Julani

Lutani pa vo ve mukati

 MUTU 65

Yesu Wasambizanga Ŵanthu Wachiluta ku Yerusalemu

Yesu Wasambizanga Ŵanthu Wachiluta ku Yerusalemu

MATEYU 8:19-22 LUKA 9:51-62 YOHANE 7:2-10

  • KUMBI YESU AMUWONANGA WULI AVURWA ŴAKI?

  • KUMBI UFUMU WAKU CHIUTA UTENERE KUJA PAMALU NANGA?

Kwa nyengu yitali, Yesu wachitanga uteŵeti waki ku Galileya chifukwa ndiku ŵanthu avwisiyanga ukongwa kuluska ku Yudeya. Kweniso, kumbukani kuti pa nyengu yo wenga ku Yerusalemu, wanguchizga munthu pa zuŵa la Sabata ndipu “Ayuda akhumbisiskanga kumubaya.”—Yohane 5:18; 7:1.

Sonu, wenga mwezi wa September pamwenga October mu chaka cha 32 C.E. ndipu Phwandu la Mahema (pamwenga kuti Misasa) lenga pafupi kuchitika. Phwandu lenili, lachitikanga kwa mazuŵa 7 ndipu pa zuŵa la 8 achitanga unganu wapade. Phwandu lenili lachitikanga kukumaliya kwa chaka asani ŵanthu akolola mbewu zawu. Pa nyengu yeniyi, ŵanthu akondwanga ukongwa kweniso aperekanga sembi za kuwonga.

Yakobe, Simoni, Yosefi kweniso Yudasi wo ŵenga avurwa aku Yesu angumukambiya kuti: “Tuwaku kunu uluti ku Yudeya.” Ku Yerusalemu ndiku kwenga likulu la chisopa cha chiyuda. Pa nyengu ya maphwandu ngatatu ngo ngachitikanga kamoza pa chaka, ku Yerusalemu kwajanga ŵanthu anandi ukongwa. Mwaviyo, avurwa aku Yesu angumukambiya kuti: “Palivi yo wangachitiya kuseri chinthu chechosi asani wakhumba kuti ŵanthu amuziŵi. Asani uchita vinthu venivi, kajilongo kucharu.”—Yohane 7:3, 4.

Kukamba uneneska, avurwa ŵaki ŵenaŵa, “ŵengavi chivwanu mwaku iyu” nge Mesiya. Kweni yiwu akhumbanga kuti ŵanthu wosi wo ŵenga ku Yerusalemu awoni Yesu wachichita vakuziziswa vinyaki. Mwaviyo, Yesu wanguziŵa uheni wakuchita venivi, ndipu wanguŵakambiya kuti: “Palivi chifukwa chakuti charu chikutinkhiyeni, kweni ini chitinditinkha pakuti nditichipereke ukaboni wakuti ntchitu zaki ziheni. Yimwi lutani ku phwandu ko, ini ndilutengeku sonu cha, chifukwa nyengu yangu yechendafiki.”—Yohane 7:5-8.

Pati pajumpha mazuŵa kutuliya po avurwa aku Yesu pamoza ndi gulu la ŵanthu lingusoke kuluta ku Yerusalemu, Yesu ndi akusambira ŵaki nawu angusoka kwambula ŵanthu anandi kuziŵa. Yiwu anguziya nthowa ya ku Samariya m’malu mwakuziya nthowa yo yenga kufupi ndi Msinji wa Yorodani yo kwajumphanga ŵanthu anandi. Chifukwa chakuti Yesu ndi akusambira ŵaki akhumbikanga kuchigona ku Samariya, iyu wangutuma ŵanthu kuti akasaniyi malu ngakugona. Ŵanthu anyaki angukana kuŵalonde pamwenga kuchita vo achitanga pakulonde alendu chifukwa chakuti Yesu walutanga ku Yerusalemu kuchichita phwandu la Chiyuda. Chifukwa cha venivi, Yakobe ndi Yohane angukwiya ndipu angufumba Yesu kuti: “Ambuya, kumbi mupenja kuti isi tidani motu kutuwa kuchanya kuti uŵapilizi?” (Luka 9:54) Yesu wanguŵachenya chifukwa cha vo yiwu angukamba, ndipu pavuli paki angulutirizga ulendu wawu.

Ŵe munthowa, mlembi munyaki wangukambiya Yesu kuti: “Msambizi, ndikulondoningi kwekosi ko mulutengi.” Kweni Yesu wangumumuka kuti: “Akambwi ŵe ndi mphanji, ndipu viyuni vamude ve ndi vizimbu, kweni Mwana wa munthu walivi pakunyekeza mutu waki.” (Mateyu 8:19, 20) Yapa, Yesu wangulongo kuti mlembi mwenuyu wakumanengi ndi masuzgu asani wangaja  wakusambira waki. Ndipu viwoneka kuti mlembi uyu wenga wakujikuzga ukongwa ndipu wangukana kuja wakusambira waku Yesu. Mwaviyo, nasi tikhumbika kujifumba kuti, ‘Kumbi ndikhumbisiska kuja wakusambira waku Yesu?’

Yesu wangukambiya munthu munyaki kuti: “Ja wakusambira wangu.” Munthu yo wangumuka kuti: “Ambuya, ndizomerezeni kuti ndiluti kuchiŵika dankha ada.” Yesu wanguziŵa mo vinthu venge pa umoyu wa munthu mwenuyu ndipu wangumumuka kuti: “Aleki akufwa aŵiki akufwa ŵawu, kweni yiwi luta ukapharazgengi Ufumu waku Chiuta kwekosi.” (Luka 9:59, 60) Viwoneke limu kuti pa nyengu iyi, ndipu awisi a munthu mwenuyu ŵechendafwi. Tikamba viyo chifukwa chakuti asani yiwu angufwa nadi, mwana wawu watingi wazengi cha kuzikambiskana ndi Yesu pa nyengu yeniyi. Kweni iyu, wenga wakunozgeka cha kuŵika Ufumu waku Chiuta pamalu ngakwamba pa umoyu waki.

Ŵe pafupi kufika ku Yerusalemu, munthu munyaki wangukambiya so Yesu kuti: “Ambuya, ndikulondoningi, kweni mundizomerezi kuti nkhalayilani dankha ndi a munyumba yangu.” Yesu wangumukambiya kuti: “Munthu yo wako pulawu ndi kulereska kuvuli, watenere cha Ufumu waku Chiuta.”—Luka 9:61, 62.

Wosi wo akhumba nadi kuja akusambira aku Yesu, akhumbika kuŵika Ufumu waku Chiuta pakwamba. Asani munthu yo wako pulawu waleka kulereska kunthazi, mzeri wo walima unganyoloka cha. Asani pulawu wangayisiya pasi kuti wawoni kuvuli, ntchitu yo wagwira yingamala luŵi cha. Mwakuyanana ŵaka, weyosi yo walereska vinthu va m’charu chiheni ichi, wangaleka kwenda pa nthowa yakuluta ku umoyu wamuyaya.