Julani

Lutani pa vo ve mukati

 MUTU 33

Uchimi Waku Yesaya Ungufiskika

Uchimi Waku Yesaya Ungufiskika

MATEYU 12:15-21 MARIKO 3:7-12

  • GULU LA ŴANTHU LINGUFINYIKIZA YESU

  • YESU WANGUFISKA UCHIMI WAKU YESAYA

Yesu wati waziŵa kuti Afarisi ndi ŵanthu a chipani chaku Herodi apangana kuti amubayi, iyu ndi akusambira ŵaki anguluta ku Nyanja ya Galileya. Gulu la ŵanthu akutuliya muvigaŵa vakupambanapambana anguza kwaku Yesu. Anyaki angutuwa ku Galileya, kuvuma kwa Msinji wa Yorodani, Yerusalemu, kumwera kwa Idumiya ndipuso matawuni nga Turo ndi Sidoni ngo nge mumphepeti mwa nyanja. Yesu wanguchizga ŵanthu anandi. Ndipu venivi vinguchitisa kuti ŵanthu wo atamanga ukongwa akhumukiyi kwaku iyu kuti waŵachizgi. Ŵanthu ŵenaŵa angulindizga cha kuti Yesu waŵakwaski kweni yiwu ndiwu alutanga kuchimukwaska.—Mariko 3:9, 10.

Ŵanthu yaŵa ŵenga anandi ukongwa mwakuti Yesu wangukambiya akusambira ŵaki kuti azi ndi boti limana. Iyu wanguchita viyo kuti waluti mumaji kweniso kuti ŵanthu aleki kumufinyikiza. Yesu wakhumbanga so kuti waŵasambizengi waja muboti pamwenga wakhumbanga kuti waluti kuchigaŵa chinyaki cha mumphepeti mwa nyanja kuti wakawovyi ŵanthu anandi.

Mateyu yo wenga wakusambira waku Yesu, wanguwona kuti vo Yesu wanguchita vafiskanga “vo vingukambikiya limu kuporote mwa mchimi Yesaya.” (Mateyu 12:17) Kumbi penapa Yesu wangufiska uchimi nuwu?

Uchimi waki wenga wakuti: “Awonani! Mteŵeti wangu yo ndasankha, wakwanjiwa wangu mweniyo watindikondwesa! Ndiŵikengi mzimu wangu paku iyu ndipu wazamuchitiska kuti mitundu ya ŵanthu yiziŵi urunji chayiwu. Wapindanengi ndi munthu cha pamwenga kudaniriza ndipu palivi munthu yo wavwengi mazu ngaki mumisewu yikuluyikulu. Deti lakuphwanyika walivikitengi cha ndipuso chisunda chakusiwiriya wachizimwengi cha mpaka po wafiskiya urunji. Nadi panu, mitundu yazamuja ndi chilindizga mu zina laki.”—Mateyu 12:18-21; Yesaya 42:1-4.

Yesu ndiyu mteŵeti yo Chiuta wakusankha ndipu wakondwa nayu. Chinanga kuti urunji weneku wabisikanga ndi miyambu ya visopa vaboza, kweni vo Yesu wachitanga vingulongo vo urunji wenuwu ung’anamuwa. Chifukwa chakuti Afarisi achitanga vinthu mwambula urunji kweniso agwiriskiyanga ntchitu Dangu laku Chiuta mwambula kwenere, yiwu atondekanga kuwovya munthu yo watama pa zuŵa la Sabata. Pakukhumba kulongo urunji waku Chiuta kweniso kuti mzimu waku Chiuta ugwira ntchitu paku iyu, Yesu wangufwatuwa ŵanthu ku miyambu yambula urunji yo yenga yakusuzga kuyilondo. Chifukwa cha venivi, alongozgi avisopa akhumbanga kumubaya. Ivi venga vakupaska chitima ukongwa!

Kumbi mazu ngakuti “wapindanengi ndi munthu cha pamwenga kudaniriza ndipu palivi munthu yo wavwengi mazu ngaki mumisewu yikuluyikulu,” ngang’anamuwanganji? Asani wachizga ŵanthu, Yesu wazomerezanga cha kuti mizimu yiheni pamwenga ŵanthu wo waŵachizga ‘amusumuwengi.’ (Mariko 3:12) Iyu wakhumbanga cha kuti ŵanthu aziŵi vakukwaskana ndi  iyu kuziya mu ŵanthu wo apharazganga mumisewu pamwenga mu vakukambakamba va ŵanthu vo kanandi vija vakugozga.

Kweniso Yesu waperekanga uthenga wakupembuzga ku ŵanthu wo ŵenga nge deti lakuphwanyika, lakupindika kweniso lakufyoka. Ŵanthu ŵenaŵa ŵenga so nge chisunda chakusiwiriya, cho che pafupi kuzimwa. Yesu wangulivikitiya limu cha deti lakuphwanyika pamwenga kuchizimwiya limu chisunda chakusiwiriya. M’malu mwaki, iyu wanguchiska ŵanthu wo ŵenga akujiyuyuwa ndipu wanguchita venivi mwachanju kweniso mwalisungu. Ivi vilongole limu kuti ŵanthu atenere kuthemba Yesu kuti ndiyu wazamusintha vinthu kunthazi.