Julani

Lutani pa vo ve mukati

 MUTU 137

Yesu Wanguwoneke ku Ŵanthu Anandi Phwandu la Pentekositi Lechendachitiki

Yesu Wanguwoneke ku Ŵanthu Anandi Phwandu la Pentekositi Lechendachitiki

MATEYU 28:16-20 LUKA 24:50-52 MACHITIDU 1:1-12; 2:1-4

  • YESU WANGUWONEKE KU ŴANTHU ANANDI

  • YESU WANGULUTA KUCHANYA

  • YESU WANGUTUMIZA MZIMU WAKUPATURIKA KWA AKUSAMBIRA 120

Yesu wati wayuskika, wangukambiya akutumika ŵaki 11 kuti wakakumani nawu paphiri linyaki ku Galileya. Akusambira anyaki so pafufupi 500, nawu angufika pamalu ngenanga. Ndipu anyaki mwa akusambira ŵaki ŵenaŵa akayikiyanga kuti Yesu wayuskika nadi. (Mateyu 28:17; 1 Akorinto 15:6) Kweni vo Yesu wangukamba pa nyengu yeniyi, vinguwovya wakusambira weyosi kugomezga kuti iyu wakuyuskika nadi.

Pavuli paki, Yesu wangukonkhoska kuti Chiuta wangumupaska mazaza kuchanya kweniso pacharu chapasi. Yesu wangukambiya akusambira ŵaki kuti: “Mwaviyo, lutani mukasambizengi ŵanthu amitundu yosi kuti aje akusambira ŵangu, mukaŵabatizengi mu zina la Ada, la Mwana, ndipuso la mzimu wakupaturika. Mukaŵasambizengi kuti asungengi vinthu vosi vo ndikukulamulani.” (Mateyu 28:18-20) Vakukondwesa ukongwa kuziŵa kuti Yesu wati wayuskika wakhumbisiskanga kuti uthenga wamampha upharazgiki.

Ŵanthu wosi wo alondonga Yesu pa nyengu iyi, anthulumi, anthukazi kweniso ŵana, angupaskika ntchitu yakusambiza ŵanthu kuti aje akusambira aku Yesu. Iyu wanguŵakambiya kuti ŵanthu akususka azamuyesesa kukaniza ntchitu yakupharazga kweniso yakusambiza ŵanthu. Mwaviyo, wanguŵachiska kuti: “Mazaza ngosi ngapaskika kwaku ini, kuchanya ndi pacharu chapasi.” Kumbi fundu yeniyi yinguŵawovya wuli ŵanthu wo amulondonga? Yesu wanguŵakambiya kuti: “Awonani! ndiŵengi namwi limoza mazuŵa ngosi mpaka pakumaliya pa mugonezi.” Yapa, Yesu wang’anamuwanga kuti wosi wo apharazgengi uthenga wamampha azamupaskika nthazi zakuchitiya vakuziziswa cha. Kweni wang’anamuwanga kuti mzimu wakupaturika ndiwu wazakuŵawovya kugwira ntchitu yakupharazga.

Yesu wati wayuskika, wanguwoneke kwa akusambira ŵaki “kwa mazuŵa 40.” Pa nyengu yeniyi, iyu wawonekiyanga kwa akusambira ŵaki ndi liŵavu la nge laku taŵanthu, ndipu “wangujilongo kwaku yiwu wamoyu, mwa maukaboni nganandi ngakusimikizika.” Iyu wanguŵapaska so ulongozgi wo wakambanga “vakukwaskana ndi Ufumu waku Chiuta.”—Machitidu 1:3; 1 Akorinto 15:7.

Viwoneka kuti pa nyengu yo akutumika ŵenga ku Galileya, Yesu wanguŵakambiya kuti awere ku Yerusalemu. Iyu wati wakumana nawu mutawuni yeniyi, wanguŵakambiya kuti: “Mungatuwangamu cha mu Yerusalemu, kweni lutirizgani kulindizga cho Ada akulayizga, cho mukuvwa kwaku ini. Pakuti mbuneneska kuti Yohane wabatizanga ndi maji, kweni yimwi mubatizikengi ndi mzimu wakupaturika pambula kuswera yapa.”—Machitidu 1:4, 5.

Pati pajumpha nyengu, Yesu wangukumana so ndi akutumika ŵaki. Iyu wangutuwa nawu kwenuku “mpaka kuchifika ku Betaniya.” Tawuni ya Betaniya yenga kuvuma kwa Phiri la Maolivi. (Luka 24:50) Chinanga kuti Yesu wangukambiya akusambira ŵaki kuti iyu waluta kuchanya, kweni yiwu agomezganga mbwenu kuti Ufumu waki wazamuja pacharu chapasi.—Luka 22:16, 18, 30; Yohane 14:2, 3.

Akutumika angufumba Yesu kuti: “Ambuya, kumbi muweziyengi ufumu kwa Ayisirayeli sonu?” Iyu wanguŵamuka kuti: “Nkhwaku yimwi cha kuziŵa nyengu ndi mazuŵa ngakuŵikika ngo Ada aŵika mu muwusu wawu.” Pavuli paki, Yesu wanguŵakambiya so vakukwaskana ndi ntchitu yo akhumbikanga kugwira. Iyu wanguti: “Mwazamulonde nthazi po mzimu wakupaturika wazamukuza paku yimwi ndipu mwazamuja akaboni ŵangu mu Yerusalemu, mu Yudeya mosi ndi mu Samariya mpaka kukumaliya kwa charu chapasi.”—Machitidu 1:6-8.

Yesu we limoza ndi akutumika ŵaki pa Phiri la Maolivi, wangwamba kukwere kuchanya. Pavuli paki, mtambu ungumubenekere ndipu akusambira ŵaki angumuwona so cha. Yesu wati wayuskika, wawonekiyanga ku ŵanthu we ndi liŵavu la nge laku taŵanthu. Kweni pa nyengu iyi, wanguluta kuchanya ndi liŵavu lauzimu. (1 Akorinto 15:44, 50; 1 Peturo 3:18) Pa nyengu yo akutumika aku Yesu akugomezgeka alereseskanga iyu wachikwere kuchanya, kunguza “ŵanthu ŵaŵi wo anguvwala malaya ngatuŵa” ndipu anguma pafupi ndi yiwu. Ŵanthu ŵenaŵa, ŵenga angelu ndipu angufumba akutumika kuti: “Mwaŵanthu a ku Galileya yimwi, ntchifukwa wuli mwama ndi kulereska kuchanya? Yesu mwenuyu yo watoleka kwaku yimwi kuluta kuchanya, wazamukuza so mu nthowa yakuyanana ŵaka nge mo mwamuwone wachiluta kuchanya.”—Machitidu 1:10, 11.

Pa nyengu yo Yesu watuwanga pacharu chapasi ndi kuluta kuchanya, mbakutumika ŵaki akugomezgeka pe wo angumuwona. Mwaviyo, iyu “wazamukuza so mu nthowa yakuyanana ŵaka.” Ivi ving’anamuwa kuti mbakusambira ŵaki akugomezgeka pe wo azamuziŵa kuti Yesu wayamba kulamuliya nge Fumu.

 Ivi vati vachitika, akutumika anguwere ku Yerusalemu. Pati pajumpha mazuŵa, akutumika ŵenaŵa anguwungana pamoza ndi akusambira anyaki, kusazgapu “Mariya nyina waku Yesu ndi avurwa aku Yesu.” (Machitidu 1:14) Ŵanthu ŵenaŵa apempheranga asani awungana. Nkhani yimoza yo yiwu apempheriyanga ukongwa, yenga yakuti asankhi wakusambira munyaki kuti wasere m’malu mwaku Yudasi wa ku Keriyoti kuti nambala ya akutumika yikwani 12 nge po ŵenge pakwamba. (Mateyu 19:28) Yiwu akhumbanga kusankha wakusambira yo wanguwona vo Yesu wachitanga we pacharu chapasi kweniso yo wangumuwona wati wayuskika. Kuti asankhi wakusambira mwenuyu, yiwu anguchita mayeri kuti aziŵi vo Chiuta wakhumbanga. Iyi ndi nyengu yakumaliya yo Bayibolu likamba kuti ŵanthu anguchita mayeri. (Sumu 109:8; Nthanthi 16:33) Yiwu angusankha Matiyasi yo watenere kuti wenga mu gulu la akusambira 70 wo Yesu wanguŵatuma kuti akapharazgi ndipu “wangusazgika pa gulu la akutumika 11.”—Machitidu 1:26.

Pati pajumpha mazuŵa 10 kutuliya po Yesu wangulutiya kuchanya, Ayuda anguchita Phwandu la Pentekositi wa mu chaka cha 33 C.E. Pa nyengu yeniyi, akutumika pafufupi 120 anguwungana muchipinda cha muchanya ku Yerusalemu. Mwamabuchibuchi, kunguvwika chiwawa nge kupoma kwa chimphepu chanthazi, ndipu chiwawa cho chinguzaza nyumba yosi. Yiwu anguwona milipu ya motu yo yawonekanga nge malilimi. Milipu yeniyi yingugaŵika ndi kuja pa munthu weyosi. Ndipu akusambira wosi angwamba kulongoro vineneru vakupambanapambana. Wenuwu wenga mzimu wakupaturika wo Yesu wangulayizga kuti wazakuŵatumiziya.—Yohane 14:26.