Julani

Lutani pa vo ve mukati

 MUTU 27

Yesu Wangudana Mateyu

Yesu Wangudana Mateyu

MATEYU 9:9-13 MARIKO 2:13-17 LUKA 5:27-32

  • YESU WANGUDANA MATEYU WAKUSONKHESA MSONKHU

  • KHRISTU WACHEZANGA NDI ŴANTHU AKUBUDA KUTI WAŴAWOVYI

Pati pajumpha nyengu yimanavi kutuliya po wanguchizgiya munthu wakufwa viŵalu, Yesu wanguja mbwenu ku Kaperenao tawuni yo yenga mumphepeti mwa Nyanja ya Galileya. Ŵanthu anandi anguza kwaku iyu ndipu wangwamba kuŵasambiza. Nyengu yinyaki wachiyenda, wanguwona Mateyu yo waziŵikanga so kuti Levi we mu ofesi yamsonkhu. Yesu wangukambiya Mateyu kuti: “Ja wakusambira wangu.”—Mateyu 9:9.

Mateyu watenere kuti wanguvwapu uthenga wo Yesu wapharazganga kweniso vakuziziswa vo iyu wanguchita ku Kaperenao, mwakuyanana ndi mo Peturo, Andireya, Yakobe ndi Yohane anguchitiya. Nge mo venge ndi akusambira anayi ŵenaŵa, Mateyu wanguzomera kulondo Yesu nyengu yeniyo. Mu Buku la Uthenga Wamampha lo Mateyu wangulemba, wangukonkhoska nkhani yeniyi ndipu wangukamba kuti: “[Mateyu] wangusoka nyengu yeniyo ndi kwamba kumulondo.” (Mateyu 9:9) Mwaviyo, Mateyu wanguleka ntchitu yaki yakusonkhesa msonkhu ndipu wanguja wakusambira waku Yesu.

Pati pajumpha nyengu, Mateyu wangunozga phwandu likulu kunyumba yaki. Panyaki wanguchita viyo kuti walongo kuwonga mwaŵi wakudanika kuti waje wakusambira waku Yesu. Kumbi mbayani anyaki wo angudanika ku phwandu lenili kupatuwaku Yesu ndi akusambira ŵaki? Pa phwandu ili, penga so ŵanthu anyaki wo Mateyu wachezanga nawu kali kweniso ŵanthu wo wagwiranga nawu ntchitu yakusonkhesa msonkhu. Ŵanthu ŵenaŵa asonkhesanga msonkhu wa boma la Aroma lo ŵanthu alitinkhanga. Yiwu asonkhesanga so msonkhu wa sitima zo zazanga ku malu ngakumaku sitima, wa ngolu zo zayendanga mumisewu yikuluyikulu kweniso wa katundu yo watuliyanga kuvyaru vinyaki. Kumbi Ayuda aŵawonanga wuli ŵanthu wo asonkhesanga msonkhu? Yiwu aŵatinkhanga chifukwa aŵatchajanga ndalama zinandi zakujumpha zo akhumbikanga kupereka. Pa phwandu lo Mateyu wangunozga, penga so ŵanthu anyaki ‘akubuda’ wo aziŵikanga kuti achitanga vinthu viheni.—Luka 7:37-39.

Afarisi wo ŵenga akujikuzga ŵati awona kuti Yesu we ndi akusonkhesa msonkhu kweniso akubuda, angufumba akusambira ŵaki kuti: “Ntchifukwa wuli msambizi winu waryiya limoza ndi ŵanthu akusonkhesa msonkhu kweniso akubuda?” (Mateyu 9:11) Yesu wati wavwa vo yiwu akambanga wangumuka kuti: “Ŵanthu ambula kutama akhumba dokotala cha, kweni wo atama ndiwu. Sonu lutani mukasambiri vo mazu yanga ngang’anamuwa: ‘Ndikhumba sembi cha kweni lisungu.’ Pakuti ndikuza kuzidana arunji cha, kweni akubuda.” (Mateyu 9:12, 13; Hoseya 6:6) Chinanga kuti Afarisi akambanga Yesu kuti “msambizi,” yiwu agomezganga cha kuti wenga msambizi. Mwaviyo, akhumbanga cha kusambira vo Yesu wasambizanga chinanga kuti aziŵanga kuti vo iyu wasambizanga venga vauneneska.

Mateyu wangudana ŵanthu wo asonkhesanga msonkhu ndi akubuda kuti azivwisiyi uthenga wo Yesu wapharazganga, kweniso kuti achizgiki mwauzimu, “chifukwa anandi mwaku yiwu amulondonga.” (Mariko 2:15) Yesu wakhumbanga kuwovya ŵanthu ŵenaŵa kuti aje pa ubwezi wamampha ndi Chiuta. Mwakupambana ndi Afarisi wo ŵenga akujikuzga, Yesu waŵanyozanga cha ŵanthu ŵenaŵa. Chifukwa chakuti waŵachitiyanga lisungu, iyu waŵawovyanga mwauzimu nge mo dokotala wangachitiya ndi ŵanthu wo atama.

Yesu wanguchitiya lisungu ŵanthu akusonkhesa msonkhu ndi akubuda chifukwa chakuti wakondwanga ndi maubudi ngawu cha. Kweni iyu wakhumbanga kuŵalongo lisungu mwakuyanana ndi mo wanguchitiya ndi ŵanthu wo wanguŵachizga. Mwakuyeruzgiyapu, wanguvwiya lisungu munthu yo wenga ndi makhati ndipu wangumukambiya kuti: “Ndikhumba! Towa.” (Mateyu 8:3) Mwakuyanana ŵaka, nasi tikhumbika kuchitiya lisungu ŵanthu kuti tiŵawovyi mwauzimu.