Julani

Lutani pa vo ve mukati

 MUTU 87

Muchitengi Vinthu Mwazeru Pakunozgeke Vinthu Vakunthazi

Muchitengi Vinthu Mwazeru Pakunozgeke Vinthu Vakunthazi

LUKA 16:1-13

  • NTHARIKA YA MTEŴETI WAKUWONERE NYUMBA YO WENGA MUHENI

  • “JISANIRIYENI ABWEZI” MWAKUGWIRISKIYA NTCHITU CHUMA CHINU

Akusonkhesa msonkhu, alembi ndipuso Afarisi akhumbikanga kusambirapu kanthu pa ntharika ya mwana yo wangusoŵa yo Yesu wangukamba. Tikamba viyo chifukwa ntharika yeniyi yilongo kuti Chiuta ngwakukhumbisiska kugowoke ŵanthu wo alapa. (Luka 15:1-7, 11) Sonu, Yesu wangukamba ntharika yinyaki kuti wasambizi akusambira ŵaki. Ntharika yeniyi, yikonkhoska vakukwaskana ndi munthu wachuma yo wanguvwa kuti mteŵeti wakuwonere nyumba yaki wachitanga vinthu mwambula kugomezgeka.

Yesu wangukonkhoska kuti mteŵeti wakuwonere nyumba angumumba mulandu wakuti wasakazanga katundu wa abwana ŵaki. Mwaviyo, abwana ŵaki angukamba kuti mteŵeti mwenuyu ntchitu yimumaliyengi. Iyu wati wavwa venivi, wangwamba kukamba mumtima mwaki kuti: “Ndichitengi wuli pakuti abwana akhumba kundilonda udindu wakuwonere nyumba? Ndilivi nthazi zakukumbiya, ndipu kupempha naku ndichita soni.” Kuti wanozgeke vinthu vakunthazi, iyu wangukamba kuti: “Ndaziŵa cho ndichitengi kuti ŵanthu akandilonde munyumba zawu asani ndatuzgikapu pa udindu wakuwonere nyumba.” Mwaliŵiliŵi wangudana ŵanthu wo ŵenga ndi ngongoli kwa abwana ŵaki, ndipu munthu weyosi wamufumbanga kuti: “Kumbi we ndi ngongoli zilinga kwa abwana ŵangu?”—Luka 16:3-5.

Munthu wakwamba wangumuka kuti: “Miyesu 100 ya mafuta nga maolivi.” Mafuta ngenanga ngakwananga malita 2,200. Munthu yo wenga ndi ngongoli, watenere kuti wenga ndi munda ukulu wa maolivi pamwenga wagulisanga mafuta nga maolivi. Mwaviyo, mteŵeti wakuwonere nyumba wangumukambiya kuti: “Eni chikalata cho tingulemberana, uje pasi ndi kulemba miyesu 50 [pamwenga kuti malita 1,100] mwaliŵi.”—Luka 16:6.

Mteŵeti wakuwonere nyumba wangufumba so munthu munyaki kuti: “Nanga yiwi we nawu ndi ngongoli zilinga?” Iyu wangumuka kuti: “Miyesu 100 yikuluyikulu ya tirigu.” Tirigu mwenuyu wakwananga malita 22,000. Pavuli paki, mteŵeti wakuwonere nyumba wangukambiya munthu mwenuyu kuti: “Eni chikalata cho tingulemberana ndipu ulembi miyesu 80.” Ivi vilongo kuti mteŵeti wakuwonere nyumba, wangumutuzgiyaku ngongoli munthu mwenuyu.—Luka 16:7.

Mteŵeti wakuwonere nyumba wenga weche kugwira ntchitu yakuwonere chuma cha abwana ŵaki. Mwaviyo, wenga weche ndi udindu wakutuzgiyaku ngongoli zo ŵanthu ŵenga nazu kwa abwana ŵaki. Chifukwa chakuti mteŵeti mwenuyu wangutuzgiyaku ŵanthu ngongoli, vingumuwovya kusaniya mabwezi ngo ngatingi ngazimuwovyengi asani ntchitu yamumaliya.

Pati pajumpha nyengu, abwana a mteŵeti mwenuyu anguvwa vo mteŵeti wawu wanguchita. Chinanga kuti mteŵeti uyu “wenga muheni” ndipu vo wanguchita vinguchitiska kuti abwana ŵaki aleki kulonde ngongoli zawu zosi, kweni abwana ŵaki angumulumba chifukwa “wanguchita vinthu mwazeru.” Yesu wangukamba so kuti: “Pakuti ŵana a mugonezi wunu achita vinthu mwazeru ndi anyawu a mugonezi wawu kuluska ŵana a ukweru.”—Luka 16:8.

Yesu wachikamba ntharika iyi, wazomerezanga kuti ŵanthu achitengi vinthu nge mo mteŵeti uyu wanguchitiya cha pamwenga kuchiska ŵanthu kuti achitengi vinthu mwachinyengu asani apanga bizinesi. Nanga wang’anamuwanganji? Yesu wanguchiska akusambira ŵaki kuti: “Jisaniriyeni abwezi mwakugwiriskiya ntchitu chuma chambula urunji, kuti asani chamala,  akakulondiyeni mumalu ngakujamu kwamuyaya.” (Luka 16:9) Mwaviyo, ntharika iyi yititisambiza kuti tikhumbika kuwone limu patali kweniso kuchita vinthu mwazeru. Ateŵeti aku Chiuta wo ndi “ŵana a ukweru” akhumbika kugwiriskiya ntchitu chuma chawu mwazeru kuti azisaniyi umoyu wamuyaya kunthazi.

Yehova Chiuta ndipuso Mwana waki ndiwu alonde munthu kuti wakasere mu Ufumu wakuchanya pamwenga wazisere m’Paradayisu pacharu chapasi ndi kuwusika ndi Ufumu wenuwu. Mwaviyo, tikhumbika kuyesesa kuja nawu pa ubwezi mwakugwiriskiya ntchitu chuma chidu kuti chiwovyi pa ntchitu za Ufumu. Asani tichita viyo tikayikengi cha kuti tazamulonde umoyu wamuyaya chinanga vinthu nge golidi, siliva kweniso vinthu vinyaki vo tenga navu vatimaliya pamwenga vanangika.

Yesu wangukamba so kuti ŵanthu wosi wo agomezgeka asani agwiriskiya ntchitu chuma pamwenga vinthu vinyaki vo ŵe navu, angaja so akugomezgeka asani aphwere vinthu vinyaki vakukhumbika ukongwa. Yesu wanguti: “Mwaviyo asani mutondeka kugomezgeka pa chuma chambula urunji, ndiyani wangakupaskani chuma chauneneska [nge ntchitu za Ufumu]?”—Luka 16:11.

Yapa, Yesu wangulongo kuti pe vinthu vinandi vo akusambira ŵaki akhumbikanga kuchita kuti akaŵalonde “mumalu ngakujamu kwamuyaya.” Munthu wangaja cha mteŵeti wakugomezgeka waku Chiuta ndipuso kuja kapolu wa chuma cha mucharu ichi nyengu yimoza. Pakumaliya Yesu wangukamba kuti: “Palivi munthu yo wangateŵete mabwana ngaŵi, chifukwa watinkhengi yumoza ndi kwanja munyaki, pamwenga wagomezgekengi ku yumoza ndi kunyoza munyaki. Mungaja cha kapolu waku Chiuta ndipuso kapolu wa chuma pa nyengu yimoza.”—Luka 16:9, 13.