Yohane Mubatizi wanguja mujeri kutuliya pa nyengu yo Yesu wanguwere ku phwandu la Pasika wa mu 30 C.E. Yohane wakhumbanga kuti akusambira ŵaki wosi alondongi Yesu. Kweni ndi wosi cha wo angumulondo kutuliya po Yohane wangumangikiya.

Nyengu ya phwandu la Pasika wa mu 31 C.E. ye pafupi, akusambira anyaki aku Yohane anguza kwaku Yesu ndipu angumufumba kuti: “Ntchifukwa wuli isi ndi Afarisi tifunga kweni akusambira ŵinu afunga cha?” (Mateyu 9:14) Afarisi afunganga chifukwa chakuti wenga mwambu wa chisopa chawu. Ndichu chifukwa chaki Yesu wangugwiriskiya ntchitu chakuwoniyapu cha Mfarisi wakujikuzga yo nyengu yinyaki wangupemphera kuti: “Chiuta, nditikuwongani kuti ini ndiyanana cha ndi ŵanthu anyaki wosi . . . Ini ndifunga kaŵi sabata yeyosi.” (Luka 18:11, 12) Akusambira aku Yohane nawu atenere kuti afunganga mwamwambu ŵaka. Pamwenga afunganga chifukwa cha chitima cho ŵenga nachu ndi kumangika kwaku Yohane. Yiwu anguzizwa ukongwa chifukwa akusambira aku Yesu afunganga cha. Ndipu aŵanaŵananga kuti panyaki akusambira aku Yesu angukwaskika cha ndi vo vinguchitikiya Yohane.

Yesu wanguŵamuka mwakugwiriskiya ntchitu chakuyeruzgiyapu. Iyu wanguti: “Kumbi pe chifukwa chakuti abwezi a munthulumi mweneku wa nthengwa aliriyi penipo munthulumi mweneku wa nthengwa weche nawu limoza? Kweni mazuŵa ngatuza ngo munthulumi mweneku wa nthengwa wazamutuzgikaku kwaku yiwu, penipo ndipu azamufungiya.”—Mateyu 9:15.

Yohane mweneku wangukamba kuti Yesu we nge munthulumi mweneku wa nthengwa. (Yohane 3:28, 29) Pa nyengu yo Yesu wenga wamoyu, akusambira ŵaki afunganga cha. Kweni iyu wati wafwa, akusambira ŵaki ŵenga ndi chitima ukongwa ndipu akhumbanga cha kurya. Pavuli paki, vinthu vingusintha Yesu wati wayuskika ndipu ŵengavi chifukwa chakujaliya ndi chitima kweniso kufunga.

Pavuli paki, Yesu wangukamba ntharika ziŵi. Iyu wangukamba kuti: “Palivi munthu yo wangagambika chigamba chifya palaya lakubwalu lidala, chifukwa chigamba chifya chinganyimphuwa laya lidala ndipu chingachitiska kuti po panyimphuka paŵi pasani ukongwa. Ndipuso palivi munthu yo wangaŵika vinyu wasonu mumathumba ngadala ngachikopa. Chifukwa asani wangachita viyo, mathumba ngo ngangaphumuka, vinyu yo wangadika ndipu mathumba nganganangika. Kweni ŵanthu aŵika vinyu wasonu mumathumba ngachikopa ngafya ndipu vosi viŵi vinangika cha.” (Mateyu 9:16, 17) Kumbi penapa Yesu wang’anamuwanganji?

Yesu wakhumbanga kuwovya akusambira aku Yohane Mubatizi kuti avwisi chifukwa cho akusambira ŵaki alekiyanga kuchitaku miyambu yakali ya Chiyuda nge kufunga. Yesu wanguza pacharu kuzisazgiyapu miyambu yasonu cha pa miyambu yakali ya kusopa yo yenga pafupi kuleka kugwira ntchitu. Kusopa ko Yesu wachiskanga kwenga kwakupambana ndi ko Ayuda achitanga chifukwa yiwu asazganga marangu ngaku Chiuta ndi miyambu ya ŵanthu. Mwaviyo, Yesu wakhumbanga cha kuto chigamba chifya ndi kugambika pa chakuvwala chidala pamwenga kuto vinyu wasonu ndi kumuŵika mumathumba ngadala ngachikopa.