Julani

Lutani pa vo ve mukati

 MUTU 89

Yesu Wangusambiza Ŵanthu ku Pereya Wachiluta ku Yudeya

Yesu Wangusambiza Ŵanthu ku Pereya Wachiluta ku Yudeya

LUKA 17:1-10 YOHANE 11:1-16

  • KOFYA KWAKUGUŴISKA ANYIDU

  • MUGOWOKENGI KWENISO MUJENGI NDI CHIVWANU

Kwa kanyengu, Yesu wenga weche “kusirya linyaki la msinji wa Yorodani,” kuchigaŵa cha Pereya. (Yohane 10:40) Kweni pa nyengu iyi, wangusoka kuluta chakumwera kufupi ndi Yerusalemu.

Pa ulendu uwu, Yesu wenga yija cha. Iyu wenga ndi akusambira ŵaki kweniso “chigulu cha ŵanthu” kusazgapu ŵanthu wo asonkhesanga msonkhu ndipuso ŵanthu akubuda. (Luka 14:25; 15:1) Afarisi kweniso alembi wo asuskanga vo Yesu wasambizanga kweniso kuchita, nawu ŵengapu pa ulendu wenuwu. Yiwu aŵanaŵananga vinthu vinandi Yesu wati wakamba ntharika ya mbereri yo yingusoŵa, ya mwana yo wangusoŵa kweniso ntharika ya munthu wa chuma ndi Lazaro.—Luka 15:2; 16:14.

Pavuli paki, Yesu wangwamba kusambiza akusambira ŵaki ndipu pa nyengu iyi watenere kuti wangukumbuka vinthu vo alembi ndi Afarisi amususkanga kweniso kumunyoza. Iyu wanguwerezga so fundu zinyaki zo wanguŵasambiza pa nyengu yo wenga ku Galileya.

Mwakuyeruzgiyapu, Yesu wangukamba kuti: “Vakuguŵiska vitondekengi cha kuŵapu. Kweni soka munthu yo wachitiska vakuguŵiska! . . . Phweriyani! Asani mubali waku wachita ubudi, umuchenyi ndipu asani walapa, umugowoke. Chinanga wangakunangiya maulendu 7 pa zuŵa, ndipu waza so maulendu 7 kwaku yiwi kukukambiya kuti, ‘Ndalapa,’ umugowoke.” (Luka 17:1-4) Fundu yakumaliya yo Yesu wangukamba, yitenere kuti yingukumbuska Peturo fumbu lo wangufumba Yesu pankhani yakugowoke maulendu 7.—Mateyu 18:21.

Kumbi akusambira aku Yesu atingi afiskengi kuchita vinthu mwakukoliyana ndi mazu ngo iyu wanguŵakambiya? Yiwu ŵati akambiya Yesu kuti: “Tisazgiyeniku chivwanu,” iyu wanguŵakambiya kuti: “Asani mungaŵa ndi chivwanu, chinanga chingaŵa chimana nge kanje ka kamganji, mwazamukambiya chimiti cha malubeni ichi kuti, ‘Chesuka panu, ukajipandi munyanja!’ ndipu chazakukuvwiyani.” (Luka 17:5, 6) Mwaviyo, chinanga munthu wangaja ndi chivwanu chimana, wakhoza kuchita vinthu vikulu ukongwa.

Yesu wangulutirizga kusambiza akusambira ŵaki umampha wakuja akujiyuyuwa kweniso kuti weyosi wakhumbika kuwona vinthu mwakwenere. Iyu wangukamba kuti: “Ndiyani waku yimwi yo wangakambiya kapolu waki yo watuwa ŵaka kumunda pamwenga kukuliska viŵetu kuti, ‘Iza panu pathebulu liŵi, uziryi’? Asi mumalu mwaki wangamukambiya kuti, ‘Ndinozge chakurya chamazulu, vwala epuloni ndipu unditeŵete mpaka po ndamaliya kurya ndi kumwa, ndipu pavuli paki nawi ungarya ndi kumwa’? Wamuwongengi cha kapolu yo, chifukwa wagwira ntchitu yo wakupaskika. Mwakuyanana ŵaka, asani mwagwira ntchitu yosi yo mukupaskika, mukambengi kuti: ‘Te akapolu ŵaka. Tachita vo takhumbikanga kuchita.’”—Luka 17:7-10.

Mteŵeti weyosi waku Chiuta watenere kuziŵa kukhumbika kwakuŵika vinthu vo Chiuta wakhumba pamalu ngakwamba. Kusazgiyapu pa fundu yeniyi, weyosi wakhumbika kukumbuka mwaŵi wo wenawu wakuteŵete Chiuta nge yumoza wa ŵanthu a munyumba yaki.

Yesu wati wamaliza kukambiskana ndi akusambira ŵaki, kunguza munthu yo Mariya ndi Marita angumutuma kwaku iyu. Mariya ndi Marita ŵenga azichi ŵaki aku Lazaro ndipu ajanga ku Betaniya waku Yudeya. Munthu yo wangutumika wangukambiya Yesu kuti: “Ambuya, awonani! munthu yo mutimuyanja ukongwa watama.”—Yohane 11:1-3.

Chinanga kuti Yesu wanguziŵa kuti mubwezi waki Lazaro watama ukongwa, kweni iyu wanguliya cha pa nyengu yeniyi. M’malu mwaki, wangukamba kuti: “Nthenda iyi yichitiskengi kuti Lazaro wafwi pe cha, kweni yichitiskengi so kuti Chiuta wakankhuskiki. Ndipu Mwana waku Chiuta nayu wakankhuskikengi chifukwa cha kutama kwenuku.” Wati wavwa uthenga wenuwu, wanguja ku Pereya mazuŵa ngaŵi ndipu pavuli paki wangukambiya akusambira ŵaki kuti: “Tiyeni tiluti so ku Yudeya.” Akusambira ŵaki angumukambiya kuti: “Rabi, pambula kuswera yapa ŵanthu a ku Yudeya akhumbanga kukuponyani ndi mya, mbwenu mukhumba kuluta so kweniko?”—Yohane 11:4, 7, 8.

Yesu wangumuka kuti: “Asi msana utuŵa ndi maora 12? Asani munthu watenda ndi msana waguŵa  cha mu chinthu chechosi, chifukwa wawona ukweru wa charu ichi. Kweni asani munthu watenda ndi usiku, waguŵa chifukwa mwaku iyu mulivi ukweru.” (Yohane 11:9, 10) Yesu watenere kuti wang’anamuwanga kuti nyengu yo Chiuta wanguŵika kuti wamalizi uteŵeti waki yingujaku yimanavi. Mwaviyo, Yesu wakhumbikanga kuyigwiriskiya ntchitu mwazeru nyengu yeniyi.

Yesu wangukamba so kuti: “Lazaro, mubwezi widu wagona, kweni ndiluta kweniko kuti nkhamuyuski.” Akusambira aku Yesu awonanga kuti Lazaro wapumuwa ŵaka ndipu wachirengi. Mwaviyo angukambiya Yesu kuti: “Ambuya, asani wagona ndikuti waŵengi umampha.” Yesu wanguŵakambiya mwakuvwika umampha kuti: “Lazaro wafwa . . . Kweni tiyeni tiluti kwaku iyu.”—Yohane 11:11-15.

Tomasi wanguziŵa kuti Yesu wamubayikiya ku Yudeya ndipu pakukhumba kumuvikiriya wangukambiya akusambira anyaki kuti: “Nasi tiyeni tiluti kuti tikafwiyi nayu limoza.”—Yohane 11:16.