Julani

Lutani pa vo ve mukati

 MUTU 48

Yesu Wanguchita Vakuziziswa, Kweni Ŵanthu Angumukana Chinanga Nkhumuzi Kwaki ku Nazareti

Yesu Wanguchita Vakuziziswa, Kweni Ŵanthu Angumukana Chinanga Nkhumuzi Kwaki ku Nazareti

MATEYU 9:27-34; 13:54-58 MARIKO 6:1-6

  • YESU WANGUCHIZGA ŴANTHU ACHIBULUMUTIYA NDIPUSO MUNTHU YO WATONDEKANGA KUŴEREŴETA

  • ŴANTHU A KU NAZARETI ANGUMUKANA

Yesu wati watuwa muchigaŵa cha Dekapoli, wanguchizga munthukazi yo wasuluwanga ndopa ndipuso wanguyuska mwana munthukazi waku Yairo. Iyu wanguchita vosi ivi zuŵa limoza. Pa zuŵa so lenili, Yesu wachituwa kunyumba yaku Yairo, ŵanthu ŵaŵi achibulumutiya angumulondo ndipu adanirizanga kuti: “Tichitiyeni lisungu mwana waku Davidi.”—Mateyu 9:27.

Pakudana Yesu kuti “mwana waku Davidi,” ŵanthu ŵenaŵa angulongo kuti agomezganga kuti Yesu ndiyu wenga wakwenere kuhara ufumu waku Davidi. Mwaviyo, agomezganga kuti iyu ndi Mesiya. Pakwamba, Yesu wangulongo nge kuti wavwa cha vo ŵanthu ŵenaŵa angukamba. Panyaki wanguchita viyo kuti wawoni asani akhumbanga nadi kuti waŵawovyi. Yiwu angulongo nadi kuti akhumbanga kuwovyeka. Yesu wati wasere munyumba, ŵanthu ŵaŵi ŵenaŵa angumulondo. Pavuli paki, Yesu wanguŵafumba kuti: “Kumbi mwe ndi chivwanu kuti ndingakuchizgani?” Yiwu angumuka mwakusimikiza kuti: “Hinya Ambuya.” Pa nyengu yeniyi, Yesu wangukwaska masu ngawu ndipu wanguŵakambiya kuti: “Vichitiki mwakulingana ndi chivwanu chinu.”—Mateyu 9:28, 29.

Nyengu yeniyo ŵanthu ŵenaŵa angwamba kuwona. Nge mo wanguchitiyapu kuvuli, Yesu wanguŵakambiya so kuti angakambiyanga ŵanthu cha vo vinguŵachitikiya. Kweni chifukwa chakuti ŵenga ndi likondwa, pati pajumpha nyengu, yiwu angwamba kukambiya ŵanthu muchigaŵa chosi.

Ŵanthu ŵaŵi ŵenaŵa achisoka, ŵanthu anyaki anguza kwaku Yesu ndi munthu yo watondekanga kuŵereŵeta, chifukwa wenga ndi chiŵanda. Yesu wangutuzga chiŵanda ndipu nyengu yeniyo, munthu yo wangwamba kuŵereŵeta. Ŵanthu anandi ŵati awona venivi anguzizwa ukongwa ndipu angukamba kuti: “Chinthu chaviyo ichi chechendachitikepu mu Isirayeli.” Afarisi nawu ŵengapu pa nyengu yeniyi. Yiwu atingi asuskengi cha vakuziziswa vo Yesu wanguchita. M’malu mwaki, yiwu anguwerezapu so kukamba ko nthazi zaki zatuliyanga, kuti: “Watuzga viŵanda mu nthazi ya mura wa viŵanda.”—Mateyu 9:33, 34.

Pati pajumpha nyengu yimanavi, Yesu wanguwere kutawuni ya kwaki ya Nazareti, limoza ndi akusambira ŵaki. Pa nyengu iyi, ndipu pajumpha pafufupi chaka kutuliya po wangusambiza musinagogi wa kwenuku. Pakwamba, ŵanthu anguzizwa ukongwa ndi vo wasambizanga. Pavuli paki, angumumba mulandu ndipu akhumbanga kumubaya. Kweni sonu Yesu wakhumbanga mbwenu kuŵawovya ŵanthu akwaki ŵenaŵa.

Pa Sabata, iyu wanguluta so ku sinagogi kuti wakasambizi. Ŵanthu anandi anguzizwa ukongwa, ndipu angwamba kufumbana kuti: “Kumbi munthu uyu wakutuwa nazu pani zeru izi, nanga ndiyani yo wakumupaska nthazi zakuchitiya vakuziziswa? Kumbi ndi mwana waku kalipentala cha uyu? Asi anyina mba Mariya, avurwa ŵaki ndi Yakobe, Yosefi, Simoni ndi Yudasi? Ndipu asi azichi ŵaki wosi tija nawu kunu? Nanga wavito pani vosi ivi?”—Mateyu 13:54-56.

Ŵanthu ŵenaŵa awonanga Yesu nge kuti ndi munthu ŵaka, ndipu akambanga kuti, ‘Tamuwonanga wachikuwa, sonu vingachitika wuli kuti waje Mesiya?’ Mwaviyo, chinanga kuti penga maukaboni nganandi ngakulongo kuti Yesu ndi Mesiya, nge kuchita vakuziziswa ndipuso zeru zaki zinandi, kweni yiwu angumukana. Anguchita viyo chifukwa chakuti amuziŵanga, ndipu chinanga mbabali ŵaki nawu anguguŵa nayu. Venivi vinguchitiska Yesu kukamba kuti: “Mchimi watumbikika kwekosi kupatuwaku kwawu kweniso mubanja laki.”—Mateyu 13:57.

Mwambula kukayika, Yesu wanguzizwa ukongwa chifukwa ŵanthu yaŵa ŵengavi chivwanu. Mwaviyo, iyu wanguchita chakuziziswa chechosi cha kwenuku, “kweni wanguŵika ŵaka manja ngaki pa ŵanthu amanavi wo atamanga ndipu wanguŵachizga.”—Mariko 6:5, 6.