Julani

Lutani pa vo ve mukati

 MUTU 14

Yesu Wangwamba Kusaniya Akusambira

Yesu Wangwamba Kusaniya Akusambira

YOHANE 1:29-51

  • AKUSAMBIRA AKWAMBA AKU YESU

Yesu wati waja mazuŵa 40 muchipululu ndipuso wechendawere ku Galileya, wanguluta so kwaku Yohane yo wangumubatiza. Yesu wati wafika pafupi, Yohane wangukambiya ŵanthu wo wenga nawu kuti: “Awonani Mwanawambereri waku Chiuta yo watuzgapu ubudi wa charu! Mwenuyu ndiyu ndakambanga kuti: ‘Yo watuza pavuli pangu wandidanjiriya, chifukwa iyu wakuŵaku ini ndechendaŵeku.’” (Yohane 1:29, 30) Chinanga kuti Yohane wenga mura kwaku Yesu, kweni waziŵanga kuti Yesu wenga kuchanya iyu wechendaweku.

Kwati kwaja masabata ngamanavi kuti Yesu wabatiziki, Yohane wangusimikiza cha kuti Yesu ndiyu wazamuja Mesiya. Iyu wangukamba kuti: “Ini nani ndamuziŵanga cha, kweni chifukwa cho ndikuziya kuzibatiza mumaji ntchakuti iyu waziŵiki kwa Ayisirayeli.”—Yohane 1:31.

Yohane wangulutirizga kukonkhoske ŵanthu vo vinguchitika pa nyengu yo wabatizanga Yesu. Iyu wangukamba kuti: “Ndinguwona mzimu uchisika nge nkhunda kutuliya kuchanya, ndipu unguja paku iyu. Chinanga ndini ndamuziŵanga cha. Kweni yo wakundituma kuti ndibatizengi mumaji ndiyu wangundikambiya kuti: ‘Munthu yo wakumuwona kuti mzimu utimusikiya ndi kuja paku iyu, mweniyo ndiyu wabatiza ndi mzimu wakupaturika.’ Ini ndawuwona mzimu wo, ndipu ndapereka ukaboni wakuti mwenuyu ndiyu Mwana waku Chiuta.”—Yohane 1:32-34.

Mawa laki, Yesu wanguluta so kwaku Yohane. Pa nyengu iyi Yohane wenga ndi akusambira ŵaki ŵaŵi. Ndipu iyu wangukamba kuti: “Wonani Mwanawambereri waku Chiuta!” (Yohane 1:36) Yohane Mubatizi wati wakamba mazu ngenanga, akusambira ŵaki ŵaŵi angwamba kulondo Yesu. Yumoza mwa akusambira ŵenaŵa wenga Andireya. Munyaki wenga Yohane ndipu viwoneka kuti ndiyu wangulemba nkhani yeniyi. Viwoneka so kuti Yohane mwenuyu wenga muvurwa waku Yesu chifukwa wenga mwana waku Salomi, anyina amana aku Yesu. Salomi wenga muvurwa waku Mariya ndipu mulumu waki wenga Zebediya.

Yesu wangung’anamuka ndipu wati wawona Andireya ndi Yohane, wanguŵafumba kuti: “Mupenjanji?”

Yiwu angumufumba kuti: “Rabi, muja pani?”

Yesu wanguŵamuka kuti: “Tiyeni mukawoneku.”—Yohane 1:37-39.

Andireya ndi Yohane anguja ndi Yesu zuŵa losi lamphumphu. Cha m’ma 4 koloku mazulu, Andireya wangukumana ndi muku waki Simoni yo waziŵikanga so kuti Peturo. Ndipu wangumukambiya mwakukondwa kuti: “Tamusaniya Mesiya.” (Yohane 1:41) Andireya wanguluta ndi Peturo kwaku Yesu. Vinthu vo vinguchitika pavuli paki vilongo kuti Yohane wangukumana ndi muku waki Yakobe, ndipu wanguluta nayu kwaku Yesu. Kweni Yohane wangukonkhoska cha vo vinguchitika mu nkhani yo wangulemba.

Mawa laki, Yesu wangukumana ndi Filipu wa ku Betisayida. Tawuni yeniyi yenga kunkhondi kwa Nyanja ya Galileya, ndipuso kwenuku ndiku kwenga kumuzi waku Andireya ndi Peturo. Yesu wangukambiya Filipu kuti: “Ja wakusambira wangu.”—Yohane 1:43.

 Pavuli paki, Filipu wangukumana ndi Natanayeli yo waziŵikanga so kuti Batolomeyu, ndipu wangumukambiya kuti: “Tasaniya munthu yo Mozesi wangumulemba mu Dangu kweniso yo wakulembeka mu Vakulemba va Achimi. Iyu ndi Yesu mwana waku Yosefi wa ku Nazareti.” Natanayeli wangukayikiya ndipu wangukamba kuti: “Ku Nazareti kungatuwa kanthu kamampha?”

Filipu wangumukambiya kuti: “Iza uziwoni.” Yesu wati wawona Natanayeli wachiza kwaku iyu, wangukamba kuti: “Wonani Myisirayeli yo mwaku iyu mulivi boza.”

Natanayeli wangufumba kuti: “Mwandiziŵa wuli?”

Yesu wangumuka kuti: “Filipu wechendakudani, ndingukuwona waja pasi pa chimiti cha mkuyu.”

Natanayeli wanguzizwa ukongwa ndipu wangukamba kuti: “Rabi, ndimwi Mwana waku Chiuta, ndimwi Fumu ya Isirayeli.”

Yesu wangumufumba kuti: “Wagomezga chifukwa ndakamba kuti ndakuwona waja pasi pa chimiti cha mkuyu? Wazamuwona vinthu vikulu kuluska ivi.” Pavuli paki, Yesu wanguŵalayizga kuti: “Nditikuneneskiyani mwaŵanthu yimwi, mwazamuwona kuchanya kuchijulika, ndipuso angelu achikwere ndi kusikiya ku Mwana wa munthu.”—Yohane 1:45-51.

Pavuli paki, Yesu ndi akusambira ŵaki wo wangusaniya, angutuwaku ku Dambu la Yorodani ndipu anguluta ku Galileya.