Julani

Lutani pa vo ve mukati

 MUTU 115

Yesu Wanguchita Pasika Wakumaliya

Yesu Wanguchita Pasika Wakumaliya

MATEYU 26:1-5, 14-19 MARIKO 14:1, 2, 10-16 LUKA 22:1-13

  • YUDASI WA KU KERIYOTI WANGUPASKIKA NDALAMA KUTI WAPEREKI YESU

  • AKUTUMIKA ŴAŴI ANGUNOZGA MALU NGAKUCHITIYA PASIKA

Yesu wangumaliza kusambiza kweniso kumuka mafumbu ngo akutumika ŵaki anayi angumufumba pa Phiri la Maolivi. Akutumika ŵenaŵa akhumbanga kuziŵa vo vazamuchitika pa nyengu ya kuŵapu kwaki ndipuso kumala kwa mugonezi wunu.

Pa zuŵa la Nisani 11, Yesu wanguchita vinthu vinandi ukongwa. Viwoneka kuti pa nyengu yo aweriyanga ku Betaniya kuti akagoni, ndipu Yesu wangukambiya akusambira ŵaki kuti: “Muziŵa kuti kwaja mazuŵa ngaŵi pe kuti phwandu la Pasika lichitiki ndipu Mwana wa munthu waperekekengi kuti wapayikiki pachimiti.”—Mateyu 26:2.

Pa Nisani 12, zuŵa la Chitatu, Yesu watenere kuti wanguluta kwaku yija ndi akutumika ŵaki. Zana laki pa zuŵa la Chiŵi, iyu wanguchenya alongozgi achisopa ndipu wanguvumbuwa pakweru vinthu viheni vo achitanga. Mwaviyo, yiwu akhumbanga kumubaya. Ndichu chifukwa chaki zuŵa la Nisani 12 lenili, Yesu wanguwoneke cha ku ŵanthu. Iyu wakhumbanga cha kuti chinthu chinyaki chimutondekesi kuchita phwandu la Pasika limoza ndi akusambira ŵaki. Phwandu lenili linguchitika mawa laki pa Nisani 14 lumwi lati lasere.

Kweni phwandu la Pasika lechendayambi, ŵara ŵa asembi ndi ŵara angukumana mubalaza laku Kayafa, yo wenga wasembi mura. Ntchifukwa wuli yiwu anguwungana? Yiwu angukwiya chifukwa Yesu wangukamba pakweru vinthu viheni vo achitanga. Pa nyengu iyi, yiwu angupangana “kuti ako Yesu mwauryarya ndi kumubaya.” Kumbi yiwu atingi achitengi wuli venivi? Yiwu angukamba kuti: “Tingamukoliyanga pa phwandu cha, chifukwa mbwenu ŵanthu achitengi vivulupi.” (Mateyu 26:4, 5) Yiwu angukamba viyo chifukwa aziŵanga kuti ŵanthu anandi amuyanjanga ukongwa Yesu.

Pati pajumpha nyengu yimanavi, alongozgi achisopa ŵenaŵa angulonde mulendu. Yiwu anguzizwa ukongwa kuwona kuti mulendu mwenuyu wenga Yudasi wa ku Keriyoti yo wenga wakutumika waku Yesu. Satana ndiyu wanguchitiska Yudasi wa ku Keriyoti kuti waje ndi maŵanaŵanu ngakuti wapereki Mbuyaki. Yudasi wanguŵafumba kuti: “Mundipaskengenji asani ndamupereka kwaku yimwi?” (Mateyu 26:15) Yiwu angukondwa  ukongwa ŵati ŵavwa venivi ndipu “angupangana nayu kuti amupaskengi ndalama zasiliva.” (Luka 22:5) Kumbi angumupaska ndalama zilinga? Yiwu angupangana kuti amupaski ndalama 30 zasiliva. Pa nyengu yeniyo, kapolu wagulisikanga pa mtengu wa masekeli 30. (Chituwa 21:32) Mwaviyo, pakulayizga kuti amupaskengi ndalama zenizi, yiwu angulongo kuti amutinkhanga ukongwa Yesu, ndipu amuwonanga nge munthu wambula fundu. Pavuli paki, Yudasi wangwamba “kupenja mpata wamampha wakuti wamupereke kwaku yiwu kwambula chigulu cha ŵanthu.”—Luka 22:6.

Zuŵa la Nisani 13 lingwamba pa Chitatu ndi mazulu lumwi lati lasere, ndipu lenili lenga zuŵa la nambala 6 kweniso wenga usiku wakumaliya kuti Yesu wagoni ku Betaniya. Mawa laki, angumaliza kunozgeke phwandu la Pasika. Yiwu akhumbikanga kusaniya mwana wa mbereri kuti amubayi ndi kumuwotcha wamphumphu asani zuŵa la Nisani 14 layamba. Kumbi yiwu achiryiyanga nunkhu chakurya, nanga ndiyani yo wangunozga chakurya? Yesu wangukambiya munthu weyosi cha vakukwaskana ndi munthu yo watingi wanozgengi chakurya kweniso malu ngo atingi akaryiyengi. Mwaviyo, pakuti Yudasi waziŵanga chechosi cha pa nkhani iyi, iyu wangutondeka kuchikambiya ŵara ŵa asembi malu ngo atingi akamusaniyengi.

Viwoneka kuti zuŵa la Chinayi ndi musana, ndipu Yesu wangutuma Peturo ndi Yohane kutuwa ku Betaniya. Iyu wanguŵakambiya kuti: “Lutani kuchitinozge Pasika kuti tiryi.” Yiwu angumufumba kuti: “Mupenja kuti tikakunozgiyeni nunkhu?” Yesu wanguŵakambiya kuti: “Asani mwasere mutawuni, munthu yo wapinga msuku wa maji wamukumana namwi. Mukamulondo mpaka munyumba yo wamusere. Ndipu mukafumbi mweneku wa nyumba kuti, ‘Msambizi wakamba kuti: “Kumbi chipinda cha alendu che pani kuti ndiryiyemu Pasika ndi akusambira ŵangu?”’ Iyu wakukulongoni chipinda chamuchanya kweniso chikulu cho che ndi vosi vakukhumbika. Mwenimo ndimu mukatinozge Pasika.”—Luka 22:8-12.

Tikayika cha kuti mweneku wa nyumba yeniyi wenga wakusambira waku Yesu. Viwoneka kuti nayu walindizganga kuti Yesu wamupemphengi kuti wakachiti phwandu la Pasika munyumba yaki. Akutumika ŵenaŵa ŵati afika ku Yerusalemu, angusaniya chechosi nge mo Yesu wanguŵakambiya. Mwaviyo, akutumika aku Yesu anguwonesesa kuti mwana wa mbereri wabayika ndipu chakurya cha Pasika chakukwana ŵanthu 13, Yesu ndi akutumika ŵaki 12 chanozgeka.