Julani

Lutani pa vo ve mukati

 MUTU 38

Yohane Wakhumbanga Kuvwa Kutuwa Kwaku Yesu

Yohane Wakhumbanga Kuvwa Kutuwa Kwaku Yesu

MATEYU 11:2-15 LUKA 7:18-30

  • YOHANE MUBATIZI WAKHUMBANGA KUZIŴA UDINDU WO YESU WENGA NAWU

  • YESU WANGUKAMBA VINTHU VAMAMPHA VAKUKWASKANA NDI YOHANE

Yohane Mubatizi wanguja mujeri pafufupi chaka, ndipu nyengu yosi iyi wavwanga vinthu vakuziziswa vo Yesu wachitanga. Aŵanaŵaniyani mo Yohane wanguvwiya akusambira ŵaki ŵati amukambiya kuti Yesu wayuska mwana wa choko ku Nayini. Chinanga kuti venga viyo, Yohane wakhumbanga kuti Yesu wamukambiyi asani iyu ndiyu Mesiya yo alindizanga. Mwaviyo, Yohane wangutuma akusambira ŵaki ŵaŵi kuti aluti kwaku Yesu ndi kuchimufumba kuti: “Kumbi ndimwi Yo taja tichilindizga, pamwenga kuzengi munyaki?”—Luka 7:19.

Kumbi fumbu lenili lenga lachilendu? Hinya. Tikamba viyo chifukwa Yohane wenga munthu wakujipereka ukongwa, ndipu pafufupi vyaka viŵi kuvuli Yohane wachibatiza Yesu, wanguwona mzimu waku Chiuta uchisikiya paku Yesu, kweniso wanguvwa mazu ngakutuwa kwaku Chiuta ngakusimikiziya kuti Yesu ndi mwana waki. Chinanga kuti Yohane wangufumba fumbu lenili, titenere cha kuŵanaŵana kuti pa nyengu iyi chivwanu chaki chenga chimana. Asani venga viyo, mphanyi Yesu wangukamba cha vinthu vamampha vakukwaskana ndi Yohane. Sonu asani Yohane wakayikanga cha kuti Yesu ndi Mesiya, ntchifukwa wuli wangufumba fumbu lenili?

Panyaki Yohane wakhumbanga kuvwa kwaku Yesu mweneku kuti ndi Mesiya. Kuziŵa venivi kwatingi kumuchiskengi ukongwa Yohane pa nyengu yo watombozgekanga mujeri. Ndipu fumbu laku Yohane lenga lakuvwika. Iyu wangaziŵanga umampha mauchimi nga m’Bayibolu ngo ngalongonga kuti Wakusankhika waku Chiuta, wazamuja fumu kweniso wazamutaska ŵanthu. Kweni pa nyengu iyi, ndipu Yohane waja mujeri kwa myezi yinandi kutuliya po Yesu wangubatizikiya. Ndichu chifukwa chaki Yohane wakhumbanga kuziŵa asani kuzengi so munthu munyaki yo watingi wafiskengi vinthu vosi vo vingukambikiya limu kuti Mesiya wazamuchita asani waza.

M’malu mwakuŵakambiya ŵaka akusambira aku Yohane kuti, ‘Hinya, ndini Yo mwalindizanga,’ Yesu wanguŵalongo ukaboni wakuti Chiuta ndiyu watimuwovya. Ndichu chifukwa chaki wachizganga ŵanthu wo atamanga matenda ngakupambanapambana. Pavuli paki, wangukambiya akusambira aku Yohane kuti: “Lutani, mukamukambiyi Yohane vo mwavwa ndi kuwona: Achibulumutiya awona sonu, akupunduka atenda, amakhati atoweseka, ambula kuvwa atuvwa, akufwa ayuskika ndipu akavu atuvwa uthenga wamampha.”—Mateyu 11:4, 5.

Panyaki Yohane wangufumba fumbu lenili chifukwa waŵanaŵananga kuti Yesu wachitengi vakuziziswa vinandi kuphara vo wachitanga, ndipuso panyaki wamutuzgengi mujeri mo wenga. Kweni Yesu wangukambiya Yohane kuti watenere cha kukhaza vakuziziswa vinyaki kuphara vo wachitanga.

Akusambira aku Yohane ŵati aluta, Yesu wangukambiya gulu la ŵanthu kuti Yohane waluska mchimi. Iyu wenga “thenga” laku Yehova lo lizumbulika pa uchimi wa pa Malaki 3:1. Wangukamba so kuti Yohane wenga mchimi Eliya yo wakonkhoskeka pa lemba la Malaki 4:5, 6. Yesu wangukamba kuti: “Nditikuneneskiyani, pa ŵanthu wosi wo akubalika ndi anthukazi, palivi munthu mura kuluska Yohane Mubatizi, kweni munthu yo we ndi udindu umana ukongwa mu Ufumu wakuchanya ndi mura kuluska iyu.”—Mateyu 11:11.

Po Yesu wangukamba kuti munthu yo we ndi udindu umana ukongwa mu Ufumu wakuchanya ndi mura kuluska Yohane, wangulongo kuti Yohane wazamuluta kuchanya cha kuchilamuliya mu Ufumu wakuchanya. Yohane wangunozga nthowa yaku Yesu, kweni wangufwa Khristu wechendajuli nthowa yakuchanya. (Aheberi 10:19, 20) Chinanga kuti venga viyo, Yohane wenga mchimi wakugomezgeka waku Chiuta ndipu asani Ufumu waku Chiuta waziyamba kulamuliya pacharu chapasi, iyu wazamuyuskika ndi kuja so ndi umoyu pacharu chapasi.