Julani

Lutani pa vo ve mukati

 MUTU 6

Mwana Yo Chiuta Wangulayizga

Mwana Yo Chiuta Wangulayizga

LUKA 2:21-39

  • YESU WANGUDUMULIKA NDIPU PAVULI PAKI ANGULUTA NAYU KUNYUMBA YAKUSOPIYAMU

M’malu mwakuwere ku Nazareti, Yosefi ndi Mariya angulutirizga kuja ku Betelehemu. Yesu wati wakwanisa mazuŵa 8, angumudumuwa. Anguchita ivi chifukwa ndivu Dangu lo Chiuta wangupaska Ayisirayeli lakambanga. (Ŵalevi 12:2, 3) Mwana munthulumi amupaskanga so zina pa zuŵa lenili. Wenuwu ndiwu wenga mwambu wawu. Mwaviyo, Yosefi ndi Mariya angupaska mwana wawu zina lakuti Yesu nge mo mungelu Gabiriyeli wanguŵakambiya.

Pavuli paki, Yesu wati wakwanisa mazuŵa 40, Yosefi ndi Mariya anguluta nayu kunyumba yakusopiyamu ku Yerusalemu. Kutuwa ko ajanga kuchifika ku Yerusalemu, wenga ulendu wa makilomita ngamanavi. Dangu lakambanga kuti asani pajumpha mazuŵa 40 kutuliya po munthukazi wabaliya mwana munthulumi, wakhumbikanga kuchipereka sembi kunyumba yakusopiyamu kuti watoweseki.—Ŵalevi 12:4-8.

Venivi ndivu Mariya wanguchita. Pakuchipereka sembi, iyu wangupinga tiyuni tiŵi timanatimana. Venivi vititiwovya kuziŵa mo vinthu venge pa umoyu waku Yosefi ndi Mariya. Dangu lakambanga kuti munthukazi wakhumbikanga kupereka mbereri yimana yinthulumi ndi kayuni. Asani wangakwanisa cha kupereka mbereri yimana yinthulumi, wangapereka njiŵa ziŵi pamwenga viwunda viŵi. Ndimu venge ndi Mariya.

Pa nyengu yo Yosefi ndi Mariya ŵenga munyumba yakusopiyamu, munthu munyaki wakukota zina laki Simiyoni, wanguza po ŵenga. Chiuta wanguvumbuliya Simiyoni kuti wechendafwi wazamuwona Khristu pamwenga kuti Mesiya yo Yehova wangulayizga. Pa zuŵa ili, mzimu wakupaturika ungulongezge Simiyoni kunyumba yakusopiyamu. Kwenuku wangusaniya Yosefi ndi Mariya limoza ndi mwana wawu. Simiyoni wangumunyamuwa m’manja.

Wati wanyamuwa Yesu, Simiyoni wanguwonga Chiuta kuti: “Ambuya Fumu Yikulu, sonu mwazomereza kuti kapolu winu waluti muchimangu mwakukoliyana ndi vo mungukamba, chifukwa masu ngangu ngawona nthowa yinu yakutaskiya, yo mungunozga kuti ŵanthu wosi awoni ukweru wakutuzgapu mdima wo ubulumutizga mitundu ya ŵanthu kweniso kuti awoni unkhankhu wa ŵanthu ŵinu, Ayisirayeli.”—Luka 2:29-32.

Yosefi ndi Mariya anguzizwa ukongwa ŵati avwa mazu ngenanga. Simiyoni wanguŵatumbika ndipu wangukambiya Mariya kuti mwana waki “wasankhika kuti Ayisirayeli anandi awi pasi ndi kuyuka so.” Wangumukambiya so kuti chitima cho che nge lipanga lakuthwa chazakumugwaza.—Luka 2:34.

Munthu munyaki yo wenga so kunyumba yakusopiyamu pa zuŵa ili, wenga mchimi munthukazi zina laki Ana. Pa nyengu iyi wenga ndi vyaka 84. Iyu wapambanga cha panyumba yakusopiyamu. Ana wanguza po penga Yosefi, Mariya ndi mwana wawu Yesu. Iyu wangwamba kuwonga Chiuta ndipuso kukambiya ŵanthu wosi vakukwaskana ndi Yesu.

Yosefi ndi Mariya atenere kuti angukondwa ukongwa ndi vinthu vo vinguchitika munyumba yakusopiyamu. Ivi vinguŵawovya kusimikiza kuti mwana wawu wenga nadi Mwana yo Chiuta Wangulayizga.