Julani

Lutani pa vo ve mukati

 MUTU 46

Wanguchizgika Wati Wako Chakuvwala Chaku Yesu

Wanguchizgika Wati Wako Chakuvwala Chaku Yesu

MATEYU 9:18-22 MARIKO 5:21-34 LUKA 8:40-48

  • MUNTHUKAZI WANGUCHIZGIKA WATI WAKO CHAKUVWALA CHAKU YESU

Ayuda wo ajanga kunkhondi chakuzambwi kwa Nyanja ya Galileya anguvwa kuti Yesu wawe kutuwa ku Dekapoli. Ŵanthu anandi atenere kuti anguvwa kuti Yesu wangulekesa chimphepu kweniso mayiŵa pa nyanja ndipu anyaki atenere kuti anguziŵa so kuti wanguchizga ŵanthu wo ŵenga ndi viŵanda. Mwaviyo, “chigulu chikulu cha ŵanthu” chinguwungana mumphepeti mwa nyanja kuti akalondere Yesu. Ndipu kwenuku kutenere kuti kwenga kuchigaŵa cha Kaperenao. (Mariko 5:21) Yesu wati wafika ku mtunda, ŵanthu wo akhumbisiskanga kuwona vo iyu watingi wachitengi.

Yumoza mwa ŵanthu wo akhumbanga kuwona Yesu, wenga Yairo. Iyu wenga yumoza wa alongozgi a sinagogi, ndipu sinagogi mwenuyu watenere kuti wenga wa ku Kaperenao. Yairo wanguwa pamalundi ngaku Yesu ndipu wangumupempha mwakuwerezawereza kuti: “Mwana wangu munthukazi watama ukongwa. Chondi, tiyeni mukaŵiki manja nginu paku iyu kuti wakachiri ndi kuja ndi umoyu.” (Mariko 5:23) Ndipu Yesu wakhumbanga kuwovya mwana yumoza pe waku Yairo. Mwana mwenuyu wenga ndi vyaka 12, kweniso Yairo wamuyanjanga ukongwa.—Luka 8:42.

Yesu wachiluta ku nyumba yaku Yairo, panthowa panguchitika chinthu chinyaki. Ŵanthu anandi wo aperekezanga Yesu akhumbisiskanga kumuwona wachichita chakuziziswa chinyaki. Kweni pagulu lenili, penga munthukazi munyaki yo waŵanaŵaniyanga ukongwa za suzgu lo wenga nalu.

Munthukazi mwenuyu, wenga Myuda ndipu wangusuzgika ndi nthenda yakusuluwa ndopa kwa vyaka 12. Iyu wanguyesesa kupenja chovyu kwa madokotala ngakupambanapambana ndipu wangumala ndalama zaki zosi kulipiriya munkhwala wo amupaskanga. Kweni matenda ngaki ngangumala cha. M’malu mwaki nthenda yaki “yakuwanga ukongwa.”—Mariko 5:26.

Asani mungaŵanaŵaniya za matenda nga munthukazi mwenuyu, mungawona kuti ngamuchitisanga kuti wajengi wakufoka kweniso ngenga ngakuchitisa soni mwakuti venga vakusuzga kungakonkhoska pa gulu la ŵanthu. Kweniso Dangu laku Mozesi lakambanga kuti asani munthukazi wasuluwa ndopa, wakhumbikanga kuja wakufipiskika pa nyengu yosi yo wasuluwa ndopa. Ndipu munthu weyosi yo wamuko pamwenga wako chakuvwala chaki wakhumbikanga kusamba ndipu wajanga wakufipiskika kufika mazulu.—Ŵalevi 15:25-27.

Munthukazi uyu ‘wanguvwa vakukwaskana ndi Yesu,’ ndipu wangwamba kumupenja. Chifukwa chakuti wenga wakufipiskika, wangusere muchigulu cha ŵanthu mwachisisi ndipu mumtima mwaki wakambanga kuti: “Asani ndingako ŵaka malaya ngaki ngakubwalu, ndichirengi.” Wati wako mphonji za laya lakubwalu laku Yesu, nyengu yeniyo wangujivwa kuti ndopa zaleka kusuluwa. Iyu “wanguchizgika ku nthenda yaki yikulu.”—Mariko 5:27-29.

Pavuli paki, Yesu wangukamba kuti: “Ndiyani yo wandikwaska?” Kumbi muŵanaŵana kuti munthukazi uyu wanguvwa wuli wati wavwa mazu ngenanga? Peturo wangumuka Yesu kuti: “Msambizi, mwe mukati mwa chigulu cha ŵanthu ndipuso atikufinyikizani.” Nanga ntchifukwa wuli Yesu wangufumba kuti, “Ndiyani yo wandikwaska?” Yesu wangukamba kuti: “Munthu munyaki wandikwaska, chifukwa ndawona kuti nthazi zatuwa mwaku ini.” (Luka 8:45, 46) Mwaviyo, vo Yesu wanguchita pakuchizga munthukazi mwenuyu, vingulongo kuti we ndi nthazi zakuchizgiya matenda.

Munthukazi uyu wati waziŵa kuti ŵanthu aziŵa kuti ndiyu wanguko Yesu, wanguchita mantha ndipu wanguwa panthazi paku Yesu wachinjekeme. Pamasu pa ŵanthu wosi, iyu wangukamba uneneska wakukwaskana ndi suzgu lo wenga nalu ndipu wangukamba so kuti wachizgika. Yesu wangumupembuzga mwa chanju, ndipu wangumukambiya kuti: “Mwana wangu, chivwanu chaku chakuchizga. Luta mu chimangu ndipu uchizgiki ku nthenda yaku yikulu.”—Mariko 5:34.

Venivi vilongole limu kuti Munthu yo Chiuta wakusankha kuti wazilamuliyi charu, ngwachanju, ngwalisungu, wachita vinthu vakuŵanaŵaniya ŵanthu anyaki kweniso we ndi nthazi zakuwovye ŵanthu akusuzgika.