Julani

Lutani pa vo ve mukati

 MUTU 11

Yohane Mubatizi Wangunozga Nthowa

Yohane Mubatizi Wangunozga Nthowa

MATEYU 3:1-12 MARIKO 1:1-8 LUKA 3:1-18 YOHANE 1:6-8, 15-28

  • YOHANE WAPHARAZGANGA NDI KUBATIZA ŴANTHU

  • ŴANTHU ANANDI ANGUBATIZIKA

Kufika mu chaka cha 29 C.E. ndipu pajumpha vyaka 17 kutuliya po Yesu wangufumbiya mafumbu asambizi kunyumba yakusopiyamu. Yapa, ndipu we ndi vyaka 12. Pa nyengu iyi, ŵanthu anandi akambisananga vaku Yohane mubali waku Yesu, yo wapharazganga chigaŵa chosi cho chenga kuzambwi kwa Msinji wa Yorodani.

Ŵanthu akondwanga ukongwa ndi Yohane chifukwa cha mo wawonekiyanga ndipuso chifukwa cha uthenga wo wapharazganga. Iyu wavwalanga malaya ngakupangika ndi weya wa ngamila ndipuso wavwalanga lamba wachikopa muchiwunu mwaki. Chakurya chaki chenga azombi ndi uchi. Kumbi wapharazganga uthenga wuli? Uthenga waki wenga wakuti, “Lapani, chifukwa Ufumu waku Chiuta we pafupi.”—Mateyu 3:2.

Uthenga waku Yohane waŵafikanga pa mtima ŵanthu wo azanga kuzimuvwisiya. Ŵanthu anandi anguziŵa kuti akhumbikanga kusintha vakuchita vawu kweniso mo aŵanaŵaniyanga, ndipu yiwu angusintha nadi. Ŵanthu ŵenaŵa atuliyanga mu ‘Yerusalemu kweniso mu Yudeya mosi ndi charu chosi chakuzunguliya Yorodani.’ (Mateyu 3:5) Anandi wo avwisiyanga uthenga waku Yohane angulapa ndipu wanguŵabatiza mwakuŵabiza mumaji mu msinji wa Yorodani. Ntchifukwa wuli wanguŵabatiza?

Ubatizu uwu wenga nge chisimikizu chakuti yiwu angulapa kutuliya pasi pa mtima maubudi ngo achitanga chifukwa chakuleka kuvwiya Dangu laku Chiuta. (Machitidu 19:4) Kweni ndi wosi cha wo angubatizika. Mwakuyeruzgiyapu, Afarisi ndi Asaduki ŵati aluta kuchiwona Yohane, iyu wanguŵakamba kuti “ŵana a njoka.” Iyu wangukamba so kuti: “Pasani vipasu vakulongo kulapa. Mungajipusikanga cha mwakukamba kuti, ‘Te ndi awusefwi Abrahamu.’ Chifukwa nditikukambiyani kuti Chiuta wangayuskiya Abrahamu ŵana kutuliya ku mya iyi. Mbavi yaŵikika kali pamsisi wa chimiti. Ndipu chimiti chechosi cho chileka kupasa vipasu vamampha, chidumulikengi ndi kuponyeka pamotu.”—Mateyu 3:7-10.

Chifukwa chakuti uthenga waku Yohane wenga wanthazi ndipu ŵanthu anandi anguvwana kweniso angubatizika, asembi ndi Alevi angutumika kuti akafufuzi kuti Yohane mwenuyu wenga yani. Yiwu angumufumba kuti: “Ndiwi yani?”

Yohane wangumuka kuti: “Ini ndini Khristu cha.”

Yiwu angumufumba kuti: “Sonu ndiwi yani? Ndiwi Eliya?”

Iyu wangumuka kuti: “Ndini cha.”

Pavuli paki, angumufumba kuti: “Ndiwi Mchimi?” Yapa, yiwu amufumbanga vakukwaskana ndi Mchimi yo Mozesi wangukamba kuti wazengi.—Marangu 18:15, 18.

Yohane wangumuka kuti: “Awa!”

Yiwu angulutirizga kumufumba kuti: “Ndiwi yani? Tikambiyi kuti tikaŵakambiyi wo atituma. Sonu akamba, ndiwi yani?” Yohane wangumuka kuti: “Ndini mazu nga munthu yo wadaniriza muchipululu kuti, ‘Nyoloskani nthowa yaku Yehova’ nge mo mchimi Yesaya wangukambiya.”—Yohane 1:19-23.

Pavuli paki angumufumba kuti: “Nanga ntchifukwa wuli ubatiza asani ndiwi Khristu cha pamwenga Eliya kweniso Mchimi?” Iyu wanguti: “Ini ndibatiza mumaji. Kweni pakati pinu pama munthu munyaki mweniyo mutimuziŵa cha, yo watuza pavuli pangu.”—Yohane 1:25-27.

Pa nyengu iyi, Yohane wanguziŵa kuti wanozga nthowa mwakuwovya ŵanthu kuti azilonde Mesiya, yo watingi wazijengi Fumu. Pakukamba zaku Mesiya, Yohane wangukamba kuti: “Yo watuza pavuli pangu ngwanthazi kuluska ini, ndipu nde wakwenere cha kumuzuwa sapatu.” (Mateyu 3:11) Yohane wangukamba so kuti: “Yo watuza pavuli pangu wandidanjiriya, chifukwa iyu wakuŵaku ini ndechendaŵeku.”—Yohane 1:15.

Mwaviyo, uthenga wo Yohane wangupharazga wakuti: “Lapani, chifukwa Ufumu waku Chiuta we pafupi,” wenga wakwenere nadi. (Mateyu 3:2) Uthenga uwu unguwovya ŵanthu wosi kuziŵa kuti uteŵeti waku Yesu Khristu, Fumu yo Yehova yikusankha, unguja kamanavi kwamba.