Julani

Lutani pa vo ve mukati

 MUTU 52

Yesu Wanguryiska Ŵanthu Masawuzandi ndi Viŵandi Kweniso Somba Zimanavi

Yesu Wanguryiska Ŵanthu Masawuzandi ndi Viŵandi Kweniso Somba Zimanavi

MATEYU 14:13-21 MARIKO 6:30-44 LUKA 9:10-17 YOHANE 6:1-13

  • YESU WANGURYISKA ANTHURUMI 5,000

Akutumika 12 angukondwa ukongwa ndi ntchitu yakupharazga yo angugwira mu chigaŵa cha Galileya ndipu angukambiya Yesu “vosi vo anguchita ndi kusambiza.” Mwambula kukayika, yiwu atenere kuti anguvuka. Yiwu ŵengavi nyengu yakuti aryiyi chakurya chifukwa ŵanthu anandi azanga ndipu anyaki alutanga. Mwaviyo, Yesu wanguŵakambiya kuti: “Zani kunu, tiyeni kwakutija kuti tikapumuwi kamanavi.”—Mariko 6:30, 31.

Pa nyengu iyi, Yesu ndi akusambira ŵaki atenere kuti ŵenga pafupi ndi Kaperenao ndipu angukwera boti ndikuselere kuvuma kwa Msinji wa Yorodani. Yiwu angujumpha ku Betisayida ndi kuluta kumalu ngambula ŵanthu. Ŵanthu anandi anguŵawona achisoka kweniso anyaki anguvwa waka kuti atuwaku. Mwaviyo, wosi angwenda mumphepeti mwa nyanja mwakuti boti lichifika ndipu ŵanthu yaŵa afika kali.

Yesu wati wasika boti ndikuwona chigulu cha ŵanthu, wanguŵavwiya lisungu chifukwa ŵenga nge mbereri zambula mliska. Mwaviyo, wangwamba “kuŵasambiza vinthu vinandi” vakukwaskana ndi Ufumu. (Mariko 6:34) Iyu wanguchizga so “wo akhumbikanga kuchizgika.” (Luka 9:11) Chakumazulu, akusambira aku Yesu angumukambiya kuti: “Malu nganu kuja ŵanthu cha ndipu nyengu nayu yamala, akambiyeni ŵanthu kuti aluti mumizi akajiguliyi chakurya.”—Mateyu 14:15.

Yesu wanguŵamuka kuti: “Palivi chifukwa chakuti alutiyi, kweni yimwi ndimwi muŵapaski chakurya.” (Mateyu 14:16) Chinanga kuti Yesu waziŵanga vo wakhumbanga kuchita, wangufumba Filipu kuti: “Tamugula nunkhu viŵandi vakuryisa ŵanthu yaŵa?” Yesu wangufumba Filipu fumbu lenili chifukwa kwawu kwenga kufupi ndi ku Betisayida. Kweni chinanga angugula viŵandi, vatingi vikwanengi mbwenu cha. Venga viyo chifukwa ŵanthu ŵenga anandi ukongwa pafufupi anthulumi 5,000. Ndipu asani tingaŵerenge ŵana ndi anthukazi, ŵanthu ŵenaŵa atingi ajumphengi 10,000. Filipu wangumuka Yesu kuti: “Chinanga ndi viŵandi vakukwana madinari 200, vingakwanapu cha ŵanthu wosi yaŵa chinanga nkhamanavi.”—Yohane 6:5-7.

Panyaki kuti walongo kuti kwenga kwakusuzga kuryisa gulu losi la ŵanthu, Andireya wangukamba kuti: “Panu pe kamnyamata ko ke ndi viŵandi vinkhondi vabalire ndi tisomba tiŵi. Kweni ndivu vingachitanji pa chigulu chosi ichi?”—Yohane 6:9.

Venivi vinguchitika mu mwezi wa March pamwenga April, kwati kwaja kamanavi kuti phwandu la Pasika wa mu 32 C.E. lichitiki. Pa nyengu iyi ndipu uteka weche wakubiliŵira mumphepeti mwa phiri. Mwaviyo, Yesu wangutuma akusambira ŵaki kuti akambiyi ŵanthu kuti aje pasi pa uteka mumagulu nga ŵanthu 50 ndi 100. Yesu wanguto viŵandi 5 ndi somba ziŵi ndipu wangupemphera kwaku Chiuta. Pavuli paki, wangumenya viŵandi ndi somba. Iyu wangupaska akusambira ŵaki kuti agaŵiyi ŵanthu. Venga vakuziziswa ukongwa chifukwa ŵanthu wosi angurya mpaka kuguta.

Ŵati amaliza kurya, Yesu wangukambiya akusambira ŵaki kuti: “Wunjikani vibanthu vakujaku kuti kanthu kekosi kaleki kutayika.” (Yohane 6:12) Chakurya cho anguwunjika chingukwana masokola 12.