Julani

Lutani pa vo ve mukati

 MUTU 91

Yesu Wanguyuska Lazaro

Yesu Wanguyuska Lazaro

YOHANE 11:38-54

  • LAZARO WANGUYUSKIKA

  • MPHARA YIKULU YA MILANDU YINGUPANGANA KUTI YIBAYI YESU

Yesu wati wakumana ndi Marita kweniso Mariya kufupi ndi Betaniya, wosi anguluta kumasanu ko anguŵika Lazaro. Yiwu angumuŵika ku mphanji ndipu pakhomu angujalapu chimwa. Yesu wangukamba kuti: “Tuzganipu chimwa.” Marita wangukamba mazu ngo ngangulongo kuti waziŵanga cha vo Yesu wakhumbanga kuchita. Iyu wanguti: “Ambuya, sonu watenere kuti wanunkha, chifukwa pajumpha mazuŵa nganayi kutuliya po wakufwiya.” Kweni Yesu wangumukambiya kuti: “Asi ndakukambiya kuti asani ujengi ndi chivwanu uwonengi unkhankhu waku Chiuta?”—Yohane 11:39, 40.

Sonu, angutuzgapu chimwa cho angujala pakhomu. Pavuli paki, Yesu wangulereska kuchanya ndipu wangupemphera kuti: “Ada, nditikuwongani kuti mwandivwa. Ndiziŵa nadi kuti mutindivwa nyengu zosi, kweni ndakamba ivi chifukwa cha chigulu cha ŵanthu cho chama panu, kuti avwani kuti yimwi mukundituma.”  Pempheru lo Yesu wangupemphera pagulu la ŵanthu, lingulongo kuti Chiuta ndiyu watingi wamupaskengi nthazi zakuti wayuskiyi Lazaro. Pavuli paki, Yesu wangudaniriza mwanthazi kuti: “Lazaro, tuliya kunu kubwalu!” Lazaro wanguyuka nadi ndipu maphazi kweniso manja ngaki ngangukulungika ndi sanda. Ndipu chisku chaki nachu chingukulungika ndi sanda. Yesu wangukamba kuti: “Mufwatuweni, ndipu mulekeni kuti wakengi.”—Yohane 11:41-44.

Ayuda anandi wo anguza kuzipembuzga Mariya ndi Marita anguwona chakuziziswa cho Yesu wanguchita ndipu anguvwana mwaku iyu. Kweni ŵanthu anyaki anguluta kwa Afarisi ndipu anguchiŵakambiya vo Yesu wanguchita. Ŵara ŵa asembi ndipuso Afarisi anguwunganisa Mphara Yikulu ya Milandu. Mu Mphara yeniyi mwenga so wasembi mura Kayafa. Ndipu anyaki mwa ŵanthu ŵenaŵa angukamba kuti: “Kumbi tichiti wuli penapa, pakuti munthu uyu wachita visimikizu vinandi? Asani timulekengi ŵaka kuti wachitengi vinthu venivi, ndikuti ŵanthu wosi avwanengi mwaku iyu, ndipuso Aroma azengi kuzito malu ngidu ndi mtundu widu.” (Yohane 11:47, 48) Chinanga kuti ŵara ŵa asembi ndi Afarisi anguwona ndi masu Yesu ‘wachichita visimikizu vinandi,’ yiwu akondwanga cha ndi vo Chiuta wachitanga kuziya mwaku iyu. M’malu mwaki afipanga mtima ndi maudindu kweniso mazaza ngo ŵenga nangu.

Lazaro wati wayuskika, vingulongole limu kuti vo Asaduki agomezganga kuti kulivi chiyuka venga vaboza. Ndipu Kayafa, yo wenga Msaduki wangukamba kuti: “Palivi cho muziŵapu, ndipu mwaŵanaŵanapu cha kuti mbumampha kwaku yimwi kuti munthu yumoza wafwiyi ŵanthu kuluska kuti mtundu wosi unangiki.”—Yohane 11:49, 50; Machitidu 5:17; 23:8.

Kayafa wangukamba mazu ngenanga “pakuyija cha.” Chiuta ndiyu wangumuchitiska kuti wakambi mazu ngenanga chifukwa chakuti iyu wenga ndi udindu wapade. Kayafa wakhumbanga kuti Yesu wabayiki chifukwa wawopanga kuti ŵanthu angaleka kulondo alongozgi achisopa cha Chiyuda. Kweni mazu ngo iyu wangukamba wenga uchimi ndipu wang’anamuwanga kuti nyifwa yaku Yesu yazamuwombo ŵanthu, Ayuda pe cha kweni ‘ŵana wosi aku Chiuta wo akumbininika.’—Yohane 11:51, 52.

Kayafa wanguchiska Mphara Yikulu ya Milandu kuti yibayi Yesu. Ndipu ŵanthu wosi wo ŵenga mu Mphara iyi angukoliyana nayu nkhani yeniyi. Sonu kumbi Nikodimu yo wenga pa gulu lenili kweniso yo wenga mubwezi waku Yesu, wangumukambiya vo ŵanthu ŵenaŵa angupangana? Kaya vinthu venga wuli, kweni Yesu wangutuwaku kuchigaŵa chenichi, cho chenga kufupi ndi Yerusalemu. Venivi vinguchitiska kuti iyu waleki kubayika nyengu yo Chiuta wangusankha yechendakwani.