Julani

Lutani pa vo ve mukati

 MUTU 61

Yesu Wanguchizga Mwana yo Wenga ndi Chiŵanda

Yesu Wanguchizga Mwana yo Wenga ndi Chiŵanda

MATEYU 17:14-20 MARIKO 9:14-29 LUKA 9:37-43

  • AKHUMBIKANGA KUJA NDI CHIVWANU CHIKULU KUTI ACHIZGI MWANA YO WENGA NDI CHIŴANDA

Pa nyengu yo Yesu, Peturo, Yakobe ndi Yohane asikanga mu phiri, angukumana ndi chigulu cha ŵanthu. Viwoneka kuti vinthu venga umampha cha pa nyengu yeniyi, chifukwa alembi anguzunguliya akusambira aku Yesu ndipu aŵasuskanga. Ŵanthu angukondwa ukongwa ŵati awona Yesu ndipu angutchimbiya kuti akamulondere. Yesu wanguŵafumba kuti: “Kumbi mususkananji nawu?”—Mariko 9:16.

Munthu munyaki pa gulu lenili, wangugwada panthazi paku Yesu ndipu wangumukambiya kuti: “Msambizi, ndinguza ndi mwana wangu kwaku yimwi, chifukwa we ndi mzimu uheni wo utimutondekesa kulongoro. Asani wamuyukiya, utimuponya pasi, watuwa phovu kumulomu, wakekechuwa minyu ndipuso utimumala nthazi. Ndingupempha akusambira ŵinu kuti awutuzgi, kweni atondeka.”—Mariko 9:17, 18.

Viwoneke limu kuti alembi asuskanga akusambira aku Yesu chifukwa angutondeka kuchizga mwana yo wenga ndi mzimu uheni ndipu atenere kuti aŵanyozanga chinanga kuti anguyesesa kuwutuzga mzimu wo. Yesu wangukambiya ŵanthu ŵenaŵa kuti: “Hate! mugonezi wambula chivwanu ndipuso wakunyongoroka uwu, kumbi ndilutirizgengi kuŵa namwi mpaka zuŵanji? Kumbi ndikunthiyengepu namwi mpaka zuŵanji?” Yesu wangukambiya alembi mazu nganthazi ngenanga chifukwa chakuti asuzganga akusambira ŵaki pa nyengu yo iyu pengavi. Pavuli paki, Yesu wangung’anamukiya awisi a mwana yo ndipu wanguŵakambiya kuti: “Zani nayu kunu.”—Mateyu 17:17.

Mwana yo wati wafika pafupi ndi Yesu, chiŵanda cho chenga mwaku iyu, chingumuwisiya pasi mwanthazi ndipu wangwamba kunyutuka. Iyu wangukunkhuluka pasi ndipu watuwanga phovu ku mulomu. Pavuli paki, Yesu wangufumba awisi a mwana yo kuti: “Kumbi venivi vikwamba zuŵanji kumuchitikiya?” Yiwu angumumuka kuti: “Kutuliya pa unamana waki. Ndipu kanandi utimuwisa pamotu kweniso mumaji kuti wafwi.” Yiwu anguŵeyere so Yesu kuti: “Kweni asani mungafiska, tichitiyeni lisungu, tiwovyeni chondi.”—Mariko 9:21, 22.

 Awisi a mwana mwenuyu angusoŵa chakuchita chifukwa akusambira aku Yesu angutondeka kumuchizga mwana wawu. Mwaviyo, Yesu wanguŵachiska kuti: “Ntchifukwa wuli ukamba kuti, ‘Asani mungafiska?’ Ku munthu yo we ndi chivwanu, vinthu vosi vichitika.” Nyengu yeniyo, awisi a mwana yo angudaniriza kuti: “Chivwanu nde nachu! Ndiwovyeni kuti ndije ndi chivwanu chakukho!”—Mariko 9:23, 24.

Pavuli paki, Yesu wanguwona gulu la ŵanthu lichitchimbiriya ko iyu wenga. Ŵanthu wosi achiwona, Yesu wanguchenya mzimu uheni wo kuti: “Yiwi mzimu wakutondekesa kulongoro kweniso kuvwa, nditikulamula kuti tuwa mwaku iyu ndipu ungaserengamu so cha!” Mzimu uheni wenuwu uchituwa, mwana yo wangudaniriza ndi kwamba kunyutuka ukongwa. Pavuli paki, mwana yo wanguja nge kuti wafwa ndipu ŵanthu anandi akambanga kuti: “Wafwa!” (Mariko 9:25, 26) Kweni Yesu wati wako janja la mwana mwenuyu, iyu wanguyuka ndipu “wanguchira pa ora lenilo.” (Mateyu 17:18) Mphakuvwika kuti ŵanthu azizwanga ukongwa ndi vo Yesu wachitanga.

Yesu wati waŵatuma kakwamba akusambira ŵaki kuti akapharazgi, yiwu angufiska kutuzga mizimu yiheni. Kweni pa nyengu iyi angutondeka. Mwaviyo, ŵe ŵija ndi Yesu, angumufumba kuti: “Ntchifukwa wuli isi tatondeka kutuzga mzimu uheni wuwa?” Yesu wangumuka kuti angutondeka kutuzga mzimu uheni chifukwa ŵenga ndi chivwanu chimana ndipu wanguŵakambiya kuti: “Mzimu wa mtundu uwu utuzgika ndi pempheru pe.” (Mariko 9:28, 29) Mwaviyo, kuti yiwu atuzgi mzimu uheni wenuwu, akhumbikanga kuja ndi chivwanu chikulu kweniso kupemphera kwaku Chiuta kuti waŵapaski nthazi.

Pakumaliya, Yesu wanguŵakambiya kuti: “Nditikuneneskiyani, asani mungaŵa ndi chivwanu, chinanga chingaŵa chimana nge kanje ka kamganji, mwazamukambiya phiri ili kuti, ‘Tuwapu yapa, uluti pa,’ ndipu lazamutuwapu. Palivi cho mwazamutondeka kuchita.” (Mateyu 17:20) Venivi vilongo kuti munthu wangachita chechosi asani we ndi chivwanu chakukho.

Masuzgu ngo ngachitiska kuti ŵanthu alekengi kuchita vinandi pakuteŵete Yehova, ngangawoneka ngakulu ukongwa ndipuso ngangawoneka kuti ngangamala cha nge po ŵanthu angatondeke kundeleza phiri chayilu. Kweni asani tingaja ndi chivwanu chikulu, tingamalana ndi masuzgu ngenanga ngo ngawoneka nge phiri.