Julani

Lutani pa vo ve mukati

 MUTU 45

Yesu Wangutuzga Viŵanda Vinandi

Yesu Wangutuzga Viŵanda Vinandi

MATEYU 8:28-34 MARIKO 5:1-20 LUKA 8:26-39

  • WANGUTUZGA VIŴANDA NDIPU VINGUSERE MU NKHUMBA

Akusambira aku Yesu ŵati akumana ndi vinthu vakofya panyanja, anguchifika kumtunda. Ŵati afika ŵaka, angukumana ndi anthulumi ŵaŵi akofya wo ŵenga ndi viŵanda. Ŵanthu ŵenaŵa, angutuliya ku masanu ngo ngenga pafupi ndipu angutchimbiya kuti akakumani ndi Yesu. Kweni nkhani iyi yikonkhoska ukongwa za munthu yumoza pa ŵanthu ŵaŵi ŵenaŵa, panyaki chifukwa chakuti wenga wakofya ukongwa kweniso wangukoleka ndi viŵanda kwa nyengu yitali.

Munthu mwenuyu wavwisanga lisungu ukongwa ndipu kanandi wavwalanga chechosi cha. Nyengu zosi msana ndi usiku “wadanirizanga mumiwunda ndi mumapiri ndipu wajichekangachekanga ndi mya.” (Mariko 5:5) Munthu mwenuyu wenga wakofya ukongwa, mwakuti ŵanthu achitanga mantha kwenda mumsewu wo wenga mumphepeti mwa masanu ngenanga. Ŵanthu anyaki anguyesapu kumumanga ndi matcheni kweni iyu wadomonga matcheni ngo amumangiyanga kweniso wapapasuwanga matangaza ngo aŵikangamu malundi ngaki. Palivi munthu yo wenga ndi nthazi zakumuthereske.

Munthu yo wati wafika pafupi ndi Yesu, wanguwa pa malundi ngaku Yesu ndipu viŵanda vinguchitiska kuti wadanirizi kuti: “Ndakunangiyaninji Yesu, Mwana waku Chiuta Wapachanya Limu? Lapizgani pa masu paku Chiuta kuti mutitombozgengi cha.” Yesu wangulongo kuti wenga ndi nthazi zakulamuliya viŵanda ndipu wangukamba kuti: “Tuwamu mu munthu uyu, mzimu uheni yiwi.”—Mariko 5:7, 8.

Kukamba uneneska munthu uyu wenga ndi viŵanda vinandi. Tikamba viyo chifukwa Yesu wati wamufumba kuti, “Zina laku ndiwi yani?” iyu wangumuka kuti: “Ndini Mzinda, chifukwa te anandi.” (Mariko 5:9) Zina lakuti mzinda lamiyanga gulu la asilikali ŵa Aroma wo ajangapu masauzandi nganandi. Venivi vilongo kuti viŵanda vo venga mwa munthu mwenuyu venga vinandi ndipu vakondwanga kuti munthu uyu wasuzgika. Pavuli paki, viŵanda vo vingupempha Yesu kuti “waleki kuvilamula kuti viluti kuchizenji.” Mwambula kukayika, viŵanda venivi vaziŵanga vinthu vo vazamuchitikiya ivu kweniso mulongozgi wawu Satana.—Luka 8:31.

Pafupi ndi malu ngenanga penga nkhumba pafufupi 2,000 zo zaryanga. Mwakukoliyana ndi Dangu, nkhumba zenga zakufipiskika ndipu Ayuda azomerezekanga cha kuŵeta nkhumba. Viŵanda vingukambiya Yesu kuti: “Titumeni mu nkhumba kuti tikasere mwaku izu.” (Mariko 5:12) Yesu wanguvikambiya kuti vikasere munkhumba zo. Vati vasere ŵaka, nkhumba zosi 2,000  zingutchimbiliya kuchinkhwawu ndipu zingubila munyanja.

Ŵanthu wo aryisanga nkhumba zenizi ŵati awona kuti zabila munyanja, anguluta m’matawuni ndipuso kumizi kuchikambiya ŵanthu vo vinguchitika. Ŵanthu anandi anguza kuti aziwoni vo vinguchitika. Ŵati afika, angusaniya kuti munthu yo wenga ndi viŵanda wachira, wavwala kweniso waja pasi pafupi ndi Yesu.

Ŵanthu wo anguvwa nkhani yeniyi pamwenga wo anguwona munthu mwenuyu, anguchita mantha, ndipu awopanga vinthu vinyaki vo Yesu watingi wachitengi. Yiwu angukambiya Yesu kuti watuwemu muchigaŵa chawu. Pa nyengu yo Yesu wakweranga boti kuti wakengi, munthu yo wangumutuzga viŵanda wangupempha Yesu kuti waluti nayu. Kweni Yesu wangukambiya munthu mwenuyu kuti: “Luta kunyumba kwa abali ŵaku, ukaŵakambiyi vosi vo Yehova wakuchitiya ndipuso lisungu lo wakulongo.”—Mariko 5:19.

Kanandi Yesu wakambiyanga ŵanthu wo waŵachizganga kuti angakambiyanga ŵanthu cha vinthu vo iyu wachita. Iyu wachitanga venivi chifukwa wakhumbanga cha kuti ŵanthu amugomezgengi chifukwa cha vinthu vo ŵavwa vakukwaskana ndi iyu. Kweni munthu uyu wati watuzgika viŵanda, wangulongo ukaboni wakuti Yesu wenga ndi nthazi kuluska viŵanda. Munthu mwenuyu wangupharazgiya ŵanthu wo Yesu watingi wakafikengeku cha kuti wakaŵapharazgiyi. Ukaboni wo munthu uyu wangupereka, unguwovya so kuti ŵeneku a nkhumba zo zingubila munyanja aleki kudandawula ukongwa. Mwaviyo, munthu yo wanguluta kuchipharazga muchigaŵa chosi cha Dekapoli vinthu vo Yesu wangumuchitiya.