswo swi ve kona laha misaveni hikwalaho ka mavunwa?—

I mani loyi Yesu a nge i munhu wo sungula ku hemba naswona vuyelo bya ku hemba ka yena byi ve byihi?

Tsundzuka leswaku Diyavulosi u byele Evha, wansati wo sungula, mavunwa. U n’wi byele leswaku a nge fi loko a tlula nawu wa Xikwembu kutani a dya mbhandzu lowu Xikwembu xi nga te a nga wu dyi. Evha u kholwe marito ya Diyavulosi kutani a dya mbhandzu wolowo. U tlhele a kucetela Adamu leswaku na yena a wu dya. Sweswo swi endle leswaku va va vadyohi naswona vana va vona hinkwavo a va ta velekiwa va ri vadyohi. Leswi a va ri vadyohi, hinkwavo vana va Adamu va xanisekile va tlhela va fa. Xana maxangu lawa hinkwawo ma sungule njhani?— Ma sungule hi vunwa.

Hi yona mhaka leyi Yesu a vuleke leswaku Diyavulosi “i muhembi ni tata wa mavunwa”! Hi yena munhu wo sungula ku vulavula mavunwa. Loko munhu wihi ni wihi a hemba, u endla nchumu lowu wu nga sunguriwa hi Diyavulosi. Leswi hi fanele hi swi tsundzuka  nkarhi wun’wana ni wun’wana loko hi tikuma hi lava ku vula mavunwa.—Yohane 8:44.

Hi rini laha u nga tikumaka u lava ku vulavula mavunwa?— Hiloko ku ri ni nchumu lowu hoxeke lowu u wu endleke, a swi tano ke?— Hambiloko u nga endlanga hi vomu, u nga ha faya nchumu wo karhi. Loko u vutisiwa, xana swi fanerile ku vula leswaku wu faye hi makwenu? Kumbe swi fanerile ku endla onge a wu swi tivi leswaku wu fayeke njhani?—

Hi rini laha u nga tikumaka u lava ku vulavula mavunwa?

Ku vuriwa yini loko a wu fanele u endla ntirho-kaya kambe u nga wu endli hinkwawo? Xana swi fanerile ku vula leswaku u wu hetile kasi a wu wu hetanga?— Hi fanele hi tsundzuka Ananiya na Safira. A va vulanga ntiyiso. Xikwembu xi kombise ku biha ka xiendlo xa vona hi ku va dlaya.

Xisweswo, ku nga khathariseki leswaku hi endla yini, loko hi hemba, timhaka ti to nyanya ku biha kutani hi fanele hi vula ntiyiso hinkwawo. Bibele yi ri: ‘Vulavula ntiyiso.’ Nakambe yi ri: “Mi nga hembelani.” Minkarhi hinkwayo Yehovha u vulavula ntiyiso naswona u langutele leswaku na hina hi endla tano.—Vaefesa 4:25; Vakolosa 3:9.

Hi fanele hi vulavula ntiyiso minkarhi hinkwayo. Leswi hi swona swi kandziyisiwaka eka Eksoda 20:16; Swivuriso 6:16-19; 12:19; 14:5; 16:6; na Vaheveru 4:13.