Julani

Lutani pa vo ve mukati

 MUTU 62

Kukhumbika Kwakuja Akujiyuyuwa

Kukhumbika Kwakuja Akujiyuyuwa

MATEYU 17:22–18:5 MARIKO 9:30-37 LUKA 9:43-48

  • YESU WANGUKAMBA SO KUTI WABAYIKENGI

  • WANGULIPIRA MSONKHU NDI NDALAMA YO YINGUTUWA MUMULOMU MWA SOMBA

  • KUMBI NDIYANI YO WAZAMUJA MURA UKONGWA MU UFUMU?

Yesu wati wasambuka muchiwona ndipuso wati wachizga mwana yo wenga ndi chiŵanda ku Kayisareya wa ku Filipi, wanguwere kufupi ndi tawuni ya Kaperenao. Iyu ndi akusambira ŵaki angwenda mwachisisi kuti ŵanthu aleki ‘kuziŵa ko iyu wenga.’ (Mariko 9:30) Yapa, Yesu wangusaniriyapu mwaŵi wakuti wakonkhoske so akusambira ŵaki kuti iyu wabayikengi ndipuso kuŵanozgekeresa ntchitu yo yiwu atingi agwirengi. Yesu wangukamba kuti: “Mwana wa munthu waperekekengi mu manja mwa ŵanthu. Yiwu amubayengi ndipu pa zuŵa lachitatu wazamuyuskika.”—Mateyu 17:22, 23.

Akusambira aku Yesu akhumbikanga cha kuzizwa ndi vo Yesu wanguŵakonkhoske. Ve viyo chifukwa Yesu ndipu waŵakambiyapu kali kuti wabayikengi chinanga kuti Peturo wangugomezga cha kuti venivi vichitikengi nadi. (Mateyu 16:21, 22) Ndipuso akutumika atatu aku Yesu angumuwona Yesu wachisambuka kweniso anguvwa Mozesi ndi Eliya achikambiskana vakukwaskana ndi “ulendu” waku Yesu. (Luka 9:31) Akusambira ŵaki “anguchita chitima ukongwa” ndi vo Yesu wanguŵakambiya chinanga kuti anguziŵa cha kuti iyu wang’anamuwanji. (Mateyu 17:23) Chinanga kuti venga viyo, yiwu achitanga mantha kuti amufumbi vinandi vakukwaskana ndi nkhani yeniyi.

Pati pajumpha nyengu, yiwu angufika ku Kaperenao ko kanandi Yesu wachitiyanga uteŵeti waki. Ku Kaperenao kwenga so kumuzi kwa akutumika ŵaki anyaki. Ŵe kwenuku, ŵanthu akusonkhesa msonkhu anguza kwaku Peturo. Yiwu atenere kuti akhumbanga kumumba mulandu Yesu wakuleka kupereka msonkhu. Mwaviyo, angufumba Peturo kuti: “Kumbi msambizi winu wapereka msonkhu wa madirakima ngaŵi [panyumba yakusopiyamu]?”—Mateyu 17:24.

Peturo wangumuka kuti: “Hinya wapereka.” Kweni Yesu we munyumba wanguziŵa kali vinthu vosi vo vinguchitika. Mwaviyo, m’malu mwakuti Peturo ndiyu wamukambiyi nkhani yeniyi, Yesu wangumufumba kuti: “Uwona wuli Simoni? Kumbi mafumu nga charu ngalonde kwakayani ndalama za misonkhu yakupambanapambana? Ku ŵana ŵawu pamwenga ku ŵanthu aŵaka?” Peturo wangumuka kuti: “Ku ŵanthu aŵaka.” Pavuli paki Yesu wangukamba kuti: “Uneneska nadi, ndikuti ŵana atenere cha kupereka msonkhu.”—Mateyu 17:25, 26.

Awisi aku Yesu ndi Fumu ya chilengedu chosi ndipuso Ndiwu ŵanthu aŵasopanga munyumba yakusopiyamu. Mwaviyo, Mwana waku Chiuta wakhumbikanga cha kupereka msonkhu wa nyumba yakusopiyamu. Yesu wangukamba kuti: “Kweni kuti tileki kuŵaguŵiska, uluti kunyanja ukaponyi mbeja ndipu ukato somba yakwamba yo wamungata ndipu asani wachiyipambawuwa kumulomu, wamusaniyamu ndalama yasiliva [pamwenga kuti siteta yasiliva yo yakwananga madirakima nganayi]. Sonu ukato yeniyo, ukalipiriyi msonkhu wangu ndi waku.”—Mateyu 17:27.

Pati pajumpha nyengu yimanavi, akusambira wosi ŵenga pamoza ndipu akhumbanga kufumba Yesu vakukwaskana ndi yo wazamuja mura ukongwa mu Ufumu wakuchanya. Akusambira ŵenaŵa, angutondeka kufumba Yesu vakukwaskana ndi nyifwa yaki kweni pa nyengu iyi, anguchita mantha cha kumufumba vakukwaskana ndi vinthu vo vatingi viŵachitikiyengi kunthazi. Yesu wanguziŵa vo yiwu aŵanaŵananga. Nyengu yinyaki achiwere ku Kaperenao, Yesu wanguŵavwa achipindana za nkhani yeniyi chinanga kuti azanga muvuli mwaki. Mwaviyo Yesu wanguŵafumba kuti: “Kumbi mwasuskananganji munthowa?” (Mariko 9:33) Akusambira ŵenaŵa anguchita soni ndipu anguja cheti chifukwa apindananga kuti mura ukongwa ndiyani pakati pawu. Pakumaliya, yiwu angukambiya Yesu nkhani yo akambiskananga yakuti: “Kumbi mura ukongwa mu Ufumu wakuchanya ndiyani?”—Mateyu 18:1.

Venga vakuziziswa ukongwa kuti akusambira aku Yesu apindani za nkhani yeniyi. Tikamba viyo chifukwa yiwu anguwona kweniso kusambira vinthu vinandi kutuliya kwaku Yesu kwa vyaka pafupifupi vitatu. Chinanga kuti venga viyo, yiwu ŵenga ambula kufikapu. Kweniso yiwu angukuliya muchigaŵa cho ŵanthu anandi awonanga kuti kuja ndi udindu wapachanya  nkhwakukhumbika ukongwa. Kusazgapu pa fundu zenizi, Peturo wanguvwa Yesu wachimulayizga kuti wazakumupaska “maki” nga Ufumu. Panyaki venivi vingumuchitiska kuti wajiwonengi kuti ngwapachanya ukongwa kuluska anyaki wosi. Yakobe ndi Yohane nawu atenere kuti aŵanaŵananga viyo chifukwa anguwona Yesu wachisambuka.

Kwali yiwu aŵanaŵananga viyo pa vifukwa wuli, kweni Yesu wanguchitapu kanthu kuti waŵawovyi kuja ndi maŵanaŵanu ngakwenere. Yesu wangudana kamwana ndipu wangukamika pakati pawu. Pavuli paki, wangukambiya akusambira ŵaki kuti: “Nditikuneneskiyani kuti asani muleka kung’anamuka ndi kuja nge ŵana anamana, mwazamuserepu cha mu Ufumu wakuchanya. Mwaviyo, weyosi yo wachita vinthu mwakujiyuyuwa nge kamwana yaka ndiyu mura ukongwa mu Ufumu wakuchanya; ndipuso weyosi yo walonde tiŵana tange kamwana yaka chifukwa cha zina langu, walonde so ini.”—Mateyu 18:3-5.

Yapa, Yesu wangugwiriskiya ntchitu nthowa yamampha ukongwa pakuŵasambiza. Iyu wanguŵakwiyiya cha akusambira ŵaki kweniso kukamba kuti ŵenga ndi mbunu pamwenga ŵenga akujikuzga. M’malu mwaki, wangusaniriyapu mwaŵi wakuŵasambiza jalidu lakukhumbika ukongwa. Ŵana anamana, aja ndi udindu wewosi cha pamwenga kujiwona kuti mbapachanya ukongwa. Ndichu chifukwa chaki Yesu wangukambiya akusambira ŵaki kuti nawu akhumbika kuja akujiyuyuwa nge ŵana anamana. Pakumaliya, Yesu wangukambiya akusambira ŵaki kuti: “Weyosi yo walonde kamwana yaka chifukwa cha zina langu, walonde so ini; ndipu weyosi yo walonde ini, walonde so Yo wakundituma. Pakuti mweniyo wachita vinthu nge mumana ukongwa paku mosi, mweniyo ndiyu mura.”—Luka 9:48.